റിയാദ്: വിദേശ രാജ്യങ്ങളില്‍ നിന്ന് സൗദിയിലേക്ക് വിലപിടിപ്പുള്ള വസ്തുക്കള്‍ കൊണ്ടുവരുന്നവരില്‍ നിന്ന് നികുതി ഈടാക്കാന്‍ തീരുമാനം. 3,000 റിയാലിന് (ഏകദേശം 66,000 രൂപ) മുകളില്‍ വിലവരുന്ന സാധനങ്ങള്‍ക്കാണ് നികുതി ചുമത്തുക.
വിദേശ രാജ്യങ്ങള്‍ സന്ദര്‍ശിക്കുന്ന സൗദി പൗരന്‍മാര്‍ വിലപിടിപ്പുള്ള വസ്തുക്കള്‍ സൗദിയിലേക്ക് കൊണ്ടുവരുന്നത് വര്‍ധിച്ചുവെന്ന കണ്ടെത്തലിന്റെ അടിസ്ഥാനത്തിലാണ് നടപടി. ആഭ്യന്തര വിപണിയെ കൂടി ബാധിക്കുമെന്നതിനിലാണ് നികുതി ഏര്‍പ്പെടുത്താന്‍ തീരുമാനിച്ചത്.
3,000 റിയാലില്‍ കൂടുതല്‍ മൂല്യമുള്ള വസ്തുക്കള്‍ക്ക് നികുതി ചുമത്തുമെന്ന് സൗദി സകാത്ത്, ടാക്‌സ് ആന്റ് കസ്റ്റംസ് അതോറിറ്റി അറിയിച്ചു. വിലപിടിപ്പുള്ള വസ്തുക്കള്‍ കൊണ്ടുവരുന്നവര്‍ വിമാനത്താവളങ്ങള്‍, റോഡ് ചെക്‌പോയിന്റുകള്‍, തുറമുഖങ്ങള്‍ എന്നീ പ്രവേശന കവാടങ്ങളില്‍ ഡിക്ലറേഷന്‍ ഫോം പൂരിപ്പിച്ചുനല്‍കണം. രാജ്യത്തേക്ക് കൊണ്ടുവരുന്ന സാധനങ്ങള്‍, വിലവിവരം തുടങ്ങിയവയാണ് ഇതില്‍ രേഖപ്പെടുത്തേണ്ടത്.
