സൗദി: വിമാനത്തില്‍ കയറിയ രണ്ട് വയസുള്ള കുഞ്ഞിന് സീറ്റ് നൽകിയില്ലെന്ന് പരാതി. കോഴിക്കോട്- ജിദ്ദ സ്പൈസ് ജെറ്റ് വിമാനത്തിൽ കയറിയ യുവതിയാണ് പരാതിയുമായി രംഗത്തെത്തിയിരിക്കുന്നത്. യാത്രക്കാരി ബന്ധപ്പെട്ടവര്‍ക്ക് പരാതി നൽകി. സെപ്തംബര്‍ 12നു കോഴിക്കോട് നിന്നും ജിദ്ദയിലേക്ക് സര്‍വീസ് നടത്തിയ സ്പൈസ് ജെറ്റിന്‍റെ എസ്.ജി 35 വിമാനത്തിലാണ് തനിക്ക് ഈ അനുഭവം ഉണ്ടായതെന്ന് യുവതി പരാതിയിൽ പറയുന്നു.
ഉംറ വിസയില്‍ ഉമ്മയോടൊപ്പം ആണ് ഇവർ കോഴിക്കോട് നിന്നും ജിദ്ദയിലേക്ക് പുറപ്പെട്ടത്. സൈഹ എന്ന രണ്ട് വയസുകാരിക്ക് വിമാന അധികൃതർ സീറ്റ് നിഷേധിച്ചത്. രണ്ട് വയസ് കഴിഞ്ഞതിനാൽ സീറ്റ് തുക ഈടാക്കുകയും, ബോര്‍ഡിങ് പാസില്‍ സീറ്റ് നമ്പര്‍ രേഖപ്പെടുത്തുകയും ചെയ്തിരുന്നു. എന്നാൽ നിശ്ചിത സീറ്റില്‍ കുട്ടിയെ ഇരുത്താന്‍ ജീവനക്കാര്‍ അനുവദിച്ചില്ല. ഇരുത്തിയ സീറ്റിൽ നിന്ന് കുട്ടിയെ എടുക്കാൻ ജീവനക്കാർ ആവശ്യപ്പെടുകയായിരുന്നു.
ബോര്‍ഡിങ് പാസ് കാണിച്ച് സീറ്റ് വേണം എന്ന് യുവതി ആവശ്യപ്പെട്ടു. എന്നാൽ കുട്ടിയെ സീറ്റിൽ ഇരുത്തിയാൽ മതിയെന്നായിരുന്നു വിമാന ജീവനക്കാർ പറഞ്ഞത്. കുട്ടിക്ക് സീറ്റിന് അര്‍ഹതയുണ്ടെന്നും സീറ്റില്‍ ഇരിക്കാന്‍ കുട്ടിക്ക് പ്രയാസമില്ലെന്നും അറിയിച്ചിട്ടും ജീവനക്കാര്‍ ഇക്കാര്യം പരിഗണിച്ചില്ലെന്ന് കുട്ടിയുടെ മാതാവ് നൽകിയ പരാതിയിൽ പറയുന്നു.
പ്രമുഖ ട്രാവല്‍ ഏജന്‍സി വഴിയാണ് ഇവർ ഉംറക്കായി ബുക്ക് ചെയ്തിരിക്കുന്നത്. വിമാനം ടേക്ക് ഓഫ് ചെയ്യുമ്പോഴും ലാന്‍ഡ് ചെയ്യുമ്പോഴും ഉള്‍പ്പെടെ കുട്ടിയെ മടിയില്‍ ഇരുത്തിയാണ് യാത്ര ചെയ്തത്. വീഡിയോയും ഫോട്ടോയും ഉള്‍പ്പെടെ ഇവർ സ്പൈസ് ജെറ്റിന് പരാതി നൽകി. പരാതിയുടെ കോപ്പി സൗദി സിവില്‍ ഏവിയേഷന്‍ അതോറിറ്റിക്കും അയച്ചിട്ടുണ്ട്. ടിക്കറ്റ് നിരക്ക് റീഫണ്ട് ചെയ്യണം എന്നാണ് പരാതിക്കാരി ആവശ്യപ്പെടുന്നത്. പണം നൽകി സീറ്റ് ബുക്ക് ചെയ്തിട്ടും സീറ്റ് നൽകാതെ ഇരിക്കുമ്പോൾ പരാതിയുമായി യാത്രക്കാർ മുന്നോട്ട് വരണം എന്നാണ് പൊതുപ്രവര്‍ത്തകരും ഈ മേഖലയില്‍ സേവനം ചെയ്യുന്നവരും പറയുന്നത്.
