ക്രിസ്റ്റ്യാനോയ്ക്ക് ‘പണി’ കൊടുത്ത പരിശീലകന് കഷ്ടകാലം തുടരുന്നു; പുതിയ ടീമും പുറത്താക്കാൻ പോകുന്നു

പോർച്ചുഗൽ സൂപ്പർ താരം ക്രിസ്റ്റ്യാനോ റൊണാൾഡോയെ ( Cristiano Ronaldo ) സൈഡ് ബെഞ്ചിലിരുത്തി ഫിഫ ലോകകപ്പ് ( FIFA World Cup ) ഫുട്‌ബോളിൽ ടീമിനെ ഇറക്കാൻ ധൈര്യം ആരെങ്കിലും കാണിക്കുമോ ? 2022 ഖത്തർ ലോകകപ്പിലായിരുന്നു ( 2022 Qatar World Cup ) ക്രിസ്റ്റ്യാനോ റൊണാൾഡോയെ പോർച്ചുഗൽ സൈഡ് ബെഞ്ചിലിരുത്തിയത് ആരാധകർ അതുവരെ കണ്ടിട്ടില്ലാത്ത ഒരു സബ് ബെഞ്ചായിരുന്നു അന്നത്തേത്.

പോർച്ചുഗൽ മുഖ്യ പരിശീലകനായിരുന്ന ഫെർണാണ്ടോ സാന്റോസായിരുന്നു ( Fernando Santos ) ക്രിസ്റ്റ്യാനോ റൊണാൾഡോയെ സൈഡ് ബെഞ്ചിലിരുത്താൻ ധൈര്യം കാണിച്ചത്. 2016 ൽ യുവേഫ യൂറോ കപ്പും ( UEFA Euro Cup ) 2019 ൽ യുവേഫ നേഷൻസ് ലീഗും ( UEFA Nations League ) പോർച്ചുഗലിനു സമ്മാനിച്ച പരിശീലകനായിരുന്നു ഫെർണാണ്ടോ സാന്റോസ്. അതുകൊണ്ടുതന്നെ ദേഷ്യത്തിലായിരുന്നുവെങ്കിലും ഖത്തർ ലോകകപ്പിൽ സബ്സ്റ്റിറ്റ്യൂഷൻ ബെഞ്ചിൽ ഇരിക്കേണ്ടിവന്നതിൽ ക്രിസ്റ്റ്യാനോ റൊണാൾഡോ പ്രത്യക്ഷത്തിൽ അതൃപ്തി പ്രകടിപ്പിച്ചില്ലായിരുന്നു. എന്നാൽ, ക്രിസ്റ്റ്യാനോ റൊണാൾഡോയുടെ പങ്കാളി ജോർജിന റോഡ്രിഗസ് അതി ശക്തമായ വിമർശനം ഫെർണാണ്ടോ സാന്റോസിനെതിരേ ഉന്നയിച്ചിരുന്നു.

ഫിഫ ഖത്തർ ലോകകപ്പ് ഗ്രൂപ്പ് ഘട്ടത്തിലെ അവസാന മത്സരത്തിൽ ദക്ഷിണ കൊറിയയ്‌ക്കെതിരേ ക്രിസ്റ്റ്യാനോ റൊണാൾഡോയെ മൈതാനത്തു നിന്ന് പിൻവലിച്ചതിൽ താരം പ്രതിഷേധം പ്രകടിപ്പിച്ചിരുന്നു. എന്നാൽ, അതിനുള്ള പ്രതികാരമായിരുന്നു പ്രീ ക്വാർട്ടറിൽ ക്രിസ്റ്റ്യാനോ റൊണാൾഡോയെ സൈഡ് ബെഞ്ചിലിരുത്തി പോർച്ചുഗൽ സ്റ്റാർട്ടിങ് ഇലവനെ ഫെർണാണ്ടോ സാന്റോസ് ഇറക്കിയത്. മത്സരത്തിൽ പോർച്ചുഗൽ 6 – 1 ന് സ്വിറ്റ്‌സർലൻഡിനെ കീഴടക്കി.

ക്രിസ്റ്റ്യാനോ റൊണാൾഡോയെ സ്റ്റാർട്ടിങ് ഇലവനിൽ ഇറക്കാതിരുന്നതിൽ ആരാധകർ പ്രതിഷേധിച്ചെങ്കിലും പോർച്ചുഗൽ പ്രീ ക്വാർട്ടർ പോരാട്ടം മികച്ച രീതിയിൽ ജയിച്ചത് വിമർശനത്തിന്റെ കാഠിന്യം കുറച്ചു. എന്നാൽ, ക്വാർട്ടർ ഫൈനലിൽ മൊറോക്കോയ്ക്ക് എതിരേയും ഫെർണാണ്ടോ സാന്റോസ് ക്രിസ്റ്റ്യാനോ റൊണാൾഡോയെ സ്റ്റാർട്ടിങ് ഇലവനിൽ ഉൾപ്പെടുത്തിയില്ല. ഫിഫ ലോകകപ്പ് ചരിത്രത്തിൽ പോർച്ചുഗലിന്റെ ഏറ്റവും വലിയ മണ്ടത്തരമായിരുന്നു മൊറോക്കോയ്ക്ക് എതിരെ ക്രിസ്റ്റ്യാനോ റൊണാൾഡോയെ സൈഡ് ബെഞ്ചിലിരുത്തിയത്. ക്വാർട്ടർ ഫൈനലിൽ മൊറോക്കോ 1 – 0 ന് പോർച്ചുഗലിനെ കീഴടക്കി. 42 -ാം മിനിറ്റിലായിരുന്നു മൊറോക്കോയുടെ വിജയം കുറിച്ച ഗോൾ പിറന്നത്. 51 -ാം മിനിറ്റിൽ മാത്രമാണ് മൊറോക്കോയ്ക്ക് എതിരെ ക്രിസ്റ്റ്യാനോ റൊണാൾഡോയെ ഫെർണാണ്ടോ സാന്റോസ് കളത്തിൽ ഇറക്കിയത്.

ഏതായാലും ഖത്തർ ലോകകപ്പിന്റെ പിന്നാലെ ഫെർണാണ്ടോ സാന്റോസിനെ പോർച്ചുഗൽ മുഖ്യ പരിശീലക സ്ഥാനത്തുനിന്ന് പുറത്താക്കി. 2014 മുതൽ 2022 വരെ നീണ്ട പോർച്ചുഗൽ മുഖ്യ പരിശീലക കരിയറിൽ 109 മത്സരങ്ങളിൽ ടീമിനെ ഫെർണാണ്ടോ സാന്റോസ് അണിയിച്ചൊരുക്കി. 67 ജയം നേടി, 23 സമനിലയും. 61.47 ശതമാനം ആയിരുന്നു പോർച്ചുഗൽ പരിശീലകനായി ഫെർണാണ്ടോ സാന്റോസിന്റെ പ്രകടനം.

2022 ഡിസംബർ 15 ന് പോർച്ചുഗൽ പരിശീലക സ്ഥാനത്തുനിന്ന് പുറത്താക്കപ്പെട്ട ഫെർണാണ്ടോ സാന്റോസ് 2023 ജനുവരി 24 ന് പോളണ്ടിന്റെ മാനേജർ സ്ഥാനത്ത് എത്തി. എന്നാൽ, പോളണ്ടിന്റെ മുഖ്യ പരിശീലക സ്ഥാനത്തുനിന്ന് ഫെർണാണ്ടോ സാന്റോസ് പുറത്താകുന്നതിന് വക്കിലാണ്. 2024 യുവേഫ യൂറോ കപ്പ് ഫുട്‌ബോൾ ഗ്രൂപ്പ് ഘട്ടത്തിൽ അൽബേനിയയ്ക്ക് എതിരേ എവേ പോരാട്ടത്തിൽ 2 – 0 ന് പോളണ്ട് പരാജയപ്പെട്ടതോടെയാണ് ഫെർണാണ്ടോ സാന്റോസിന്റെ തൊപ്പി തെറിക്കാനുള്ള ‌സാധ്യത വർധിച്ചത്.