നേപ്പാളിനെ പത്ത് വിക്കറ്റിന് തകർത്തു; ആദ്യ വിജയത്തോടെ ഇന്ത്യ സൂപ്പര്‍ ഫോറിലേക്ക്

കൊളംബോ: ഏഷ്യാകപ്പില്‍ ഇന്ത്യക്ക് ആദ്യ വിജയം. നേപ്പാളിനെതിരെ പത്ത് വിക്കറ്റിന്റെ തകര്‍പ്പന്‍ വിജയമാണ് ഇന്ത്യ നേടിയത്. മഴ കാരണം ഓവര്‍ വെട്ടിച്ചുരുക്കിയ മത്സരത്തില്‍ 23 ഓവറിന് 145 റണ്‍സെന്ന വിജയലക്ഷ്യം ഇന്ത്യ അനായാസം മറികടന്നു. വിക്കറ്റുകളൊന്നും നഷ്ടപ്പെടാതെ 20-ാം ഓവറില്‍ തന്നെ ഇന്ത്യ ലക്ഷ്യത്തിലെത്തി. വിജയത്തോടെ സൂപ്പര്‍ ഫോറിലേക്ക് കടക്കാന്‍ ഇന്ത്യക്ക് സാധിച്ചു. ഗ്രൂപ്പ് എയില്‍ നിന്ന് പാകിസ്താന് പിന്നാലെ ഇന്ത്യയും പ്ലേഓഫിലെത്തിയതോടെ ഏഷ്യാ കപ്പില്‍ മറ്റൊരു ഇന്ത്യ-പാക് പോരാട്ടം കൂടി ഉറപ്പായിരിക്കുകയാണ്.

നേപ്പാള്‍ ഉയര്‍ത്തിയ 231 റണ്‍സെന്ന വിജയലക്ഷ്യത്തിലേക്കായിരുന്നു ഇന്ത്യ ബാറ്റുവീശാനിറങ്ങിയത്. രണ്ടാം ഓവറില്‍ ഓപ്പണര്‍മാരായ രോഹിത് ശര്‍മ്മയും ശുഭ്മന്‍ ഗില്ലും ക്രീസില്‍ നില്‍ക്കവേയായിരുന്നു മഴ വില്ലനായി എത്തിയത്. മത്സരം നിര്‍ത്തി വെക്കുമ്പോള്‍ ഇന്ത്യ 2.1 ഓവറില്‍ വിക്കറ്റൊന്നും നഷ്ടപ്പെടാതെ 17 റണ്‍സെന്ന നിലയിലായിരുന്നു. മഴ നിന്ന് വീണ്ടും മത്സരം ആരംഭിച്ചതോടെ ഡക്ക്‌വര്‍ത്ത് നിയമപ്രകാരം ഓവര്‍ വെട്ടിച്ചുരുക്കുകയായിരുന്നു.

മഴയ്ക്ക് ശേഷം 23 ഓവറില്‍ 145 റണ്‍സ് എന്ന ലക്ഷ്യവുമായാണ് ഇന്ത്യ ഇറങ്ങിയത്. നിയമപ്രകാരം 125 പന്തില്‍ 128 റണ്‍സാണ് ഇന്ത്യക്ക് നേടേണ്ടിയിരുന്നത്. ഓപ്പണര്‍മാരായ രോഹിത് ശര്‍മ്മയും ശുഭ്മന്‍ ഗില്ലും വീറോടെ ക്രീസിലുറച്ചുനിന്നു. രോഹിത്തും ഗില്ലും ചേര്‍ന്ന് 10 ഓവറില്‍ ഇന്ത്യയെ 64 ലെത്തിച്ചു. രോഹിത് 39 പന്തിലും ഗില്‍ 47 പന്തിലും അര്‍ധ സെഞ്ച്വറി തികച്ചു. 20.1 ഓവറില്‍ മത്സരം ഇന്ത്യ ജയിക്കുമ്പോള്‍ രോഹിത് ശര്‍മ്മ 59 പന്തില്‍ 74 റണ്‍സും ശുഭ്മാന്‍ ഗില്‍ 62 പന്തില്‍ 67 റണ്‍സുമായി പുറത്താവാത നിന്നു.