മൂന്നാം ജയത്തോടെ ഇന്റർ മയാമി പ്രീക്വാർട്ടറിൽ

ഫോര്‍ട്ട് ലോഡര്‍ഡെയ്ൽ: അരമണിക്കൂറോളം പെയ്ത മഴയ്ക്ക് ശേഷം വൈകിയാണ് മത്സരം ആരംഭിച്ചത്. ഏഴാം മിനിറ്റിൽ തന്നെ ലയണൽ മെസ്സിയുടെ ആദ്യ ​ഗോൾ നേടി. നെഞ്ചിലേക്കെത്തിയ പാസിനെ തൻ്റെ ഇടം കാലിൽ സ്വീകരിച്ച മെസ്സി ഒർലാൻഡോ സിറ്റിയുടെ വലയിലേക്ക് നിറയൊഴിച്ചു. ഇന്റർ മയാമി 1-0 ത്തിന് മുന്നിലെത്തി. മെസ്സിക്കും സംഘത്തിനും ഒർലാൻഡോയുടെ മറുപടി ഉടൻ വന്നു. 17-ാം മിനിറ്റിൽ സമനില ​ഗോൾ. പിന്നീട് ഇരു ടീമുകളും കളം നിറഞ്ഞു. 32-ാം മിനിറ്റിലെ മെസ്സിയുടെ ശ്രമം ​പോസ്റ്റിൽ തട്ടി അവസാനിച്ചു.

ആദ്യ പകുതി ഓരോ​ ​ഗോൾ വീതം നേടി സമനില പാലിച്ചു. 48-ാം മിനിറ്റിൽ മയാമിക്ക് ലഭിച്ച പെനാൽറ്റിയോടെ രണ്ടാം പകുതിയ്ക്ക് തുടക്കമായി. പെനാൽറ്റി മുതലാക്കിയ ജോസെഫ് മാർട്ടിനെസ് മയാമിയെ 2-0 ത്തിന് മുന്നിലെത്തിച്ചു. തുടർന്ന് പന്തിന്റെ നിയന്ത്രണം മെസ്സിക്കും സംഘത്തിനും മാത്രമായി. 72-ാം മിനിറ്റിൽ മെസ്സിയുടെ രണ്ടാം ​ഗോൾ. ഇത്തവണ വലതുകാലിൽ നിന്നായിരുന്നു മെസ്സിയുടെ കിക്ക്. ഇന്റർ മയാമി 3-1 ന് മുന്നിൽ. പത്ത് മിനിറ്റോളം നീണ്ട ഇഞ്ചുറി സമയം വരെയും ഒർലാൻഡ‍ോയ്ക്ക് മറുപടി ​ഗോളുകൾ ​ഉണ്ടായില്ല.

ലീ​ഗ്സ് കപ്പിലെ മൂന്നാം ജയത്തോടെ മയാമി പ്രീക്വാർട്ടറിലേക്ക് കടന്നു. ഇന്റർ മയാമിയിലെ മൂന്നാം മത്സരം മാത്രം കളിച്ച മെസ്സി അഞ്ച് ​ഗോളുകൾ നേടികഴിഞ്ഞു. ഓ​ഗസ്റ്റ് 6 ഞായറാഴ്ചയാണ് ലീ​ഗ്സ് കപ്പിലെ മയാമിയുടെ പ്രീക്വാർട്ടർ മത്സരം. എഫ്സി ഡല്ലാസാണ് പ്രീക്വാർട്ടറിലെ എതിരാളികൾ.