അബുദാബി: കള്ളപ്പണ ഇടപാട് തടയുന്നതുമായി ബന്ധപ്പെട്ട് നിയന്ത്രണ ചട്ടങ്ങള്‍ ലംഘിച്ചതിനെ തുടര്‍ന്ന് യുഎഇയില്‍ പ്രവര്‍ത്തിക്കുന്ന മണി എക്‌സ്‌ചേഞ്ച് സ്ഥാപനമായ ദിര്‍ഹം എക്‌സ്‌ചേഞ്ചിന്റെ ലൈസന്‍സ് റദ്ദാക്കി. ഗുരുതരമായ ലംഘനങ്ങള്‍ കണ്ടെത്തിയതിനാല്‍ രജിസ്റ്ററില്‍ സ്ഥാപനത്തിന്റെ പേര് നീക്കിയതായും യുഎഇ സെന്‍ട്രല്‍ ബാങ്ക് (സിബിയുഎഇ) അറിയിച്ചു.
രാജ്യത്ത് പ്രവര്‍ത്തിക്കുന്ന ആര്‍എംബി കൊമേഴ്‌സ്യല്‍ ബ്രോക്കേഴ്‌സ് എന്ന കമ്പനിയുടെ രജിസ്‌ട്രേഷനും റദ്ദാക്കിയിട്ടുണ്ട്. ഗുരുതരമായ നിയന്ത്രണ പിഴവുകള്‍ കണ്ടെത്തിയതിനെ തുടര്‍ന്നാണ് നടപടിയെന്ന് യുഎഇ സെന്‍ട്രല്‍ ബാങ്ക് വ്യക്തമാക്കി.
കള്ളപ്പണം വെളുപ്പിക്കല്‍ കുറ്റകൃത്യങ്ങള്‍, തീവ്രവാദത്തിനുള്ള ധനസഹായം, നിയമവിരുദ്ധ സംഘടനകള്‍ക്കുള്ള ധനസഹായം എന്നിവ തടയുന്നതിനുള്ള 2018ലെ ഫെഡറല്‍ ഉത്തരവ് (20) പ്രകാരമാണ് നടപടി. വാണിജ്യ സ്ഥാപനങ്ങളുടെ പ്രവര്‍ത്തനങ്ങളുമായി ബന്ധപ്പെട്ട യുഎഇ ഫെഡറല്‍ നിയമത്തിലെ ആര്‍ട്ടിക്കിള്‍ 14 പ്രകാരവും 2018ലെ ഫെഡറല്‍ ലോ നമ്പര്‍ (14) ആര്‍ട്ടിക്കിള്‍ 137 പ്രകാരവുമുള്ള അപ്പീല്‍ നടപടിക്രമങ്ങള്‍ പാലിച്ചാണ് അഡ്മിനിസ്‌ട്രേറ്റീവ് ഉപരോധങ്ങള്‍ നടപ്പാക്കിയതെന്നും സെന്‍ട്രല്‍ ബാങ്ക് കൂട്ടിച്ചേര്‍ത്തു.
വിലക്ക് ഏര്‍പ്പെടുത്തിയ രാജ്യങ്ങളിലേക്ക് പണമയക്കരുതെന്ന നിര്‍ദേശങ്ങള്‍ ലംഘിച്ചതായും കള്ളപ്പണ ഇടപാട് നടത്തിയതായും യുഎഇ സെന്‍ട്രല്‍ ബാങ്ക് കണ്ടെത്തി. ഗുരുതരമായ നിയമലംഘനങ്ങള്‍ കണ്ടെത്തിയതിനെ തുടര്‍ന്നാണ് ഭരണപരമായ ഉപരോധം ഏര്‍പ്പെടുത്തിയതെന്നും അറിയിപ്പില്‍ വിശദീകരിച്ചു. ഉപയോക്താക്കളുടെ കള്ളപ്പണ ഇടപാടുകളെ കുറിച്ച് സെന്‍ട്രല്‍ ബാങ്കിന് റിപ്പോര്‍ട്ട് ചെയ്യുന്നതിലും ഇതുമായി ബന്ധപ്പെട്ട മാര്‍ഗനിര്‍ദേശങ്ങളും നിയന്ത്രണങ്ങളും പാലിക്കുന്നതിലും കമ്പനിക്ക് വീഴ്ചയുണ്ടായി.
രാജ്യത്തിന്റെ സാമ്പത്തിക വ്യവസ്ഥയുടെ സുതാര്യതയും സമഗ്രതയും സംരക്ഷിക്കുന്നതിനായി എല്ലാ മണി എക്‌സ്‌ചേഞ്ച് സ്ഥാപന ഉടമകളും ജീവനക്കാരും ഇടപാടുകാരും നിയമങ്ങളും ചട്ടങ്ങളും പാലിക്കണമെന്ന് സെന്‍ട്രല്‍ ബാങ്ക് അഭ്യര്‍ത്ഥിച്ചു. ഈ വര്‍ഷം ആദ്യം, ഗുരുതരമായ നിയമലംഘനത്തിന് അല്‍ റഷീദ് എക്‌സ്‌ചേഞ്ച് കമ്പനിയുടെ ലൈസന്‍സ് സെന്‍ട്രല്‍ ബാങ്ക് അസാധുവാക്കിയിരുന്നു. വിശദമായ പരിശോധനയ്ക്ക് ശേഷം കമ്പനിയുടെ പേര് രജിസ്റ്ററില്‍ നിന്ന് ഒഴിവാക്കുകയുമുണ്ടായി.
കഴിഞ്ഞ ജൂണില്‍ നിയമങ്ങള്‍ ലംഘിച്ചതിന് ഇന്‍ഷുറന്‍സ് സേവന ദാതാക്കളായ സീഗള്‍ ഇന്‍ഷുറന്‍സ് സര്‍വീസസ് കമ്പനിയുടെയും അല്‍ ഷൊറാഫ ഇന്‍ഷുറന്‍സ് സര്‍വീസസിന്റെയും രജിസ്‌ട്രേഷന്‍ റദ്ദാക്കിയിരുന്നു.
തീവ്രവാദ പ്രവര്‍ത്തനങ്ങള്‍ക്കായി വിദേശത്തേക്ക് പണമെത്തുന്നത് തടയുന്നതിനും കള്ളപ്പണം വെളുപ്പിക്കല്‍ തടയുന്നതിനും അനധികൃതമായി രാജ്യത്തിന് പുറത്തേക്ക് പണമയക്കുന്നത് തടയുന്നതിനുമയി രാജ്യത്ത് കടുത്ത നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. സംശയകരമായ ഇടപാടുകളെ കുറിച്ച് ബാങ്കുകള്‍ സെന്‍ട്രല്‍ ബാങ്കുകളെ യഥാസമയം റിപ്പോര്‍ട്ട് ചെയ്യണമെന്നാണ് നിയമം.
