യാദ്: സൗദി അറേബ്യയില്‍ വച്ച് മൂന്നാഴ്ച മുമ്പ് കാണാതായ ഇന്ത്യക്കാരന്റെ മൃതദേഹം കണ്ടെത്തി. കന്യാകുമാരി സ്വദേശി ജോണ്‍ സേവ്യറിന്റെ (43) മൃതദേഹമാണ് തിരിച്ചറിഞ്ഞത്. റിയാദ് ശുമൈസി ആശുപത്രി മോര്‍ച്ചറിയിലാണ് മൃതദേഹമുള്ളത്.
റിയാദ് ഇന്ത്യന്‍ എംബസിക്ക് സൗദി പോലിസ് നല്‍കിയ വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് മൃതദേഹം തിരിച്ചറിഞ്ഞത്. കന്യാകുമാരിയിലെ അരുമനൈ, തെറ്റി വിളൈ, മറുതര വിളാഗം സ്വദേശിയായ ജോണ്‍ സേവ്യറിനെ ജൂലൈ 25ന് നജ്‌റാനില്‍ നിന്നും റിയാദ് അസീസിയയിലെ സാപ്റ്റ്‌കോ ബസ് സ്റ്റാന്‍ഡില്‍ വന്നിറങ്ങിയ ശേഷമാണ് കാണാതായത്.
ജൂലൈ 29ന് മരിച്ചതായാണ് പോലീസ് രേഖകളിലുള്ളത്. അസീസിയ ബസ് സ്‌റ്റേഷന് സമീപം മരിച്ച നിലയില്‍ കണ്ടെത്തുകയായിരുന്നു. അസീസിയ പോലീസ് സ്‌റ്റേഷനില്‍നിന്ന് ഇന്ത്യന്‍ എംബസിയെ വിവരമറിയിച്ചതിനെ തുടര്‍ന്ന് ജീവകാരുണ്യപ്രവര്‍ത്തകന്‍ സിദ്ദീഖ് തുവ്വൂര്‍ മോര്‍ച്ചറിയിലെത്തി തിരിച്ചറിയുകയായിരുന്നു.
ഒരു വര്‍ഷം മുമ്പാണ് ജോണ്‍ സേവ്യര്‍ സൗദിയിലെത്തിയത്. മേസണ്‍ ജോലിക്കാരനാണ്. കരാറെടുത്ത് ജോലികള്‍ ചെയ്തവകയില്‍ വലിയ സാമ്പത്തികബാധ്യത വന്നതായി പറയപ്പെടുന്നു. പ്രതിസന്ധിലായതോടെ റിയാദിലുള്ള സുഹൃത്ത് ആവശ്യപ്പെട്ട പ്രകാരമാണ് ഇവിടേക്ക് വന്നത്.
റിയാദിലെത്തി സുഹൃത്തിനെ ബന്ധപ്പെടാന്‍ ശ്രമിച്ചപ്പോള്‍ ഫോണ്‍ സ്വിച്ച് ഓഫ് ആയതിനാല്‍ കഴിഞ്ഞില്ല. ഇതോടെ വലിയ മാനസികപ്രയാസത്തിലായ ജോണ്‍ സേവ്യര്‍ അസീസിയ ബസ് സ്റ്റാന്‍ഡില്‍നിന്നും നാട്ടിലുള്ള മകനെ ഫോണില്‍ ബന്ധപ്പെട്ടു. റിയാദിലേക്ക് വരാന്‍ പറഞ്ഞ സുഹൃത്ത് ചതിച്ചെന്ന് അറിയിച്ചതായും പറയപ്പെടുന്നു. ഇതിനു ശേഷം സേവ്യറിനെ കുറിച്ച് വിവരമൊന്നുമില്ലായിരുന്നു.
മൃതദേഹം നാട്ടിലേക്ക് കൊണ്ടുപോകും. നിയമനടപടികള്‍ പൂര്‍ത്തിയാക്കുന്നതിന് സാമൂഹികപ്രവര്‍ത്തകരായ സിദ്ദീഖ് തുവ്വൂരും സാലി എം സാലിയും രംഗത്തുണ്ട്. സുമതിയാണ് ജോണ്‍ സേവ്യറിന്റെ അമ്മ. ഭാര്യ: ശ്രീകുമാരി, മക്കള്‍: താജില്‍, തര്‍ഷിന്‍ ജെന.
