അബുദാബി: യുഎഇയില്‍ ജോലിചെയ്യുന്ന മുഴുവനാളുകള്‍ക്കും തൊഴില്‍നഷ്ട ഇന്‍ഷുറന്‍സില്‍ രജിസ്റ്റര്‍ ചെയ്യുന്നതിന് അനുവദിച്ച ഗ്രേസ് പിരീഡ് ഉടന്‍ അവസാനിക്കുന്നു. സെപ്തംബര്‍ 30നുള്ളില്‍ രജിസ്റ്റര്‍ ചെയ്യാത്തവര്‍ പിഴ അടയ്‌ക്കേണ്ടിവരും. പിഴ അടച്ചില്ലെങ്കില്‍, പുതിയ വര്‍ക്ക് പെര്‍മിറ്റ് ലഭിക്കില്ല. ഇതോടെ പുതിയ ജോലിയില്‍ ചേരാന്‍ കഴിയാതെ വരികയും ചെയ്യും.
സ്വകാര്യ സ്ഥാപനങ്ങളിലെ ജീവനക്കാര്‍ മാത്രമല്ല, ഫ്രീസോണ്‍, ഫെഡറല്‍ ഗവണ്‍മെന്റ് ജീവനക്കാര്‍ ഉള്‍പ്പെടെ രാജ്യത്തുടനീളമുള്ള എല്ലാ ജീവനക്കാര്‍ക്കും സ്‌കീമില്‍ ചേരല്‍ നിര്‍ബന്ധമാണ്. 2023 ജനുവരി ഒന്നു മുതലാണ് തൊഴില്‍നഷ്ട ഇന്‍ഷുറന്‍സ് സ്‌കീം പ്രാബല്യത്തില്‍ വന്നത്. അച്ചടക്കനടപടിയോ രാജിയോ ഒഴികെയുള്ള കാരണങ്ങളാല്‍ ജോലി നഷ്ടപ്പെടുന്ന സാഹചര്യത്തില്‍ ജോലിക്കാരന് മൂന്ന് മാസം വരെ ശമ്പളം ലഭിക്കുന്നതാണ് പദ്ധതി. അടിസ്ഥാന ശമ്പളത്തിന്റെ 60 ശതമാനം വരെ ലഭിക്കും.
ഇതുവരെ തൊഴില്‍നഷ്ട ഇന്‍ഷുറന്‍സ് പദ്ധതിയില്‍ ഏകദേശം അഞ്ച് ദശലക്ഷം ജീവനക്കാര്‍ അംഗങ്ങളായിട്ടുണ്ട്. ഒക്ടോബര്‍ ഒന്ന് ഞായറാഴ്ച മുതല്‍ അംഗത്വമെടുക്കാത്തവര്‍ക്ക് കനത്ത പിഴ ചുമത്തും. പിഴ അടച്ചില്ലെങ്കില്‍ ജീവനക്കാരന്റെ ശമ്പളത്തില്‍ നിന്നോ സേവനാനന്തര ആനുകൂല്യങ്ങളില്‍ നിന്നോ ഈടാക്കും.
സെപ്തംബര്‍ 30ന് മുമ്പ് സ്‌കീമില്‍ ചേരാത്തവര്‍ക്ക് 400 ദിര്‍ഹം (9,026 രൂപ) ആണ് പിഴ. മൂന്ന് മാസത്തിലധികം പ്രീമിയം അടയ്ക്കാതിരുന്നാല്‍ 200 ദിര്‍ഹം (4,513 രൂപ) പിഴ ഈടാക്കും. തൊഴിലില്ലായ്മ ഇന്‍ഷുറന്‍സ് ആനുകൂല്യങ്ങള്‍ ലഭിക്കുന്നതിന് ഇന്‍ഷ്വര്‍ ചെയ്തവരുമായി സഹകരിക്കാത്ത തൊഴിലുടമകള്‍ക്ക് 20,000 ദിര്‍ഹമാണ് പിഴ.
തുടര്‍ച്ചയായി 12 മാസമെങ്കിലും ജോലിചെയ്തിട്ടുണ്ടെന്നും മനഃപൂര്‍വം ജോലിയില്‍ നിന്ന് വിട്ടുനില്‍ക്കുന്നതല്ലെന്നും തെളിയിക്കുന്ന രേഖ 30 ദിവസത്തിനകം സമര്‍പ്പിക്കുന്നവര്‍ക്കാണ് നഷ്ടപരിഹാരത്ത് അര്‍ഹത. അടിസ്ഥാന ശമ്പളം 16,000 ദിര്‍ഹത്തില്‍ താഴെയുള്ളവരെല്ലാം പ്രതിമാസം 5 ദിര്‍ഹം ആണ് പ്രീമിയം അടയ്‌ക്കേണ്ടത്. പ്രതിമാസ നഷ്ടപരിഹാരമായി പരമാവധി 10,000 ദിര്‍ഹം വരെ ലഭിക്കും. അടിസ്ഥാന ശമ്പളം 16,000 ദിര്‍ഹത്തില്‍ കൂടുതലുള്ളവര്‍ പ്രതിമാസം 10 ദിര്‍ഹമാണ് ഇന്‍ഷുറന്‍സ് ചെലവിലേക്ക് നല്‍കേണ്ടത്. പ്രതിമാസ നഷ്ടപരിഹാരം പരമാവധി 20,000 ദിര്‍ഹം ആയിരിക്കും.
നിക്ഷേപകര്‍ (അവര്‍ ജോലി ചെയ്യുന്ന കമ്പനികളുടെ ഉടമകള്‍), ഗാര്‍ഹിക സഹായികള്‍, താല്‍ക്കാലിക കരാര്‍ തൊഴിലാളികള്‍, 18 വയസ്സിന് താഴെയുള്ളവര്‍ എന്നിവര്‍ ഇന്‍ഷുറന്‍സില്‍ ചേരേണ്ടതില്ല. പെന്‍ഷന്‍ ലഭിക്കുന്നവര്‍ പുതുതായി ജോലിയില്‍ ചേര്‍ന്നാലും പദ്ധതിയുടെ ഭാഗമാവേണ്ടതില്ല. ഇന്‍വോലന്ററി ലോസ് ഓഫ് എംപ്ലോയ്‌മെന്റ് എന്നും പദ്ധതി അറിയപ്പെടുന്നു.
