മസ്കറ്റ്: കഴിഞ്ഞ വർഷം കേവലം പതിനെട്ട് വനിതകളുമായി ആരംഭിച്ച മലയാളി വിമൻസ് ലോഞ്ചിന്റെ വളർച്ച വളരെ വേഗത്തിലായിരുന്നു. ഇന്ന് കൂട്ടായ്മയിൽ നൂറിലേറെ അംഗങ്ങൾ ഉണ്ട്. വ്യക്തി ജീവിതത്തിൽ ഒട്ടേറെ കഴിവുകൾ ഉണ്ടായിട്ടും പ്രവാസ ജീവിതത്തിലെ തിരക്കിനിടയിൽ ശോഭിക്കാൻ കഴിയാത്ത നിരവധി പേർ ഉണ്ട്. അവർക്കെല്ലാം തങ്ങളുടെ കഴിവുകൾ പ്രകടിപ്പിക്കാനുള്ള അവസരം ഇവിടെ ലഭിക്കുന്നു. ഫാഷൻ ഡിസൈനർമാർ , അധ്യാപകർ, ഗായകർ, കലാകാരന്മാർ , സോഷ്യൽ മീഡിയ ഇൻഫ്ലുൺസേർസ് , ഹോം മേക്കർമാർ എന്നിങ്ങനെ നിരവധി മേഖലകളിൽ കഴിവ് തെളിയിച്ച വനിതകൾ ഇന്ന് കൂട്ടായ്മയിൽ ഉണ്ട്
സോഷ്യൽ മീഡിയ വഴിയാണ് ഇവർ പ്രവർത്തനങ്ങൾ നടത്തുന്നത്. സ്വന്തം അംഗങ്ങളുടെ കഴിവിനെ പരിപോഷിപ്പിക്കുക എന്നതിനപ്പുറം സാമൂഹിക പ്രതിബദ്ധതയുള്ള കാര്യങ്ങൾ കൂടി ചെയുക എന്നതാണ് കൂട്ടായ്മയുടെ പ്രധാന ലക്ഷ്യം. നിരവധി സ്ത്രീകൾക്ക് ഒട്ടേറെ അവസരങ്ങളാണ് ഒരുക്കിയിരിക്കുന്നത്. കേരളത്തിൽ ഭിന്നശേഷിക്കാരായ കുട്ടികൾക്കായി നടത്തിവരുന്ന സാന്ത്വനം എന്ന സംഘടനക്ക് കഴിഞ്ഞ വർഷം സഹായം നൽകിയിരുന്നു. കൂടാതെ തുർക്കിയിലുണ്ടായ ഭൂകമ്പ ദുരിതബാധിതർക്കായി ആവശ്യമായവസ്തുക്കൾ ഒമാനിലെ തുർക്കി എംബസ്സി വഴി എത്തിച്ചു.
അന്തർദേശീയ ബ്രെസ്റ്റ് ക്യാൻസർ ബോധവത്കരണ മാസത്തോട് അനുബന്ധിച്ച് മലയാളി വിമൻസ് ലോഞ്ച് കഴിഞ്ഞ ദിവസം ബോധവത്കരണ ക്ലാസ് നടത്തി. ജീവിതശൈലി നിയന്ത്രണത്തിലൂടെ ക്യാൻസറിനെ പരിപൂർണ്ണമായി പ്രതിരോധിക്കാം എന്ന് ക്ലാസിൽ സംസാരിച്ച ഡോക്ടർ രാജശ്രീ നാരായണൻ കുട്ടി പറഞ്ഞു. ഇന്ന് ക്യാൻസർ ഏറെക്കുറെ പൂർണ്ണമായി ചികിത്സിച്ചു മാറ്റാവുന്ന രേഗമായി മാറിയിരിക്കുന്നുവെന്നും ഡോക്ടർ രാജശ്രീ നാരായൺകുട്ടി പറഞ്ഞു.
ഇന്നത്തെ ജീവിത സാഹചര്യങ്ങളിൽ സ്ത്രീകൾ ആരോഗ്യത്തിനു പരിഗണന നൽകുന്നില്ല വ്യായാമം ഇല്ലായ്മ, ഉറക്കക്കുറവ്, അനാരോഗ്യകരമായ ഭക്ഷണശീലങ്ങൾ, മാനസിക സമ്മർദ്ദം ഇതെല്ലാം തന്നെ രോഗത്തിന് കാരണമാകുന്നു. അസുഖം വരാതെ നോക്കുക എന്നത് തന്നെയാണ് പ്രധാനം. ഭക്ഷണത്തിൽ പച്ചക്കറികളും, പഴവർഗങ്ങളും കൂടുതലായി ഉൾപ്പെടുത്തുക. കൊഴുപ്പു കൂടിയ ഫാസ്റ്റ് ഫുഡുകളും, മാംസാഹാരവും , അമിതമായ പാലും പാലുൽപ്പന്നങ്ങളും ഒഴിവാക്കുക. ഭക്ഷണം നിയന്ത്രിച്ചു വ്യായാമം ചെയ്യാതെ ഇരിക്കുന്നതും തെറ്റാണെന്നും രാജശ്രീ ക്ലാസിൽ പറഞ്ഞു. ഇത് പോലെ പ്രധാനപ്പെട്ട ഒന്നാണ് മാനസിക ഉല്ലാസം. അമിതമായ മാനസിക സമ്മർദ്ദം പല അസുഖങ്ങളും വരുത്തിവെക്കും.
വർഷത്തിൽ ഒരിക്കലെങ്കിലും മാമ്മോഗ്രാം ചെയ്യണം. സ്ത്രീകൾക്ക് സൗജന്യമായി അത് ചെയ്യുവാനുള്ള സംവിധാനം ഒമാൻ ക്യാൻസർ അസോസിയേഷൻ ഒരുക്കിയിട്ടുണ്ടെന്നും ഡോക്ടർ രാജശ്രീ നാരായണൻ കുട്ടി പറഞ്ഞു . അസൈബയിൽ വെച്ചാണ് ക്യാൻസർ ബോധവത്കരണ ക്ലാസ് നടത്തിയത്. പരിപാടിയിൽ നിരവധി പേർ പങ്കെടുത്തു. ഡോക്ടർ ഷബ്നം ,നഫീസ എന്നിവർ പരിപാടിക്ക് സ്വാഗതം പറഞ്ഞു . അഫ്ര , ഐഷ ഹനാൻ എന്നിവർ ചേർന്ന് കൂട്ടായ്മയുടെ സ്നേഹോപഹാരം ഡോക്ടർ രാജശ്രീക്കു കൈമാറി.
