ഷാര്‍ജ: മസാജ് സെന്ററിലെത്തുന്ന സ്ത്രീകളെ ബ്ലാക്ക് മെയില്‍ ചെയ്ത് പണംതട്ടുന്നയാളെ ഷാര്‍ജ പോലീസ് അറസ്റ്റ് ചെയ്തു. കുറഞ്ഞ നിരക്കില്‍ മസാജ് സര്‍വീസ് വാഗ്ദാനം ചെയ്ത് തിരുമ്മലിനിടെ ഫോട്ടോകളും വീഡിയോകളും എടുത്ത ശേഷം പണം ആവശ്യപ്പെട്ട് ഭീഷണിപ്പെടുത്തിയിരുന്ന അറബ് വംശജനായ 40കാരനാണ് പിടിയിലായത്.
സ്ത്രീകളെ ലക്ഷ്യമിട്ട് 100 ദിര്‍ഹത്തിന് തിരുമ്മല്‍ സേവനം ലഭ്യമാണെന്ന് സമൂഹ മാധ്യമങ്ങളില്‍ പരസ്യംചെയ്താണ് ഇയാള്‍ തട്ടിപ്പ് നടത്തിവന്നത്. സ്‌നാപ്ചാറ്റ് ഉള്‍പ്പെടെയുള്ള സോഷ്യല്‍ മീഡിയ ചാനലുകള്‍ വഴി നിയമവിരുദ്ധമായ സേവനം പ്രചരിപ്പിക്കുന്ന പ്രതിയെക്കുറിച്ച് വിവരം ലഭിച്ചതിനെ തുടര്‍ന്ന് ഷാര്‍ജ പൊലീസ് റെയ്ഡ് നടത്തുകായിരുന്നു.
പ്രതി അനധികൃതമായാണ് മസാജ് സെന്റര്‍ നടത്തിവന്നിരുന്നത്. മസാജിനിടെ സ്ത്രീകളെ മോശക്കാരായി ചിത്രീകരിക്കുന്ന ഫോട്ടോകളും വീഡിയോകളും എടുക്കുകയും ഇവ പരസ്യപ്പെടുത്താതിരിക്കാന്‍ പണം നല്‍കണമെന്ന് ആവശ്യപ്പെട്ട് ബ്ലാക്ക് മെയില്‍ ചെയ്യുകയും ചെയ്യുകയുമാണ് രീതി.
പ്രതിയെക്കുറിച്ച് വിവരം ലഭിച്ചതിനെ തുടര്‍ന്ന് പോലീസ് വിശദാംശങ്ങള്‍ പരിശോധിക്കുകയും കേന്ദ്രത്തെ കുറിച്ച് അന്വേഷണം നടത്തുകയും ചെയ്തിരുന്നു. തുടര്‍ന്ന് പോലീസ് സംഘം തിരുമ്മല്‍ കേന്ദ്രത്തില്‍ റെയ്ഡ് നടത്തി പ്രതിയെ കൈയോടെ പിടികൂടുകയായിരുന്നു. സ്ത്രീകളെ ഭീഷണിപ്പെടുത്തി പണം തട്ടയിരുന്നതായി പ്രതി പോലിസിനോട് സമ്മതിച്ചിട്ടുണ്ട്.
തെരുവുകളില്‍ വിസിറ്റിങ് കാര്‍ഡുകള്‍ വിതരണം ചെയ്തും വ്യാജ സോഷ്യല്‍ മീഡിയ അക്കൗണ്ടുകള്‍ ഉപയോഗിച്ചുമെല്ലാം നിയമവിരുദ്ധമായ മസാജ് കേന്ദ്രങ്ങളിലേക്ക് തട്ടിപ്പുകാര്‍ ഇരകളെ ആകര്‍ഷിക്കുന്നു. ‘ഉപഭോക്താക്കളെ’ കണ്ടെത്താനും നിയമവിരുദ്ധമായ മസാജ് സേവനങ്ങള്‍ പരസ്യപ്പെടുത്താനും കുറ്റവാളികള്‍ വിവിധ രീതികള്‍ അവലംബിക്കുന്നതായി അധികൃതര്‍ ചൂണ്ടിക്കാട്ടി. ഉപഭോക്താക്കള്‍ മസാജ് കേന്ദ്രങ്ങളിലെത്തുമ്പോള്‍ തട്ടിപ്പുസംഘം അവരുടെ ഫോട്ടോകളോ വീഡിയോകളോ എടുത്ത് പണത്തിനായി ബ്ലാക്ക് മെയില്‍ ചെയ്യുന്നു.
ഇത്തരം മസാജ് സേവനങ്ങള്‍ ഉപയോഗപ്പെടുത്തുന്നവര്‍ കൊള്ളയടിക്കപ്പെടുന്ന സംഭവങ്ങള്‍ ഇടയ്ക്കിടെ റിപ്പോര്‍ട്ട് ചെയ്യപ്പെടാറുണ്ട്. മാനഹാനി ഭയന്ന് പലരും ഇത് പോലിസില്‍ അറിയിക്കുകയോ കുറ്റവാളികള്‍ക്കെതിരേ നടപടി സ്വീകരിക്കാന്‍ മുതിരുകയോ ചെയ്യാതെ ഒളിപ്പിച്ചുവയ്ക്കുന്നത് ചെയ്യുന്നു. അനധികൃത കേന്ദ്രങ്ങളില്‍ സേവനത്തിന് പോകുന്നവര്‍ കൊള്ള ഉള്‍പ്പെടെയുള്ള നിരവധി അപകടങ്ങള്‍ക്ക് വിധേയരാകുമെന്ന് പോലീസ് മുന്നറിയിപ്പ് നല്‍കി.
അനധികൃത മസാജ് സേവനങ്ങളോട് പ്രതികരിക്കരുതെന്നും നിയമലംഘകരെ കുറിച്ച് അധികാരികളെ അറിയിക്കണമെന്നും പോലീസ് പൊതുജനങ്ങളോട് അഭ്യര്‍ത്ഥിച്ചു. ക്രമസമാധാനം, സുരക്ഷ എന്നിവയുമായി ബന്ധപ്പെട്ട പ്രശ്‌നങ്ങള്‍ അല്‍ നജീദ് സേവനം ഉപയോഗിച്ച് 800151 എന്ന നമ്പറില്‍ വിളിച്ചോ 7999 എന്ന നമ്പറിലേക്ക് എസ്എംഎസ് അയച്ചോ അറിയിക്കാം. വഞ്ചനയോ ഇലക്ട്രോണിക് കുറ്റകൃത്യങ്ങളോ 065943228 എന്ന നമ്പറില്‍ വിളിച്ചോ 055999215 എന്ന നമ്പറിലേക്ക് വാട്ട്‌സ്ആപ് സന്ദേശം അയച്ചോ അറിയിക്കാം. ക്രിമിനല്‍ പ്രവര്‍ത്തനങ്ങളോ സംഭവങ്ങളോ 80040 എന്ന നമ്പറില്‍ അറിയിക്കണമെന്നും പോലീസ് അഭ്യര്‍ത്ഥിച്ചു.
