ജിദ്ദ: സൗദി അറേബ്യയിലെ പ്രവാസികള്‍ക്കുള്ള താമസരേഖയായ ഇഖാമ കാലഹരണപ്പെടല്‍, ഹുറൂബ് രേഖപ്പെടുത്തല്‍ (തൊഴിലാളി ഒളിച്ചോടിയെന്ന് അധികൃതരെ അറിയിക്കല്‍), ആശ്രിത ഫീസ് സംബന്ധിച്ച പ്രശ്‌നങ്ങള്‍ തുടങ്ങി രേഖകളില്ലാത്ത കാരണങ്ങളാല്‍ ഇന്ത്യയിലേക്ക് മടങ്ങാന്‍ കഴിയാതെ വരുന്ന പ്രവാസികള്‍ക്ക് ഇന്ത്യന്‍ എംബസി, കോണ്‍സുലേറ്റ് വഴി ഫൈനല്‍ എക്‌സിറ്റ് വിസ ലഭിക്കും.
ജിദ്ദ, മക്ക, മദീന നഗരങ്ങളിലോ സമീപമുള്ള പ്രദേശങ്ങളിലോ ആണ് താമസിക്കുന്നതെങ്കില്‍ ജിദ്ദയിലെ ഇന്ത്യന്‍ കോണ്‍സുലേറ്റിലാണ് അപേക്ഷ സമര്‍പ്പിക്കേണ്ടത്. സൗദിയിലെ മറ്റെല്ലാ നഗരങ്ങളിലും താമസിക്കുന്ന പ്രവാസികള്‍ക്കും സന്ദര്‍ശകര്‍ക്കും റിയാദിലെ ഇന്ത്യന്‍ എംബസി വഴി അപേക്ഷിക്കാം. ഇതിനായി സൗദിയിലെ ലൊക്കേഷന്‍ അനുസരിച്ച് കോണ്‍സുലേറ്റിന്റെയോ എംബസിയുടെയോ വെബ്‌സൈറ്റ് സന്ദര്‍ശിച്ച് അപേക്ഷ നല്‍കണം. റിയാദ് എംബസിയില്‍ https://cgijeddah.org/consulate/exitVisa/embreg.aspx എന്ന ലിങ്കിലൂടെയും ജിദ്ദ കോണ്‍സുലേറ്റില്‍ https://cgijeddah.org/consulate/exitVisa/reg.aspx എന്ന ലിങ്ക് വഴിയും നേരിട്ട് പ്രവേശിക്കാം.
വെബ്‌സൈറ്റ് പേജ് ഓപണ്‍ ആയാല്‍ പാസ്‌പോര്‍ട്ട് നമ്പര്‍ നല്‍കിയ ശേഷം ‘ഡാറ്റ പരിശോധിക്കുക’ എന്ന ബട്ടണില്‍ ക്ലിക്ക് ചെയ്യുക. അപ്പോള്‍ വെബ്‌സൈറ്റില്‍ ഒരു പുതിയ അപേക്ഷാ ഫോം ലഭിക്കും. ഇത് പൂരിപ്പിക്കണം. പാസ്‌പോര്‍ട്ടിലെ നിങ്ങളുടെ പേര്, ഇഖാമ പ്രകാരം അറബിയിലുള്ള പേര്, സൗദിയിലെ മൊബൈല്‍ നമ്പര്‍, വാട്ട്‌സ്ആപ്പ് നമ്പര്‍, ഇന്ത്യന്‍ മൊബൈല്‍ നമ്പര്‍, ഇ-മെയില്‍ വിലാസം എന്നിവ നല്‍കണം. നിങ്ങള്‍ ജോലി ചെയ്യുന്ന പ്രദേശത്തിന്റെ പേര് റിയാദ്, ജിദ്ദ, ദമ്മാം, ബുറൈദ തുടങ്ങിയ ഓപ്ഷനുകളില്‍ നിന്ന് തിരഞ്ഞെടുത്ത് നല്‍കുക.
പാസ്‌പോര്‍ട്ട് വിശദാംശങ്ങളാണ് അടുത്ത ഘട്ടത്തില്‍ നല്‍കേണ്ടത്. പാസ്‌പോര്‍ട്ട് അനുവദിച്ച തീയതി, കാലാവധി തീരുന്ന തീയതി, പാസ്‌പോര്‍ട്ട് സ്റ്റാറ്റസ് (സാധുതയുള്ളതോ കാലഹരണപ്പെട്ടതോ അല്ലെങ്കില്‍ നഷ്ടപ്പെട്ടതോ).
ഇഖാമയുടെ വിശദാംശങ്ങളാണ് ഇനി ചേര്‍ക്കേണ്ടത്. ഇഖാമ നമ്പര്‍, ബോര്‍ഡര്‍ നമ്പര്‍, കാലഹരണ തീയതി തിരഞ്ഞെടുക്കുക. ഹുറൂബ് നില, കാലഹരണപ്പെട്ട ഇഖാമ, ഹുറൂബ്, മത്‌ലൂബ്, തീര്‍പ്പാക്കാത്ത ലംഘനങ്ങള്‍ അല്ലെങ്കില്‍ പിഴകള്‍ എന്നിവ പരിശോധിക്കണം. ഇഖാമയിലെ പ്രൊഫഷന്‍ രേഖപ്പെടുത്തിയ ശേഷം അഞ്ചാം ഘട്ടമായി വിസ വിശദാംശങ്ങള്‍ നല്‍കേണ്ടതുണ്ട്. അപേക്ഷകന്റെ വിസ തരം, വിസിറ്റ് വിസ, ഗാര്‍ഹിക തൊഴിലാളി വിസ, നോണ്‍ഡൊമസ്റ്റിക് വര്‍ക്കര്‍ വിസ, അല്ലെങ്കില്‍ ഫൈനല്‍ എക്‌സിറ്റ് വിസ ലഭിച്ച ശേഷം കാലഹരണപ്പെട്ടു എന്നിവയിലൊന്ന് തിരഞ്ഞെടുക്കണം.
തൊഴിലുടമയുടെ അല്ലെങ്കില്‍ കമ്പനിയുടെ പേര്, സ്‌പോണ്‍സറെയോ കമ്പനിയേയോ ബന്ധപ്പെടാനുള്ള നമ്പര്‍ എന്നിവ നല്‍കിക്കഴിഞ്ഞാല്‍ രേഖകള്‍ അപ്‌ലോഡ് ചെയ്യണം. ഓരോ പ്രമാണവും 500 കെബിയില്‍ കുറവായിരിക്കണം. ഡിജിറ്റല്‍ ഇഖാമ അല്ലെങ്കില്‍ ഇഖാമ, ഇന്ത്യന്‍ പാസ്‌പോര്‍ട്ട് എന്നിവയാണ് അപ്‌ലോഡ് ചെയ്യേണ്ടത്. ഫോം പൂരിപ്പിച്ചുകഴിഞ്ഞ ശേഷം എഗ്രിമെന്റ് എന്ന ബട്ടണ്‍ ക്ലിക്ക് ചെയ്യുകയും സബ്മിറ്റ് എന്ന ഓപ്ഷന്‍ അമര്‍ത്തുകയും ചെയ്താല്‍ അപേക്ഷ നല്‍കല്‍ പൂര്‍ണമായി.
വിജയകരമായി അപേക്ഷ സമര്‍പ്പിച്ചാല്‍ ഇന്ത്യന്‍ എംബസിയോ കോണ്‍സുലേറ്റോ നിങ്ങളുടെ അപേക്ഷ സൗദിയിലെ ബന്ധപ്പെട്ട അധികാരികള്‍ക്ക് കൈമാറുകയും ആവശ്യമെങ്കില്‍ നിങ്ങളെ ബന്ധപ്പെടുകയും ചെയ്യും.
