മനാമ: ദേശീയദിനം പ്രമാണിച്ച് രണ്ട് ദിവസത്തെ അവധി പ്രഖ്യാപിച്ച് ബഹ്റെെൻ. ഡിസംബർ 16, 17 ദിവസങ്ങളിൽ രാജ്യത്തെ മന്ത്രാലയങ്ങൾ, സർക്കാർ വകുപ്പുകൾ, പൊതുസ്ഥാപനങ്ങൾ എന്നിവക്ക് അവധിയായിരിക്കുമെന്ന് പ്രഖ്യാപിച്ചു. ബഹ്റെെൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് ആൽ ഖലീഫയാണ് അവധി പ്രഖ്യാപിച്ചത്. ശനിയാഴ്ച ഔദ്യോഗിക പൊതു അവധിയായതിനാൽ പകരം ആണ് ഡിസംബർ 18ന് അവധി നൽകുമെന്ന് സർക്കുലറിൽ പറയുന്നുണ്ട്.
അതേസമയം, ബഹ്റൈൻ ദേശീയദിനാഘോഷങ്ങളുടെ ഭാഗമായി ശ്രീനാരായണ കൾചറൽ സൊസൈറ്റി വിവധ തരത്തിലുള്ള പരിപാടികൾ സംഘടിപ്പിക്കാൻ തീരുമാനിച്ചു. ഡിസംബർ 16ന് അദാരി പാർക്കിൽ ഒരു കിലോമീറ്റർ നീളമുള്ള ബഹ്റൈൻ പതാക വഹിച്ചുള്ള വ്യത്യസ്തമായ ആഘോഷ പരിപാടികൾക്ക് തുടക്കം കുറിക്കും. ഇതിന് വേണ്ടിയുള്ള ഒരുക്കങ്ങൾ നടന്നുകൊണ്ടിരിക്കുകയാണെന്ന് ശ്രീനാരായണ കൾചറൽ സൊസൈറ്റിയുടെ ഭാരവാഹികൾ വാർത്തസമ്മേളനത്തിൽ അറിയിച്ചു.
അദാരി പാർക്ക് ഡെവലപ്‌മെന്റ് കമ്പനിയുമായി സഹകരിച്ചാണ് പരിപാടി നടത്തുന്നത്. ഇവന്റിൽ ബഹ്റൈൻ ഭരണാധികാരി പങ്കെടുക്കാൻ വേണ്ടിയെത്തുമെന്ന് ശ്രീനാരായണ കൾചറൽ സൊസൈറ്റി ചെയർമാൻ സുനീഷ് സുശീലൻ അറിയിച്ചു. 2023 സെപ്റ്റംബറിൽ എസ്എൻസിഎസ് സംഘടിപ്പിച്ച ട്രിബ്യൂട്ട് ടു ബഹ്റൈൻ പരിപാടിയുടെ തുടർച്ചയായാണ് വിപുലമായ ദേശീയദിന ആഘോഷപരിപാടികൾ സംഘടിപ്പിക്കുന്നത്. ബഹ്റൈൻ സർക്കാറിനും ജനങ്ങൾക്കുമുള്ള ഐക്യദാർഢ്യത്തിന്റെയും ആദരവിന്റെയും പ്രകടനമായാണ് ഒരു കിലോമീറ്റർ നീളമുള്ള ബഹ്റൈൻ പതാക കൈമാറുന്നത്. ബഹ്റൈൻ സമൂഹത്തെ പ്രതിനിധീകരിച്ചുള്ള ഏകത്വത്തിന്റെ ആഘോഷംകൂടിയാണ് ദേശീയദിനാഘോഷം. 1000ത്തിലധികം ആളുകൾ പരിപാടിയിൽ പങ്കെടുക്കാൻ വേണ്ടിയെത്തും. 16നു വൈകിട്ട് മൂന്നിന് ആരംഭിച്ച് അഞ്ചിന് ആഘോഷങ്ങൾ അവസാനിക്കും.
പൗരന്മാരുടെയും പ്രവാസികളുടെയും പങ്കാളിത്വം പരിപാടിയിൽ ഉറപ്പിക്കാൻ വേണ്ടിയാണ് വിപുലമായ കമ്മിറ്റി രൂപവത്കരിച്ചിരിക്കുന്നതെന്ന് സംഘാടകർ പറഞ്ഞു.
ജനറൽ സെക്രട്ടറി വിആർ സജീവൻ, എസ്എൻസിഎസ് ചെയർമാൻ സുനീഷ് സുശീലൻ, പ്രോഗ്രാം ജനറൽ കൺവീനർ പ്രശാന്ത് കെകെ തുടങ്ങിയവർ വാർത്തസമ്മേളനത്തിൽ പങ്കെടുത്തു. കൂടുതൽ വിവരങ്ങൾക്ക് സുനീഷ് സുശീലൻ, ചെയർമാൻ: 3667 4139, വി.ആർ. സജീവൻ, ജനറൽ സെക്രട്ടറി: 3982 4914, കെ.കെ. പ്രശാന്ത്, ജനറൽ കൺവീനർ: 3940 2118 എന്നിവരുമായി ബന്ധപ്പെടാം.
