മസ്‌കറ്റ്: ചെങ്കടലില്‍ അന്താരാഷ്ട്ര അന്തര്‍വാഹിനി കേബിളിന് കേടുപാടുകള്‍ സംഭവിച്ചത് ഒമാനിലുടനീളം ഇന്റര്‍നെറ്റ് ഡാറ്റ സേവനങ്ങളെ ഗുരുതരമായി ബാധിച്ചു. രാജ്യത്തെ വിവിധ ഗവര്‍ണറേറ്റുകളിലെ എല്ലാ വാര്‍ത്താ വിനിമയ കമ്പനികളുടെയും സേവനങ്ങള്‍ക്ക് കാര്യമായ തടസ്സം നേരിടുന്നതായി ഒമാന് ടെലികമ്മ്യൂണിക്കേഷന്‍ റെഗുലേറ്ററി അതോറിറ്റി (TRA) അറിയിച്ചു.
ഒമാന് പുറമേ യൂറോപ്പിനും ഏഷ്യയ്ക്കും ഇടയിലുള്ള ഇന്റര്‍നെറ്റ് കണക്റ്റിവിറ്റിയേയും ഇത് ബാധിച്ചിട്ടുണ്ട്. ഇതര ഗള്‍ഫ് രാജ്യങ്ങളിലും ഇന്ത്യയിലും കാര്യമായ തടസ്സങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.
കേടുപാടുകള്‍ AAE-1 Seacom, EIG, and TGN തുടങ്ങിയ പ്രധാന കേബിള്‍ സംവിധാനങ്ങളെ ബാധിച്ചു. അറ്റകുറ്റപ്പണികള്‍ക്ക് എട്ടാഴ്ച വരെ സമയമെടുക്കും. കേബിള്‍ ഓപറേറ്റര്‍മാരുമായി ചേര്‍ന്ന് അറ്റകുറ്റപ്പണികള്‍ വേഗത്തിലാക്കാനും അറ്റകുറ്റപ്പണി നടത്തുന്ന കപ്പലുകളുടെ സുരക്ഷ ഉറപ്പാക്കാനും സര്‍ക്കാരുകളോട് അന്തര്‍വാഹിനി കേബിള്‍ സംരക്ഷണത്തിന്റെ ആഗോള അതോറിറ്റിയായ ഇന്റര്‍നാഷണല്‍ കേബിള്‍ പ്രൊട്ടക്ഷന്‍ കമ്മിറ്റി (ഐസിപിസി) അഭ്യര്‍ത്ഥിച്ചു.
ചെങ്കടലിലെ അന്താരാഷ്ട്ര സബ് മറൈന്‍ കേബിളുകളിലൊന്ന് തകര്‍ന്നത് സംബന്ധിച്ച് സമഗ്രമായ അന്വേഷണം വേണമെന്നും ഐസിപിസി ആവശ്യപ്പെട്ടിട്ടുണ്ട്. കേബിള്‍ തകര്‍ന്നതില്‍ അന്താരാഷ്ട്ര കേബിള്‍ സംരക്ഷണ സമിതി ആശങ്ക അറിയിച്ചിരുന്നു. സര്‍ക്കാര്‍-ഓപറേറ്റര്‍ സഹകരണവും സമിതി അഭ്യര്‍ത്ഥിച്ചു. കാരണങ്ങള്‍ മനസിലാക്കുന്നതിനും ഭാവിയില്‍ സംഭവിക്കുന്ന സംഭവങ്ങള്‍ തടയുന്നതിനും അടിയന്തര നടപടി സ്വീകരിക്കേണ്ടത് പ്രധാനമാണെന്നും സമിതി ചൂണ്ടിക്കാട്ടി.
കേബിള്‍ തകര്‍ന്നത് മൂലമുണ്ടാകുന്ന പ്രത്യാഘാതങ്ങള്‍ പരമാവധി ലഘൂകരിക്കാന്‍ വിവിധ കമ്പനികളുമായി സഹകരിച്ച് പ്രവര്‍ത്തിക്കുകയാണെന്ന് ഒമാന് അതോറിറ്റി വ്യക്തമാക്കി. ലോകമെമ്പാടും കടലിനടിയിലൂടെ 400 കേബിളുകള്‍ 1.5 ദശലക്ഷം കിലോമീറ്റര്‍ ദൂരത്തില്‍ കടന്നുപോകുന്നുണ്ടെന്നാണ് കണക്ക്. ഇന്റര്‍നെറ്റ് അടക്കമുള്ള ഡിജിറ്റല്‍ ഡേറ്റകളില്‍ 99 ശതമാനവും ഈ കേബിളുകള്‍ വഴിയാണ് സാധ്യമാവുന്നത്. ഒരോ വര്‍ഷം ശരാശരി 150 കേബിള്‍ തകരാറുകളെങ്കിലും സംഭവിക്കാറുണ്ട്.
സാധാരണയായി ആഴക്കടല്‍ മല്‍സ്യബന്ധനം കാരണവും കപ്പലുകള്‍ നങ്കൂരമിടുന്നതു കൊണ്ടുമാണ് കേബിളുകള്‍ക്ക് തകരാറ് സംഭവിക്കുന്നത്. തകരാര്‍ സംഭവിച്ച ഭാഗത്തെ അറ്റകുറ്റപ്പണികള്‍ക്കും ഭാവി സംരക്ഷണ തന്ത്രങ്ങള്‍ക്കുമായി ആഗോള ശ്രമങ്ങള്‍ നടക്കുന്നതായി ഒമാന് ടെലികമ്മ്യൂണിക്കേഷന്‍ റെഗുലേറ്ററി അതോറിറ്റി വ്യക്തമാക്കി. അണ്ടര്‍വാട്ടര്‍ നെറ്റ്വര്‍ക്കുകളുടെ സംരക്ഷണം വര്‍ധിപ്പിക്കുന്നതിന് ഐസിപിസി പദ്ധതികള്‍ തയ്യാറാക്കിയിരുന്നു.
ലോകം ഡിജിറ്റല്‍ കണക്റ്റിവിറ്റിയെ കൂടുതലായി ആശ്രയിക്കുന്നതിനാല്‍ അന്തര്‍വാഹിനി കേബിളുകളുടെ സംരക്ഷണം ഉറപ്പാക്കുന്നത് ആഗോള ആശയവിനിമയത്തിനും സാമ്പത്തിക സ്ഥിരതയ്ക്കും പരമപ്രധാനമാണ്.
