കുവൈറ്റ് സിറ്റി: കുവൈറ്റില്‍ ഏപ്രില്‍ നാലിന് നടക്കുന്ന പാര്‍ലമെന്റ് തെരഞ്ഞെടുപ്പിലേക്കുള്ള സ്ഥാനാര്‍ഥി രജിസ്‌ട്രേഷന്‍ ഇന്ന് ആരംഭിക്കും. ദേശീയ അസംബ്ലിയിലേക്ക് മല്‍സരിക്കുന്നവര്‍ക്ക് മാര്‍ച്ച് 4 തിങ്കളാഴ്ച മുതല്‍ നാമനിര്‍ദേശം സമര്‍പ്പിക്കാമെന്ന് കുവൈറ്റ് ന്യൂസ് ഏജന്‍സി (കുന) റിപ്പോര്‍ട്ട് ചെയ്തു.
ഏപ്രില്‍ നാലിനാണ് ദേശീയ അസംബ്ലിയിലേക്ക് അംഗങ്ങളെ തിരഞ്ഞെടുക്കാനുള്ള വോട്ടെടുപ്പ്. അപ്രതീക്ഷിതമായി കുവൈറ്റ് അമീര്‍ ഷെയ്ഖ് മിഷ്അല്‍ അല്‍ അഹമ്മദ് അല്‍ സബാഹ് പാര്‍ലമെന്റ് പിരിച്ചുവിട്ടതിനെ തുടര്‍ന്നാണ് രാജ്യത്ത് വീണ്ടും തെരഞ്ഞെടുപ്പിന് കളമൊരുങ്ങിയത്. കഴിഞ്ഞ ഫെബ്രുവരി 15നാണ് കൗണ്‍സില്‍ പിരിച്ചുവിട്ട് അമീര്‍ ഉത്തരവ് പുറപ്പെടുവിച്ചത്.
പാര്‍ലമെന്റില്‍ അമീറിന്റെ നിലപാടിനെ മാനിക്കാത്ത ‘കുറ്റകരവും അനുചിതവുമായ ഭാഷ’ എംപിമാരില്‍ ഒരാള്‍ ഉപയോഗിച്ചതിനെ ചൊല്ലിയുള്ള തര്‍ക്കണ് ദേശീയ അസംബ്ലി പിരിച്ചുവിടുന്നതിലേക്ക് എത്തിച്ചത്. എംപി അബ്ദുള്‍ കരീം അല്‍ കന്ദരിയുടെ പരാമര്‍ശങ്ങളാണ് വിവാദമായത്. പ്രധാനമന്ത്രിയുടെ നിര്‍ദേശത്തെത്തുടര്‍ന്നാണ് അമീര്‍ പാര്‍ലമെന്റ് പിരിച്ചുവിടുകയായിരുന്നു.
സര്‍ക്കാരും എംപിമാരും തമ്മിലുള്ള ഭിന്നത കാരണം 18 മാസത്തിനിടെ മൂന്നാം തവണയാണ് പാര്‍ലമെന്റ് പിരിച്ചുവിടുന്നത്. അമീറിന്റെ ഉന്നത പദവിയോടുള്ള ബഹുമാനം നിലനിര്‍ത്തുന്നതില്‍ എംപിമാരില്‍ നിന്ന് ഗുരുതര വീഴ്ച ഉണ്ടായതിനെ തുടര്‍ന്ന് പാര്‍ലമെന്റ് പിരിച്ചുവിടാനുള്ള അമീറിന്റെ നിര്‍ദേശത്തിന് മന്ത്രിസഭ അംഗീകാരം നല്‍കിയെന്നായിരുന്നു കുവൈറ്റ് ന്യൂസ് ഏജന്‍സി അറിയിപ്പ്.
അബ്ദുല്‍ കരീം അല്‍ കന്ദരിയുടെ വിവാദ പരാമര്‍ശം സഭയുടെ മിനുട്‌സില്‍ നിന്ന് നീക്കാന്‍ സ്പീക്കര്‍ സ്പീക്കര്‍ അഹമദ് അല്‍ സദൂന്‍ ശ്രമിച്ചെങ്കിലും അംഗങ്ങള്‍ എതിര്‍ത്തു. അമീറിനെ അപകീര്‍ത്തിപ്പെടുത്താന്‍ ബോധപൂര്‍വം നടത്തിയ പദപ്രയോഗങ്ങള്‍ നീക്കണമെന്ന കര്‍ക്കശ നിലപാട് സര്‍ക്കാര്‍ സ്വീകരിച്ചതോടെ വിഷയം വോട്ടിങിനിടുകയും 44 എംപിമാര്‍ പരാമര്‍ശം നീക്കേണ്ടതില്ലെന്ന് അറിയിച്ചു. മൂന്ന് എംപിമാരും 12 കാബിനറ്റ് മന്ത്രിമാരും മാത്രമാണ് അനുകൂലിച്ചത്.
വോട്ടിങ് പരാജയപ്പെട്ടതോടെ മന്ത്രിസഭാംഗങ്ങള്‍ പാര്‍ലമെന്റ് ബഹിഷ്‌കരിച്ചു. സഭാസമ്മേളനം മാറ്റിവയ്ക്കുകയും ചെയ്തു. പിന്നീട് മന്ത്രിസഭ പ്രത്യേക യോഗം ചേരുകയും മന്ത്രിസഭ പിരിച്ചുവിടാനുള്ള അമീറിന്റെ ശുപാര്‍ശ അംഗീകരിക്കുകയാണെന്ന് അറിയിക്കുകയുമായിരുന്നു.
കഴിഞ്ഞ ഡിസംബറിലാണ് രാജ്യത്തിന്റെ പുതിയ അമീറായി ഷെയ്ഖ് മിഷ്അല്‍ അല്‍ സബാഹ് അധികാരമേല്‍ക്കുന്നത്. നിലവിലെ അമീറിന്റെ നിര്യാരണത്തെ തുടര്‍ന്നായിരുന്നു ഇത്. തുടര്‍ന്ന് ഭരണഘടന നടപടിക്രമം അനുസരിച്ച് അമീര്‍ മന്ത്രിസഭ പിരിച്ചുവിടുകയും പുതിയ പ്രധാനമന്ത്രിയെ തെരഞ്ഞെടുക്കുകയും അദ്ദേഹത്തിന്റെ നേതൃത്വത്തില്‍ മന്ത്രിസഭ രൂപീകരിക്കുകയും ചെയ്ത് ഏതാനും ദിവസങ്ങള്‍ക്കുള്ളിലാണ് അസംബ്ലി തന്നെ പിരിച്ചുവിട്ടത്. 2005 ശേഷം ഒമ്പതാം തവണയാണ് നാല് വര്‍ഷ കാലാവധി പൂര്‍ത്തിയാക്കാതെ പാര്‍ലമെന്റ് പിരിച്ചുവിടുന്നത്. എംപിമാരും അമീര്‍ തെരഞ്ഞെടുക്കുന്ന മന്ത്രിസഭാംഗങ്ങളും തമ്മിലുള്ള നിരന്തര തര്‍ക്കങ്ങളാണ് കാരണം.
