അബുദാബി: ഇന്ത്യന്‍ പ്രധാനമന്ത്രി നരേന്ദ്ര മോദിക്ക് യുഎഇ തലസ്ഥാന നഗരിയില്‍ ഒരുക്കുന്ന ‘അഹ്‌ലന്‍ മോദി’ (മോദിക്ക് സ്വാഗതം) പരിപാടിക്കുള്ള ഒരുക്കങ്ങള്‍ തുടങ്ങി. ഫെബ്രുവരി 13ന് അബുദാബിയിലെ ഷെയ്ഖ് സായിദ് സ്പോര്‍ട്സ് സിറ്റി സ്റ്റേഡിയത്തില്‍ നടക്കുന്ന സ്വീകരണ ചടങ്ങ് പ്രവാസി ഇന്ത്യന്‍ സമൂഹത്തിന്റെ ചരിത്രത്തിലെ ഏറ്റവും വലിയ സമ്മേളനമായി മാറ്റാനുള്ള തയ്യാറെടുപ്പിലാണ് സംഘാടകര്‍.
നൂറ്റാണ്ടുകള്‍ പിന്നിട്ട ഇന്ത്യ-യുഎഇ സൗഹൃദവും ഇന്ത്യയുടെ സമ്പന്നമായ സാംസ്‌കാരിക വൈവിധ്യങ്ങളും അനാവരണം ചെയ്യുന്ന പരിപാടികള്‍ ഇതോടനുബന്ധിച്ച് നടക്കും. 400-ലധികം പ്രാദേശിക പ്രതിഭകള്‍ ആകര്‍ഷകമായ പ്രകടനങ്ങള്‍ അവതരിപ്പിക്കും. യുഎഇയിലെ പ്രവാസി ഇന്ത്യന്‍ സമൂഹത്തിന് കഴിഞ്ഞ ദശകത്തില്‍ ഇന്ത്യന്‍ കൈവരിച്ച നേട്ടങ്ങള്‍ മനസിലാക്കുന്നതിനും ആഗോള നേതാവെന്ന നിലയില്‍ ഇന്ത്യയുടെ ഭാവിയെക്കുറിച്ചുള്ള പ്രധാനമന്ത്രി മോദിയുടെ കാഴ്ചപ്പാട് സ്വീകരിക്കുന്നതിനുമുള്ള സുപ്രധാന അവസരമാണിതെന്ന് സംഘാടകര്‍ പത്രക്കുറിപ്പില്‍ പറഞ്ഞു.
യുഎഇയിലെ 150-ലധികം പ്രവാസി ഇന്ത്യന്‍ സംഘടനകളുടെ സഹകരണത്തോടെയാണ് മെഗാ ഇവന്റ് ഒരുക്കുന്നത്. ദുബായിലെ ഇന്ത്യാ ക്ലബ്ബില്‍ ഈ സംഘടനാ പ്രതിനിധികള്‍ യോഗം ചേരുകയും പരിപാടിയുടെ ആസൂത്രണത്തിനും നടത്തിപ്പിനുമായി വിവിധ സന്നദ്ധ സമിതികള്‍ രൂപീകരിക്കുകയും ചെയ്തിരുന്നു.
സാംസ്‌കാരികവും ഭാഷാപരവുമായ വൈവിധ്യമാര്‍ന്ന പശ്ചാത്തലത്തില്‍ നിന്നുള്ള ഇന്ത്യന്‍ പ്രവാസികള്‍ക്കിടയില്‍ ഐക്യവും ആശയവിനിമയവും പ്രോത്സാഹിപ്പിക്കുന്നതിന് കൂടി ഉപകരിക്കുന്ന വിധത്തിലാണ് പരിപാടി ആസൂത്രണം ചെയ്തിരിക്കുന്നത്. ഇന്ത്യയും യുഎഇയും തമ്മിലുള്ള അടുത്ത ബന്ധത്തെ അനുസ്മരിക്കുന്ന ചടങ്ങ്, ഇന്ത്യന്‍ സമൂഹത്തിന് നരേന്ദ്ര മോദിയുമായി ഇടപഴകാനുള്ള അസാധാരണമായ അവസരമാണെന്നും സംഘാടകര്‍ വിശദീകരിച്ചു.
അബുദാബിയിലെ ആദ്യത്തെ പരമ്പരാഗത ഹിന്ദു ശിലാക്ഷേത്രം ഉദ്ഘാടനം ചെയ്യാനാണ് നരേന്ദ്ര മോദി എത്തുന്നത്. ഷെയ്ഖ് സായിദ് സ്പോര്‍ട്സ് സിറ്റി സ്റ്റേഡിയത്തിലെ സ്വീകരണ പരിപാടിക്ക് തൊട്ടടുത്ത ദിവസം ഫെബ്രുവരി 14നാണ് ഏറെ പ്രതീക്ഷയോടെ കാത്തിരിക്കുന്ന ബിഎപിഎസ് ഹിന്ദു മന്ദിറിന്റെ ഉദ്ഘാടനം.
ഫെബ്രുവരി 14ന് രാവിലെ ക്ഷേത്രത്തില്‍ മതപരമായ ചടങ്ങ് നടക്കും. സായാഹ്ന സമര്‍പ്പണ ചടങ്ങിലാണ് പ്രധാനമന്ത്രി പങ്കെടുക്കുക. നരേന്ദ്ര മോദിയുടെ ഏഴാമത് യുഎഇ സന്ദര്‍ശനമാണിത്. പൊതുജനങ്ങള്‍ക്ക് ക്ഷേത്ര ഉദ്ഘാടന ചടങ്ങില്‍ പ്രവേശനമുണ്ടാവില്ല. ഫെബ്രുവരി 18 മുതലാണ് പൊതുജനങ്ങള്‍ക്ക് പ്രവേശനം. 2015ല്‍ മോദിയുടെ സന്ദര്‍ശന വേളയിലാണ് ദുബായ്-അബുദാബി ഹൈവേയിലെ അബു മുറൈഖയില്‍ ക്ഷേത്രം നിര്‍മിക്കാന്‍ 27 ഏക്കര്‍ സ്ഥലം അനുവദിച്ചത്.
