ദുബായ്: ഉപഭോക്താക്കളുടെ അഭിപ്രായങ്ങളും നിർദ്ദേശങ്ങളും തേടുന്നതിനായി ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജിഡിആർഎഫ്എ) പുതിയ ഓൺലൈൻ നെറ്റ്‌വർക്ക് ആരംഭിച്ചു. ‘ജിഡിആർഎഫ്എ- ദുബായ് കസ്റ്റമർ കമ്മ്യൂണിറ്റി’ എന്ന പേരിൽ വകുപ്പിന്റെ വെബ്സൈറ്റിലാണ് പുതിയ സംവിധാനം ആരംഭിച്ചിരിക്കുന്നത്.
ആപ്പിലൂടെ സ്വദേശികൾക്കും വിദേശികൾക്കും തങ്ങൾക്ക് ലഭിച്ച സേവനങ്ങളുടെ കുറിച്ചുള്ള അഭിപ്രായങ്ങളും നിർദേശങ്ങളും വകുപ്പുമായി പങ്കുവെക്കാൻ കഴിയും. ഈ വിവരങ്ങളെ പിന്തുടർന്ന് കസ്റ്റമറുടെ ആവശ്യങ്ങൾ മനസിലാക്കി വേണ്ട നടപടികൾ വകുപ്പ് സ്വീകരിക്കും. ഉപഭോക്താക്കളുടെ ആവശ്യങ്ങളും പ്രതീക്ഷകളും മനസ്സിലാക്കാനും അതനുസൃതമായി സേവനങ്ങൾ മെച്ചപ്പെടുത്താനുമാണ് ഈ നെറ്റ്‌വർക്ക് ലക്ഷ്യമിടുന്നത്.
ഉപഭോക്താക്കൾക്ക് ജിഡിആർഎഫ്എ ദുബായ് വെബ്സൈറ്റ് സന്ദർശിച്ച് “gdrfa dubai ഉപഭോക്താക്കളുടെ കമ്മ്യൂണിറ്റി” [https://www.gdrfad.gov.ae/en/customer-community](https://www.gdrfad.gov.ae/en/customer-community) ഓപ്ഷനിൽ ക്ലിക്ക് ചെയ്യണം. ഈ പ്ലാറ്റ്‌ഫോമിലൂടെ ഉപഭോക്താക്കൾക്ക് അവരുടെ ഫീഡ്‌ബാക്കും ആശയങ്ങളും ഡിപ്പാർട്ട്മെന്റുമായി പങ്കിടാൻ സൗകര്യപ്രദവും, ആക്‌സസ് ചെയ്യാവുന്നതുമായ മികച്ച മാർഗം നൽകുന്നുണ്ട്.
ജിഡിആർഎഫ്എയുടെ സേവനങ്ങൾ മെച്ചപ്പെടുത്തുന്നതിൽ പങ്കാളികളാകാൻ ആഗ്രഹിക്കുന്ന ഉപഭോക്താക്കളുടെ ഒരു സമൂഹം രൂപീകരിക്കുന്നതിനാണ് ഈ പുതിയ നെറ്റ്‌വർക്ക് രൂപീകരിച്ചിരിക്കുന്നതെന്ന് മേധാവി ലഫ്റ്റനന്റ ജനറൽ മുഹമ്മദ്‌ അഹ്‌മദ്‌ അൽ മർറി പറഞ്ഞു. നിലവിലുള്ള സേവനങ്ങളിൽ അവരുടെ അഭിപ്രായങ്ങൾ പറയാനും മികച്ച നിർദ്ദേശങ്ങൾ നൽകാനും ഈ നെറ്റ്‌വർക്ക് അവസരം നൽകുമെന്ന് അദ്ദേഹം വ്യക്തമാക്കി.
ഉപഭോക്താക്കളുടെ അഭിപ്രായങ്ങളും നിർദ്ദേശങ്ങളും വകുപ്പിന് ഏറെ വിലപ്പെട്ടതാണ്. തങ്ങളുടെ സേവനങ്ങൾ കൂടുതൽ കാര്യക്ഷമമാക്കുന്നതിനും ഉപഭോക്താക്കൾക്ക് കൂടുതൽ സംതൃപ്തി നൽകുന്നതിനും ഈ ഫീഡ്ബാക്ക് നിർണായകമാണെന്ന് വകുപ്പ് അറിയിച്ചു.
