കുവൈറ്റ് സിറ്റി: കഴിഞ്ഞ ഒരാഴ്ചക്കിടയില്‍ മാത്രം കുവൈറ്റില്‍ കണ്ടെത്തിയത് 28,000ത്തിലേറെ ട്രാഫിക് നിയമ ലംഘനങ്ങള്‍. മേജര്‍ ജനറല്‍ യൂസഫ് അല്‍ ഖദ്ദയുടെ നേതൃത്വത്തില്‍ ജനറല്‍ ട്രാഫിക് ഡിപ്പാര്‍ട്ട്മെന്റ് മെയ് 18 മുതല്‍ മെയ് 24 വരെയുള്ള കാലയളവില്‍ നടത്തിയ വാഹന പരിശോധനകളിലാണ് ഇത്രയേറെ നിയമ ലംഘനങ്ങള്‍ കണ്ടെത്തിയത്.
ട്രാഫിക് ഡിപ്പാര്ട്ട്മെന്റിന്റെ പ്രതിവാര റിപ്പോര്‍ട്ട് പ്രകാരം കഴിഞ്ഞ ഒരാഴ്ചയില്‍ രാജ്യത്തിന്റെ വിവിധ ഭാഗങ്ങളില്‍ നിന്നായി മൊത്തം 28,175 ട്രാഫിക് നിയമലംഘനങ്ങളാണ് കണ്ടെത്തിയത്. കൂടാതെ, 1,345 വാഹനാപകടങ്ങളുമായി ബന്ധപ്പെട്ട ടെലഫോണ്‍ സന്ദേശങ്ങളോട് ട്രാഫിക് പോലീസ് അപ്പപ്പോള്‍ തന്നെ പ്രതികരിച്ചു. ഇവയില്‍ 228 അപകടങ്ങള്‍ മരണങ്ങള്‍ക്ക് കാരണമാവും വിധം ഗുരുതരങ്ങളായിരുന്നു. ഇവയ്ക്കു പുറമെ വാഹനങ്ങള്‍ ഉള്‍പ്പെട്ട 1,117 ചെറിയ രീതിയിലുള്ള കൂട്ടിയിടി അപകടങ്ങളും റിപ്പോര്‍ട്ട് ചെയ്യപ്പെട്ടു.
പ്രായപൂര്‍ത്തിയാകാത്ത 26 കുട്ടികള്‍ തങ്ങളുടെ രക്ഷിതാക്കളുടെ വാഹനങ്ങള്‍ ഡ്രൈവിംഗ് ലൈസന്‍സ് ഇല്ലാതെ ഡ്രൈവ് ചെയ്തതിന് ജുവനൈല്‍ പ്രോസിക്യൂഷന് റഫര്‍ ചെയ്തതായും അധികൃതര്‍ അറിയിച്ചു. കൂടാതെ, വിവിധ നിയമലംഘനങ്ങള്‍ക്കായി 52 വാഹനങ്ങളും 35 മോട്ടോര്‍സൈക്കിളുകളും അധികൃതര്‍ കണ്ടുകെട്ടി. ഗുരുതരമായ നിയമലംഘനങ്ങള്‍ നടത്തിയ 26 വ്യക്തികളെ തുടര്‍ നടപടികള്‍ക്കായി ട്രാഫിക് പോലീസിന് റിപ്പോര്‍ട്ട് ചെയ്തു.
നിയമപാലകരുടെ വാഹന പരിശോധനകള്‍ക്കിടയില്‍ ക്രിമിനല്‍, സാമ്പത്തിക കുറ്റകൃത്യങ്ങള്‍ക്കായി പോലിസ് തിരയുന്ന 14 പേര്‍ ഒരാഴ്ചക്കിടയില്‍ പിടിയിലായതായും അധികൃതര്‍ അറിയിച്ചു. ഇതിനു പുറമെ, നിയമ നടപടികളില്‍ നിന്ന് മുങ്ങിനടക്കുകയായിരുന്ന അഞ്ച് വ്യക്തികളെയും മയക്കുമരുന്ന് ദുരുപയോഗവുമായി ബന്ധപ്പെട്ട കുറ്റങ്ങള്‍ക്ക് നാലു പേരെയും വാഹന പരിശോധനയ്ക്കിടെ പോലിസ് അറസ്റ്റ് ചെയ്തു. രാജ്യത്ത് റോഡ് സുരക്ഷ ശക്തിപ്പെടുത്തുന്നതിനും ട്രാഫിക് നിയമങ്ങള്‍ കര്‍ശനമായി നടപ്പിലാക്കുന്നതിനുമുള്ള ജനറല്‍ ട്രാഫിക് ഡിപ്പാര്ട്ട്മെന്റിന്റെ നിരന്തരമായ ശ്രമങ്ങളുടെ ഭാഗമായാണ് ശക്തമായ വാഹന പരിശോധനകള്‍. നിയമ ലംഘകര്‍ക്കെതിരേ ശക്തമായ നടപടികള്‍ സ്വീകരിക്കുമെന്ന് അധികൃതര്‍ വ്യക്തമാക്കി.
കുവൈറ്റില്‍ റോഡ് സുരക്ഷ മെച്ചപ്പെടുത്തുകയും അപകടകരമായ ഡ്രൈവിങ് കുറയ്ക്കുകയും ചെയ്യുക എന്ന ലക്ഷ്യത്തോടെ ട്രാഫിക് പിഴകള്‍ കുത്തനെ കൂട്ടാനുള്ള നീക്കത്തിലാണ് അധികൃതര്‍. ഇതുമായി ബന്ധപ്പെട്ട ട്രാഫിക് നിയമങ്ങളില്‍ ഭേദഗതികള്‍ അവതരിപ്പിച്ചിരിക്കുകയാണ് കുവൈറ്റ് ആഭ്യന്തര മന്ത്രാലയം. പുതിയ നിയമ ഭേദഗതിയിലൂടെ നിലവിലുള്ള പിഴകള്‍ ഇരട്ടിയോ അതിലധികമോ ആയി വര്‍ധിക്കുമെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ പുതിയ നിയം ഭേഭദഗതി എപ്പോള്‍ നിലവില്‍ വരുമെന്ന് വ്യക്തമല്ല. പിഴയും തടവും ഡ്രൈവിംഗ് ലൈസന്‍സ് റദ്ദ് ചെയ്യലും ഉള്‍പ്പെടെ ശക്തമായ ശിക്ഷകളാണ് നിയമ ലംഘകരെ കാത്തിരിക്കുന്നത്.
