2023-24 സീസണിൽ ഉജ്ജ്വല ഫോമിൽ കളിക്കുന്ന താരമാണ് പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോ (Cristiano Ronaldo). സൗദി പ്രോ ലീഗിൽ അൽ നസറിനായി (Al Nassr FC) കളിക്കുന്ന റോണോ ഈ സീസണിൽ ലീഗിലെ ടോപ് സ്കോററുമാണ്. എന്നാൽ അൽ നസറിന്റെ കഴിഞ്ഞ കളിയിൽ താരം കളിച്ചിരുന്നില്ല. ആരാധകരെ ഇത് വല്ലാതെ നിരാശയിലാഴ്ത്തുകയും ചെയ്തു.
അൽ ദുഹൈലിനെതിരെ നടന്ന എ എഫ് സി ചാമ്പ്യൻസ് ലീഗ് മത്സരത്തിലായിരുന്നു ക്രിസ്റ്റ്യാനോ റൊണാൾഡോ അൽ നസറിനായി ഇറങ്ങാതിരുന്നത്. തുടർച്ചയായ മത്സരങ്ങളെത്തുടർന്ന് ഈ കളിയിൽ നിന്ന് റൊണാൾഡോയ്ക്ക് അൽ നസർ പരിശീലകൻ വിശ്രമം അനുവദിക്കുകയായിരുന്നു. അതേ സമയം അൽ വെഹ്ദയ്ക്കെതിരായ സൗദി പ്രോ ലീഗ് (Saudi Pro League) മത്സരത്തിൽ റോണോ തിരിച്ചെത്തുമെന്ന് പരിശീലകൻ വ്യക്തമാക്കിയിരുന്നു. ഈ കളിയിൽ താരത്തിന്റെ ഗംഭീര തിരിച്ചുവരവ് തന്നെയാണ് ആരാധകർ പ്രതീക്ഷിച്ചിരുന്നത്.
ഇപ്പോളിതാ വിശ്രമം കഴിഞ്ഞ് തിരിച്ചെത്തിയ കളിയിൽ ക്രിസ്റ്റ്യാനോ റൊണാൾഡോയുടെ ആരാധകർ ആഗ്രഹിച്ചതുപോലെ താരം കിടിലൻ പ്രകടനം നടത്തിയിരിക്കുന്നു. അൽ വെഹ്ദയ്ക്കെതിരെ നടന്ന കളിയിൽ ഒരു ഗോൾ നേടിയ താരം ടീമിന്റെ വിജയത്തിൽ പ്രധാന പങ്കും വഹിച്ചു. എവേ പോരാട്ടത്തിൽ ഒന്നിനെതിരെ മൂന്ന് ഗോളുകൾക്കായിരുന്നു അൽ അലാമി എന്നറിയപ്പെടുന്ന അൽ നസറിന്റെ വിജയം.
അൽ വെഹ്ദയുടെ ഹോം ഗ്രൗണ്ടിൽ നടന്ന മത്സരത്തിന്റെ പതിനൊന്നാം മിനിറ്റിൽ അൽ നസർ ലീഡെടുത്തു. സൂപ്പർ താരം അലക്സ് ടെല്ലസായിരുന്നു ഗോൾ സ്കോറർ. മുപ്പത്തിയൊൻപതാം മിനിറ്റിൽ അബ്ദുള അൽ അംറിയിലൂടെ അൽ അലാമി ലീഡ് വർധിപ്പിച്ചു. ആദ്യ പകുതിക്ക് പിരിയുമ്പോൾ ക്രിസ്റ്റ്യാനോയും സംഘവും 2-0 ന് മുന്നിട്ട് നിന്നു. രണ്ടാം പകുതി ആരംഭിച്ച് നാലാം മിനിറ്റിൽ ആരാധകർ കാത്തിരുന്ന റോണോയുടെ ഗോൾ പിറന്നു. എൺപത്തിയൊന്നാം മിനിറ്റിൽ അൻസെൽമോയാണ് അൽ വെഹ്ദയുടെ ആശ്വാസ ഗോൾ നേടിയത്.
മിന്നും ഫോം തുടരുന്ന ക്രിസ്റ്റ്യാനോ റൊണാൾഡോ 2023-24 സീസൺ സൗദി പ്രോ ലീഗിലെ ഗോളടിവേട്ടയിൽ തന്റെ ഒന്നാം സ്ഥാനം ഒന്നുകൂടി അരക്കിട്ടുറപ്പിച്ചിരിക്കുകയാണ്. 13 ഗോളുകളോടെയാണ് ക്രിസ്റ്റ്യാനോ ഗോളടിവേട്ടയിൽ ഒന്നാമത് നിൽക്കുന്നത്. 10 ഗോളുകളുമായി അൽ ഹിലാൽ താരം അലക്സാണ്ടർ മിട്രോവിച്ച് രണ്ടാമതും എട്ട് ഗോളുകളുമായി അൽ ഇത്തിഹാഡ് സൂപ്പർ താരം കരിം ബെൻസേമയുമാണ് ഗോളടിയിൽ യഥാക്രമം രണ്ട്, മൂന്ന് സ്ഥാനങ്ങളിൽ. അതേ സമയം സൗദി ലീഗിൽ ഇത്തവണത്തെ അസിസ്റ്റ് പട്ടികയിലും റോണോ തന്നെയാണ് ഒന്നാമത്. ഏഴ് അസിസ്റ്റുളോടെയാണ് ഇക്കാര്യത്തിൽ താരം ആദ്യ സ്ഥാനത്ത് നിൽക്കുന്നത്.
അൽ വെഹ്ദയ്ക്കെതിരെ ജയം നേടിയ അൽ നസർ എഫ്സി 2023-24 സീസൺ സൗദി പ്രോ ലീഗിൽ രണ്ടാം സ്ഥാനത്തുണ്ട്. 13 കളികളിൽ 10 ജയവും ഒരു സമനിലയും രണ്ട് തോൽവിയുമുള്ള അൽ നസറിന്റെ സമ്പാദ്യം 31 പോയിന്റാണ്. 13 കളികളിൽ 35 പോയിന്റുമായി അൽ ഹിലാലാണ് പോയിന്റ് പട്ടികയിൽ ഒന്നാമത്. നേരത്തെ ഈ സീസൺ സൗദി ലീഗിലെ ആദ്യ രണ്ട് കളികളിലും പരാജയപ്പെട്ടുകൊണ്ടായിരുന്നു അൽ നസറിന്റെ തുടക്കം. എന്നാൽ ഇതിന് ശേഷം കളിച്ച 11 മത്സരങ്ങളിലും അവർ തോൽവിയറിഞ്ഞിട്ടില്ല. സൗദി ലീഗിൽ ഇനി അന്താരാഷ്ട്ര ഇടവേളയാണ്. ഇതിന് ശേഷം ഈ മാസം ഇരുപത്തിനാലിനാണ് അവരുടെ ആദ്യ ജയം. അൽ അഹൗദാണ് എതിരാളികൾ.
