ന്യൂഡ‍ൽഹി: കാനഡയിൽ നടക്കുന്ന ഇന്ത്യാ വിരുദ്ധ നീക്കങ്ങളിൽ കനേഡിയൻ പ്രധാനമന്ത്രി ജസ്റ്റിൻ ട്രൂഡോയോട് ആശങ്ക അറിയിച്ച് പ്രധാനമന്ത്രി നരേന്ദ്ര മോദി. ജി 20 ഉച്ചകോടിക്കിടെ നടന്ന യോഗത്തിലാണ് ഇരുവരും തമ്മിൽ കൂടിക്കാഴ്ച നടത്തിയത്.
പ്രധാനമന്ത്രി നരേന്ദ്രമോദി കനേഡിയൻ പ്രധാനമന്ത്രി ജസ്റ്റിൻ ട്രൂഡോയുമായി ഭീകരവാദം ഉൾപ്പെടെയുളള വിവിധ വിഷയങ്ങൾ ചർച്ച ചെയ്‌തതായി പ്രധാനമന്ത്രിയുടെ ഓഫീസ് തന്നെയാണ് മാധ്യമങ്ങളെ അറിയിച്ചത്. ഇന്ത്യയോടൊപ്പം ചേർന്ന് ഖലിസ്ഥാൻ ഭീകരവാദത്തിനെതിരായി പ്രവർത്തിക്കുമെന്നും ട്രൂഡോ ഉറപ്പുനൽകിയതായും വ്യക്തമാക്കി.
‘കാനഡയിലെ ഭീകരവാദ ഘടകങ്ങളുടെ ഇന്ത്യാ വിരുദ്ധ പ്രവർത്തനങ്ങൾ തുടരുന്നതിനെക്കുറിച്ച് പ്രധാനമന്ത്രി മോദി ആശങ്കകൾ അറിയിച്ചു. അവർ വിഘടനവാദം പ്രോത്സാഹിപ്പിക്കുകയും ഇന്ത്യൻ നയതന്ത്രജ്ഞർക്ക് നേരെ അക്രമങ്ങൾകക്ക് പ്രേരിപ്പിക്കുകയും നയതന്ത്ര സ്ഥാപനങ്ങൾക്ക് നേരെ ആക്രമണങ്ങൾ നടത്തുകയും കാനഡയിലെ ഇന്ത്യൻ സമൂഹത്തെയും അവരുടെ ആരാധനാലയങ്ങൾക്കും നേരെ ഭീഷണി ഉയർത്തുകയും ചെയ്യുന്നു.’ പ്രധാനമന്ത്രിയുടെ ഓഫീസ് പറഞ്ഞു.
‘ഇന്ത്യ-കാനഡ ബന്ധം ജനാധിപത്യ മൂല്യങ്ങൾ, നിയമവാഴ്ചയോടുള്ള ബഹുമാനം, ജനങ്ങൾ തമ്മിലുള്ള ശക്തമായ ബന്ധങ്ങൾ എന്നിവയിൽ ഊന്നിയതാണെന്നും പ്രധാനമന്ത്രി ചൂണ്ടിക്കാട്ടി,’ പിഎംഒ വ്യക്തമാക്കി. അതേസമയം, കാനഡയിലെ ഇന്ത്യ വിരുദ്ധ പ്രവർത്തനങ്ങൾ സംബന്ധിച്ച്, സംഘടിത കുറ്റകൃത്യങ്ങൾ, മയക്കുമരുന്ന് സംഘങ്ങൾ, മനുഷ്യക്കടത്ത് എന്നിവയുമായി മുന്നോട്ട് പോകുന്ന ഈ ഭീകരവാദ ശക്തികളുടെ ബന്ധം കാനഡയെ സംബന്ധിച്ചിടത്തോളം ആശങ്കാജനകമാണെന്ന് പ്രധാനമന്ത്രി കൂട്ടിച്ചേർത്തു.
കാനഡ പ്രവാസി സിഖുകാരുടെ പ്രിയപ്പെട്ട കേന്ദ്രങ്ങളിലൊന്നാണ്, ഏതാനും വർഷങ്ങളായി ഖലിസ്ഥാൻ ഭീകരവാദത്തിന്റെ വേരുകൾ ഇവിടെ ഉയർന്നുവന്നിരുന്നു. ഇതിന്റെ പേരിൽ ഏതാനും നാളുകളായി വാർത്തകളിൽ ഇടംപിടിക്കുകയും ചെയ്തിട്ടുണ്ട്.
ഖലിസ്ഥാൻ വാദികളുടെ നിരന്തരമായ പ്രതിഷേധങ്ങളും ഇന്ത്യാവിരുദ്ധ പ്രകടനങ്ങൾക്കും കാനഡ വേദിയാകുന്നതിൽ ഇന്ത്യ ശക്തമായി പ്രതികരിച്ചിരുന്നു. ഈ അവസരത്തിൽ കൂടിയാണ് ഖലിസ്ഥാൻ ഭീകരരുമായി കനേഡിയൻ ജനതയ്‌ക്ക് പങ്കില്ലെന്നും ഭീകരവാദ പ്രവർത്തനങ്ങൾ തടയാൻ ഇന്ത്യക്കൊപ്പം നിൽക്കുമെന്നും കാനേഡിയൻ പ്രധാനമന്ത്രി വ്യക്തമാക്കിയത്.
പ്രധാനമന്ത്രി നരേന്ദ്രമോദിയുമായി നടത്തിയ കൂടിക്കാഴ്ചയിൽ ഖലിസ്ഥാൻ ഭീകരവാദത്തെയും വിദേശ ഇടപെടലിനെയും കുറിച്ചാണ് സംസാരിച്ചത്. അഭിപ്രായ സ്വതന്ത്ര്യത്തിനും സമാധാനപരമായ പ്രതിഷേധത്തിനും അവസരം നൽകുന്ന രാജ്യമാണ് കാനഡ. അതേസമയം, ഇതിന്റെ പേരിൽ നടക്കുന്ന അക്രമങ്ങൾക്കും വിദ്വേഷങ്ങൾക്കും ഞങ്ങൾ എതിരാണ്. ഖലിസ്ഥാൻ ഭീകരവാദത്തിനെതിരെ ഇന്ത്യയോടൊപ്പം ചേർന്ന് പ്രവർത്തിക്കും- ജസ്റ്റിൻ ട്രൂഡോ പ്രതികരിച്ചു.
