ദുബായ്: ബോളിവുഡിനെ കിങ് ഖാന്‍ എന്നറിയപ്പെടുന്ന ഷാരൂഖ് ഖാന്‍ ലോകത്തിലെ ഏറ്റവും ഉയരമുള്ള കെട്ടിടമായ ദുബായിലെ ബുര്‍ജ് ഖലീഫയില്‍ വച്ച് നടത്തിയ പ്രഖ്യാപനം സമൂഹമാധ്യമങ്ങളില്‍ ആരാധകര്‍ ഏറ്റെടുത്തു. തന്റെ ഏറ്റവും പുതിയ ചിത്രമായ ജവാന്റെ ട്രെയ്‌ലര്‍ ലോഞ്ചിനാണ് ഷാരൂഖ് ഇവിടെയത്തിയത്. ഇന്നലെ പുറത്തിറക്കിയ ട്രെയിലര്‍ വന്‍ ഹിറ്റായതിനു പിന്നാലെ താരത്തിന്റെ മൊട്ടത്തലയും ശ്രദ്ധപിടിച്ചുപറ്റി.
ഇനിയൊരിക്കലും ഒരു ചിത്രത്തിനുവേണ്ടിയും മൊട്ടത്തലയില്‍ അഭിനയിക്കില്ലെന്നായിരുന്നു താരത്തിന്റെ ശപഥം. ജവാന്‍ സിനിമയുടെ ട്രെയിലര്‍ പുറത്തിറക്കിയ ശേഷം ഷാരൂഖ് ഖാന്‍ ഇങ്ങനെ പറഞ്ഞത്. ജവാന്‍ പ്രിവ്യൂവിനൊപ്പം മൊട്ടത്തലയും സോഷ്യല്‍ മീഡിയയില്‍ വൈറലാണ്. ഷാരൂഖിന്റെ ഷേവ് ചെയ്ത തലയില്‍ ഒരു ടാറ്റൂ ഉണ്ടെന്ന് ചില ആരാധകര്‍ കണ്ടെത്തിയതും ചര്‍ച്ചയാണ്. കരിയറില്‍ ആദ്യമായാണ് ഷാരൂഖ് മൊട്ടത്തലയുമായി അഭിനയിക്കുന്നത്.
സൂപ്പര്‍സ്റ്റാര്‍ ഷാരൂഖ് ഖാനും ബോളിവുഡ് ആരാധകരും ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ജവാന്‍. ഓഗസ്റ്റ് 31ന് വ്യാഴാഴ്ച രാവിലെ പ്രാരംഭ റിലീസ് കഴിഞ്ഞ് മണിക്കൂറുകള്‍ക്ക് ശേഷമാണ് ബുര്‍ജ് ഖലീഫയിലെ ലോഞ്ചിങ്. 31ന് രാത്രി 9 മണിക്ക് ബുര്‍ജ് ഖലീഫയില്‍ എത്തുമെന്ന് ഷാരൂഖ് മൈക്രോബ്ലോഗിങ് സൈറ്റായ എക്‌സിലെ തന്റെ ഔദ്യോഗിക പേജില്‍ അറിയിച്ചിരുന്നു. എന്നോടൊപ്പം ‘ജവാന്‍’ ആഘോഷിക്കൂ. നിങ്ങള്‍ക്കൊപ്പം ‘ജവാന്‍’ ആഘോഷിക്കാതിരിക്കാന്‍ എനിക്കാവില്ല എന്നും ഷാറൂഖ് പോസ്റ്റ് ചെയ്തു. ആരാധകരോട് ‘സ്‌നേഹത്തിന്റെ നിറം’ ചുവന്ന വസ്ത്രം ധരിക്കാനും 58 കാരനായ താരം അഭ്യര്‍ത്ഥിച്ചിരുന്നു.
സമൂഹത്തിലെ തെറ്റുകള്‍ തിരുത്താന്‍ സജ്ജനായ ഒരു മനുഷ്യന്റെ വൈകാരിക യാത്ര വിവരിക്കുന്ന ആക്ഷന്‍ ത്രില്ലറാണ് ‘ജവാന്‍’. ഇന്റലിജന്‍സ് ഓഫീസറായും കള്ളനായും ഇരട്ടവേഷത്തിലാണ് ഷാരൂഖ് എത്തുന്നത്. പൂനെ, മുംബൈ, ഹൈദരാബാദ്, ചെന്നൈ, രാജസ്ഥാന്‍, ഔറംഗബാദ് എന്നിവിടങ്ങളിലാണ് ചിത്രീകരിച്ചത്.
ആറ്റ്‌ലി സംവിധാനം ചെയ്ത ചിത്രത്തില്‍ വിജയ് സേതുപതിയും നയന്‍താരയും ദീപിക പദുക്കോണും അതിഥിവേഷത്തില്‍ എത്തുന്നുണ്ട്. സന്യ മല്‍ഹോത്ര, പ്രിയാമണി, ഗിരിജ ഓക്ക്, സഞ്ജീത ഭട്ടാചാര്യ, ലെഹര്‍ ഖാന്‍, ആലിയ ഖുറേഷി, റിധി ദോഗ്ര, സുനില്‍ ഗ്രോവര്‍, മുകേഷ് ഛബ്ര എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. അനിരുദ്ധ് രവിചന്ദറിന്റേതാണ് സംഗീതം.
റെഡ് ചില്ലീസ് എന്റര്‍ടൈന്‍മെന്റിന്റെ ബാനറില്‍ ഗൗരി ഖാനും ഗൗരവ് വര്‍മയും ചേര്‍ന്ന് നിര്‍മിച്ച ചിത്രം ഹിന്ദി, തമിഴ്, തെലുങ്ക് ഭാഷകളില്‍ സെപ്റ്റംബര്‍ ഏഴിന് ലോകമെമ്പാടും റിലീസ് ചെയ്യാനാണ് പദ്ധതി.
