യുഎഇ ബഹിരാകാശ സഞ്ചാരി അൽ നിയാദി അടുത്തമാസം മൂന്നിന് ഭൂമിയില്‍ തിരിച്ചെത്തും

അബുദബി: യുഎഇ ബഹിരാകാശ സഞ്ചാരി സുല്‍ത്താന്‍ അല്‍ നിയാദി അടുത്തമാസം മൂന്നിന് ഭൂമിയില്‍ തിരിച്ചെത്തും. മെക്‌സിക്കോ ഉള്‍ക്കടല്‍ തീരത്തെ ടാംപയിലായിരിക്കും നിയാദിയും സംഘവും തിരിച്ചിറങ്ങുക. ബഹിരാകാശത്ത് ആറുമാസത്തിലേറെ നീണ്ട ദൗത്യം പൂര്‍ത്തിയാക്കിയാണ് യു എ ഇയുടെ സുല്‍ത്താന്‍ അല്‍ നിയാദി ഭൂമിയിലേക്ക് മടങ്ങുന്നത്. 200ലധികം പരീക്ഷണങ്ങളില്‍ ഡോ. നിയാദി പങ്കാളിയായിരുന്നു.

നാസയുടെ സ്റ്റീഫന്‍ ബോവന്‍, വാറന്‍ ഹോബര്‍ഗ്, റഷ്യയുടെ ആന്‍ഡ്രേ ഫെദ്യാവ് എന്നിവരും നെയാദിക്കൊപ്പം മടങ്ങും. ബഹിരാകാശ നിലയത്തിലെത്തിയ ക്രൂ സെവന്‍ അംഗങ്ങള്‍ക്ക് ചുമതലകള്‍ കൈമാറിയ ശേഷം സെപ്തംബര്‍ രണ്ടിനായിരിക്കും സംഘം മടക്കയാത്രക്കുള്ള തയാറെടുപ്പുകള്‍ ആരംഭിക്കുക.

വിവിധ ഘട്ടങ്ങളുള്ള ഒരുക്കങ്ങള്‍ക്ക് ശേഷമാണ് സ്‌പേസ് എക്‌സ് ക്രൂ ഡ്രാഗന്‍ സ്‌പേസ്‌ക്രാഫ്റ്റായ എന്‍ഡീവറിന്‍റെ ഭൂമിയിലേക്കുളള മടക്കയാത്ര. ഡിഓര്‍ബിറ്റിങ് ഘട്ടം കഴിഞ്ഞ് ഭൂമിയുടെ അന്തരീക്ഷത്തിലേക്ക് പ്രവേശിക്കുന്ന ബഹിരാകാശ പേടകത്തില്‍ നിന്ന് രണ്ട് ഘട്ടങ്ങളിലായി പാരച്യൂട്ടിലായിരിക്കും ബഹിരാകാശ യാത്രികര്‍ മെക്‌സിന്‍ തീരമായ ടാംപയില്‍ വന്നിറങ്ങുക.

ആറ് മാസക്കാലം നീളുന്ന ദൗത്യത്തിനായി മാര്‍ച്ച് മൂന്നിനാണ് സുല്‍ത്താന്‍ അല്‍ നിയാദി ബഹിരാകാശ നിലയത്തിലേക്ക് പോയത്. ഡോ അൽ നിയാദി ബഹിരാകാശത്തെ രണ്ടാമത്തെ എമിറാത്തിയും ആദ്യത്തെ അറബ് ബഹിരാകാശ സഞ്ചാരി എന്ന ബഹുമതിയും സ്വന്തമാക്കി. ബഹിരാകാശ നിലയത്തില്‍ ഏറ്റവും കൂടുതല്‍ കാലം ചെലവഴിച്ച അറബ് വംശജന്‍ എന്ന നേട്ടം കൂടി സ്വന്തമാക്കിയാണ് സുല്‍ത്താന്‍ അല്‍ നിയാദി ഭൂമിയിലേക്കുള്ള മടങ്ങി വരുന്നത്. ബഹിരാകാശത്ത് ഏഴ് മണിക്കൂര്‍ നടന്നതിന്റെ ചരിത്രവും നെയാദിയുടെ പേരില്‍ ഏഴുതി ചേര്‍ക്കപ്പെട്ടിട്ടുണ്ട്.