റിയാദ്: സൗദി അറേബ്യയില്‍ വിസിറ്റ് വിസയില്‍ വരുന്നവര്‍ക്ക് ഡിജിറ്റല്‍ ഡോക്യുമെന്റ് എടുക്കാന്‍ ആഭ്യന്തര മന്ത്രാലയത്തിന്റെ ഓണ്‍ലൈന്‍ സേവന പ്ലാറ്റ്ഫോം ആയ അബ്ഷിര്‍ വഴി എളുപ്പത്തില്‍ സാധിക്കും. സന്ദര്‍ശകര്‍ക്കുള്ള അബ്ഷിര്‍ ഡോക്യുമെന്റ് എടുക്കുന്നതിന് ലളിതമായ ഘട്ടങ്ങളാണുള്ളത്.
അബ്ഷിറില്‍ പ്രവേശിച്ച ശേഷം സര്‍വീസ്, ജനറല്‍ സര്‍വീസ്, അബ്ഷിര്‍ റിപ്പോര്‍ട്ട് എന്നീ വിന്‍ഡോകളിലൂടെ പ്രവേശിച്ച് വിസിറ്റേഴ്സ് റിപ്പോര്‍ട്ട് എന്ന മെനുവില്‍ ക്ലിക്ക് ചെയ്താല്‍ പ്രിന്റ് (ഡിജിറ്റല്‍ ഡോക്യുമെന്റ്) ലഭിക്കും.
അബ്ഷിറില്‍ ഇതോടൊപ്പം വിസിറ്റേഴ്സ് ഡിജിറ്റല്‍ ഐ.ഡി സേവനവും ആരംഭിച്ചിട്ടുണ്ട്. ഇതിന്റെ ഡിജിറ്റല്‍ ഡോക്യുമെന്റ് ഉണ്ടെങ്കില്‍ സന്ദര്‍ശന വിസയില്‍ എത്തുന്നവര്‍ക്ക് പാസ്പോര്ട്ട് കൈവശം വെക്കേണ്ട ആവശ്യമില്ല. വിസിറ്റ് വിസയില്‍ വരുന്നവര്‍ക്ക് പാസ്പോര്ട്ട് കൈവശം സൂക്ഷിക്കാതെ സൗദിയില്‍ എവിടെയും സന്ദര്‍ശനം നടത്താന്‍ ഡിജിറ്റല്‍ ഐഡി മതി. പരിശോധനാ ഉദ്യോഗസ്ഥര്‍ ആവശ്യപ്പെട്ടാല്‍ മൊബൈല്‍ ഫോണില്‍ ഡിജിറ്റല്‍ ഐഡി കാണിക്കാം.
വിമാനത്താവളങ്ങള്‍, തുറമുഖങ്ങള്‍, അതിര്‍ത്തി ചെക്‌പോയിന്റുകള്‍ എന്നിങ്ങനെ രാജ്യത്തേക്കുള്ള പ്രവേശന കവാടങ്ങളില്‍ വച്ച് ഇമിഗ്രേഷന്‍ നടപടികള്‍ പൂര്‍ത്തിയാക്കുമ്പോള്‍ ലഭിക്കുന്ന എന്‍ട്രി നമ്പര്‍ ഉപയോഗിച്ചാണ് അബ്ഷിര്‍ വഴി ഡിജിറ്റല്‍ ഐഡി കാര്‍ഡ് എടുക്കേണ്ടത്. സന്ദര്‍ശന വിസയില്‍ സൗദിയിലെത്തുന്നവരുടെ രാജ്യത്തിനകത്തെ യാത്രകളും ഇടപാടുകളും ഡിജിറ്റല്‍ ഐഡി കാര്‍ഡ് എളുപ്പമാക്കും.
അബ്ഷിര്‍ വഴി സൗദി ജവാസാത്ത് ഡയറക്ടറേറ്റ് പുതുതായി നാല് സേവനങ്ങള്‍ ആരംഭിച്ചതിലാണ് സന്ദര്‍ശകര്‍ക്കുള്ള ഡിജിറ്റല്‍ ഡോക്യുമെന്റ് എന്ന സേവനവും തുടങ്ങിയത്. പാസ്പോര്ട്ട് നഷ്ടപ്പെടുകയോ മോഷണം പോവുകയോ ചെയ്തതിനെ കുറിച്ച് അറിയിക്കല്‍, മുഖീം റിപ്പോര്‍ട്ട് എന്നിവയാണ് മറ്റു സേവനങ്ങള്‍.
ആഭ്യന്തര മന്ത്രാലയത്തിന്റെ മറ്റൊരു ഓണ്‍ലൈന്‍ സേവന പ്ലാറ്റ്ഫോം ആയ മുഖീമിലും ഇതോടൊപ്പം നാല് പുതിയ സര്‍വീസുകള്‍ കൂടി ആരംഭിച്ചിരുന്നു. തിരിച്ചറിയല്‍ കാര്‍ഡില്‍ വിവര്‍ത്തനം ചെയ്ത പേരിലെ തിരുത്തല്‍, ഇഖാമ നഷ്ടപ്പെട്ടതിനെ കുറിച്ച് അറിയിക്കല്‍, വിസകളെ കുറിച്ച അന്വേഷണവും വെരിഫിക്കേഷനും, തൊഴിലുടമകള്‍ക്കുള്ള അലെര്‍ട്ടുകള്‍ എന്നിവയാണിവ.
ആഭ്യന്തര മന്ത്രാലയത്തിന് കീഴിലെ പാസ്പോര്ട്ട് വിഭാഗത്തിന്റേത് ഉള്‍പ്പെടെ 400ഓളം സേവനങ്ങള്‍ അബ്ഷിര്‍ വഴി ലഭ്യമാണ്. വ്യക്തികള്‍ക്കുള്ള സേവനങ്ങള്‍ മാത്രമല്ല, സര്‍ക്കാര്‍-സ്വകാര്യ സ്ഥാപനങ്ങള്‍ക്കുള്ള സേവനങ്ങളും ഇതിലൂടെ ലഭിക്കുന്നു.
- പുതിയ ഇഖാമ എടുക്കല്‍
- ഇഖാമ പുതുക്കല്‍
- റീഎന്‍ട്രി
- ഫൈനല്‍ എക്സിറ്റ്
- സൗദി പാസ്പോര്‍ട്ടുകള്‍
- ഡിജിറ്റല്‍ രേഖകള്‍
- ഡിജിറ്റല്‍ രേഖകളുടെ വെരിഫിക്കേഷന്‍
- വാഹന വില്‍പന നടപടിക്രമങ്ങള്‍
- ഫാന്‍സി നമ്പര്‍ പ്ലേറ്റുകള്‍ക്കുള്ള ലേലം
- വാഹനാപകടങ്ങളുമായി ബന്ധപ്പെട്ട ട്രാഫിക് ഡയറക്ടറേറ്റ് റിപ്പോര്‍ട്ടില്‍ അപ്പീല്‍ നല്‍കല്‍
- വാഹനാപകടങ്ങളുമായി ബന്ധപ്പെട്ട കേസുകള്‍ ഒഴിവാക്കല്‍
- തോക്കുകളുടെ ഉടമസ്ഥാവകാശ മാറ്റം
- ഡ്രൈവിങ് ലൈസന്‍സ് ഇഷ്യു ചെയ്യല്‍
- ബൈക്ക് ഓടിക്കാന്‍ മറ്റുള്ളവര്‍ക്ക് അനുമതിപത്രം നല്‍കല്‍
- ബൈക്ക് രജിസ്ട്രേഷന്‍, രജിസ്ട്രേഷന്‍ പുതുക്കല്‍
- ബൈക്കുകളുടെ ഉടമസ്ഥാവകാശം മാറ്റല്‍
- റോഡ് ജോലികള്‍ക്കുള്ള പെര്‍മിറ്റ്
- ക്രിമിനല്‍ റെക്കോര്‍ഡ് റിപ്പോര്‍ട്ട്
- തിരിച്ചറിയല്‍ കാര്‍ഡ് കേടായാല്‍ പുതിയത് അനുവദിക്കല്‍
- കുടുംബാംഗങ്ങള്‍ക്ക് തിരിച്ചറിയല്‍ കാര്‍ഡ്
- സൗദി തിരിച്ചറിയല്‍ കാര്‍ഡ് തപാല്‍ വഴി എത്തിക്കല്‍
- സൗദി തിരിച്ചറിയല്‍ കാര്‍ഡ് ആക്ടിവേറ്റ് ചെയ്യല്‍
- സൗദി തിരിച്ചറിയല്‍ കാര്‍ഡ് പുതുക്കുന്നതിന് ഫോട്ടോ സമര്‍പ്പിക്കുന്നതിന് നൂതന സാങ്കേതികവിദ്യകള്‍ ഏര്‍പ്പെടുത്തല്‍
- പരിഷ്‌കരിച്ച ബയാനാതീ സേവനം
- പഴകിയ വാഹനങ്ങള്‍ രേഖകളില്‍ നിന്ന് നീക്കം ചെയ്യല്‍
- നവജാതശിശുക്കളുടെ ജനന രജിസ്ട്രേഷന്‍
