ഡൽഹി: വനിതാ ഐപിഎല്ലിന്റെ രണ്ടാം പതിപ്പ് ഫെബ്രുവരി 23 മുതൽ ആരംഭിക്കും. കഴിഞ്ഞ വർഷത്തെ ചാമ്പ്യന്മാരായ മുംബൈ ഇന്ത്യൻസും ഫൈനലിസ്റ്റുകളായ ഡൽഹി ക്യാപ്പിറ്റൽസും തമ്മിലാണ് ആദ്യ മത്സരം. ബെംഗളൂരു ചിന്നസ്വാമി സ്റ്റേഡിയം ഉദ്ഘാടന മത്സരത്തിന് വേദിയാകും. ഡൽഹിയിലും ബെംഗളൂരുവിലുമായി എല്ലാ മത്സരങ്ങളും നടക്കും.
അഞ്ച് ടീമുകളിൽ ആദ്യ സ്ഥാനത്ത് എത്തുന്ന ടീം നേരിട്ട് ഫൈനലിന് യോഗ്യത നേടും. രണ്ട് മൂന്ന് സ്ഥാനങ്ങളിലെത്തുന്ന ടീമുകൾ തമ്മിൽ എലിമിനേഷൻ മത്സരമുണ്ടാകും. അതിൽ വിജയിക്കുന്നവർക്കാകും രണ്ടാം ടീമായി ഫൈനൽ യോഗ്യത ലഭിക്കുക. ആകെ 22 മത്സരങ്ങളാണുള്ളത്. ഒരു ടീമിന് എട്ട് മത്സരങ്ങളുണ്ട്.
ഗ്രൂപ്പ് മത്സരങ്ങൾ മാർച്ച് 13ന് അവസാനിക്കും. മാർച്ച് 15ന് എലിമിനേറ്റർ മത്സരം നടക്കും. മാർച്ച് 17ന് ഡൽഹിയിലാണ് ഫൈനൽ മത്സരം. എല്ലാ മത്സരങ്ങളും വൈകിട്ട് 7.30നാണ് ആരംഭിക്കുക.
