ജിദ്ദ: ലോകഫുട്‌ബോളിലെ വിണ്‍താരങ്ങള്‍ സൗദിയുടെ മണ്ണിലിറങ്ങി പുല്‍മൈതാനങ്ങള്‍ക്ക് തീപടര്‍ത്താനെത്തുന്നത് തുടരുന്നു. പോര്‍ച്ചുഗലിന്റെ പടക്കുതിര ക്രിസ്റ്റിയാനോ റൊണാള്‍ഡോയുടെ വരവോടെ അന്താരാഷ്ട്ര തലത്തില്‍ ശ്രദ്ധിക്കപ്പെട്ട സൗദി ക്ലബ് ഫുട്‌ബോള്‍ ലീഗിന് ആനച്ചന്തം പകരാന്‍ ഇനി ബ്രസീലിയന്‍ സൂപ്പര്‍ താരം നെയ്മറും നെറ്റിപ്പട്ടം ചാര്‍ത്തും. അല്‍ ഹിലാല്‍ ഹോം മല്‍സരത്തില്‍ അല്‍ ഫൈഹയുമായി കൊമ്പുകോര്‍ക്കുന്ന അടുത്ത ശനിയാഴ്ച നെയ്മറിന്റെ പട്ടാഭിഷേകമാണെന്ന് അല്‍ ഹിലാല്‍ ഔദ്യോഗികമായി പ്രഖ്യാപിച്ചു.
നാല് തവണ ഏഷ്യന്‍ ചാമ്പ്യന്‍മാരാണ് സൗദി അല്‍ഹിലാല്‍. 66 ട്രോഫികളുമായി സൗദിയിലും ഏഷ്യയിലും ഏറ്റവും കൂടുതല്‍ കിരീടനേട്ടങ്ങള്‍ അലങ്കരിച്ച ക്ലബ്ബാണ്. ഞായറാഴ്ച പാരിസില്‍ മെഡിക്കല്‍ ടെസ്റ്റ് പൂര്‍ത്തിയാക്കിയ നെയ്മര്‍ ഇന്ന് സൗദിയിലെത്തും. അടുത്ത ശനിയാഴ്ച അല്‍ ഹിലാലിന്റെ ജഴ്‌സിയില്‍ പന്തുതട്ടുമെന്ന് ക്ലബ് അധികൃതര്‍ സ്ഥിരീകരിച്ചു. നെയ്മറിന്റെ ട്രാന്‍സഫര്‍ വാര്‍ത്തകളോട് പിഎസ്ജി ഇതുവരെ പ്രതികരിച്ചിട്ടില്ല.
നെയ്മറിന്റെ വരവ് സൗദിയിലെ പ്രവാസി മലയാളി ഫുട്‌ബോള്‍ ആരാധകരെയും ആവേശത്തിന്റെ കൊടുമുടിയിലേക്ക് ഉയര്‍ത്തിയിട്ടുണ്ട്. 2018 ഒക്ടോബറില്‍ നെയ്മര്‍ ജിദ്ദയിലെത്തിയപ്പോള്‍ കിങ് അബ്ദുല്ല സ്‌പോര്‍ട്‌സ് സിറ്റി സ്‌റ്റേഡിയം മലയാളികള്‍ കൈയടക്കിയിരുന്നു. നെയ്മറുടെ കളി നേരില്‍ കാണാന്‍ കഴിഞ്ഞതിന്റെ ആഹ്ലാദനിമിഷങ്ങള്‍. പ്രതിഭയുടെ മിന്നലാട്ടം വിളിച്ചോതുന്ന സുന്ദരമുഹൂര്‍ത്തങ്ങള്‍ സമ്മാനിച്ച് താരവും വിരുന്നൊരുക്കി. ആര്‍പ്പുവിളികളും ബാനറുകളും പോസ്റ്ററുകളുമായി മഞ്ഞയണിഞ്ഞ് ബ്രസീല്‍ ആരാധകരും മറുവശത്ത് വിഖ്യാതമായ അര്‍ജന്റീനയുടെ ജഴ്‌സിയില്‍ ആരാധകരും ഇടംപിടിച്ചപ്പോള്‍ ബ്രസീല്‍-അര്‍ജന്റീന മല്‍സരം ആഘോഷമായി.
സൗദിയിലെ ഫുട്‌ബോള്‍ ആരാധകര്‍ നെയ്മറിനെ പരമ്പരാഗത അറബ് വേഷത്തില്‍ തലപ്പാവും ഇഖാലും അണിയിച്ച് ചിത്രങ്ങള്‍ പങ്കുവച്ച് സ്വാഗതംചെയ്തപ്പോള്‍ നെയ്മറെ പ്രവാസജീവിതത്തിലേക്ക് സ്വാഗതംചെയ്യുന്ന ട്രോളുകളുമായാണ് മലയാളികള്‍ സമൂഹമാധ്യമങ്ങളില്‍ എതിരേല്‍ക്കുന്നത്.
ഏതാനും ദിവസം മുമ്പ് അല്‍ഹിലാലിന്റെ താരനിരയിലേക്ക് സെര്‍ബിയന്‍ മിഡ്ഫീല്‍ഡര്‍ മിലിങ്കോവിച്ച് സാവികും ചേര്‍ന്നിരുന്നു. 2026വരെ ക്ലബ്ബില്‍ തുടരും. നെയ്മര്‍ എത്തുന്നതോടെ ടീം കൂടുതല്‍ കരുത്തരായി മാറും. പോര്‍ച്ചുഗല്‍ മിഡ്ഫീല്‍ഡര്‍ റൂബന്‍ നെവ്‌സ്, ആന്ദ്രെ കാരിലോ, സെനഗല്‍ ഡിഫന്‍ഡര്‍ കലിഡൗ കൗലിബാലി എന്നിവരടങ്ങിയ അല്‍ഹിലാലിന്റെ താരനിരയിലെ ഏറ്റവും പുതിയ കൂട്ടിച്ചേര്‍ക്കലാണ് നെയ്മര്‍.
ക്രിസ്റ്റ്യാനോയെ അല്‍ നസ്ര്‍ കളത്തിലിറക്കിയപ്പോള്‍ ബദ്ധവൈരികളായ അല്‍ ഹിലാല്‍ ലയണല്‍ മെസ്സി, കിലിയന്‍ എംബാപ്പെ എന്നിവരില്‍ ഒരാളെ എത്തിക്കാന്‍ എല്ലാവിധ നീക്കങ്ങളും നടത്തിയിരുന്നു. ഇത് പരാജയപ്പെട്ട അല്‍ ഹിലാലിന് നെയ്മറിന്റെ സാന്നിധ്യം ഈര്‍ജം പകരുമെന്നുറപ്പാണ്. മുന്‍ ക്ലബ്ബായ ബാഴ്‌സലോണയിലേക്ക് തിരിച്ചുപോകണമെന്ന് നെയ്മറിന് ആഗ്രഹമുണ്ടായിരുന്നെങ്കിലും വലിയ ഓഫര്‍ നല്‍കി അല്‍ ഹിലാല്‍ സ്വന്തംപാളയത്തിലെത്തിക്കുകയായിരുന്നു. 17.5 കോടി ഡോളറിന്റെ രണ്ടു വര്‍ഷത്തെ ഓഫര്‍ പിഎസ്ജി സ്വീകരിക്കുകയും ചെയ്തു.
കഴിഞ്ഞ ജനുവരിയില്‍ ക്രിസ്റ്റ്യാനോ റൊണാള്‍ഡോ അല്‍നസ്‌റിലേക്ക് മാറിയത് മുതല്‍ സൗദി പ്രൊഫഷണല്‍ ലീഗ് കൂടുതല്‍ അന്താരാഷ്ട്ര താരങ്ങളെ ആകര്‍ഷിക്കുന്നുണ്ട്. ബാലണ്‍ ഡി ഓര്‍ ജേതാവ് കരിം ബെന്‍സെമയെയും മുന്‍ ചെല്‍സി മിഡ്ഫീല്‍ഡര്‍ എന്‍ഗോലോ കാന്റെയെയും സൗദി ലീഗ് ചാമ്പ്യന്‍മാരായ അല്‍ഇത്തിഹാദ് സ്വന്തംപാളയത്തിലെത്തിച്ചു. ഇന്റര്‍ മിലാന്റെ ക്രൊയേഷ്യന്‍ മിഡ്ഫീല്‍ഡര്‍ മാര്‍സെലോ ബ്രോസോവിച്ച് അല്‍നസ്‌റിലും ചേര്‍ന്നു.
മുന്‍ ഇംഗ്ലണ്ട് ക്യാപ്റ്റന്‍ സ്റ്റീവന്‍ ജെറാര്‍ഡും ഇപ്പോള്‍ സൗദി സോക്കറിന്റെ ഭാഗമാണ്. ലിവര്‍പൂളിലെ 2005ല്‍ ചാംപ്യന്‍സ് ലീഗ് കിരീടം ചൂടിച്ച ജെറാര്‍ഡ് അല്‍ ഇത്തിഫാഖിന്റെ പരിശീലകനാണ്. സൗദി ലീഗ് ചാംപ്യന്‍ാരായ അല്‍ ഇത്തിഹാദുമായാണ് ജോട കരാറുണ്ടാക്കിയത്. ലിവര്‍പൂള്‍ താരമായിരുന്ന റോബി ഫൗളര്‍ സൗദിയിലെ രണ്ടാം ഡിവിഷന്‍ ക്ലബ്ബായ അല്‍ ഖാദിസിയയുടെ കോച്ചാണ്.
സൗദി പ്രൊഫഷണല്‍ ലീഗിനെ ശക്തിപ്പെടുത്തുന്നതിന്റെ ഭാഗമായി രാജ്യത്തെ പ്രമുഖ ക്ലബ്ബുകളുടെ 75 ശതമാനം ഓഹരികള്‍ സൗദി പബ്ലിക് ഇന്‍വെസ്റ്റ്‌മെന്റ് ഫണ്ട് (പിഐഎഫ്) ഏറ്റെടുത്തിരുന്നു. തുടര്‍ന്ന് അല്‍ഹിലാല്‍, അല്‍ഇത്തിഹാദ്, അല്‍നസ്ര്‍, അല്‍അഹ്‌ലി എന്നീ നാല് പ്രമുഖ ക്ലബ്ബുകളുടെ ഡയറക്ടര്‍ ബോര്‍ഡ് പുനഃസംഘടിപ്പിക്കുകയും ചെയ്തു. കായികരംഗത്ത് നിക്ഷേപം നടത്താന്‍ പൊതുമേഖലാ സ്ഥാപനങ്ങളെ പ്രോത്സാഹിപ്പിക്കുന്ന നയത്തിന്റെ ഭാഗമായാണിത്. ഇംഗ്ലീഷ് പ്രീമിയര്‍ ലീഗ് ക്ലബ്ബായ ന്യൂകാസിലിന്റെ ഉടമസ്ഥരാണ് സൗദി പബ്ലിക് ഇന്‍വെസ്റ്റ്‌മെന്റ് ഫണ്ട്. ലോകത്തിലെ ഏറ്റവും മികച്ച കളിക്കാരെ ആകര്‍ഷിക്കാനുള്ള സൗദി അറേബ്യയുടെ ശ്രമം തുടരുമെന്നാണ് ഇത് വ്യക്തമാക്കുന്നത്.
