സ്പാനിഷ് സൂപ്പർ കോപ്പയിലെ (Spanish Super Copa) പുതിയ ജേതാക്കളെ നിശ്ചയിക്കുന്ന കലാശപ്പോരാട്ടത്തിൽ റയൽ മാഡ്രിഡും (Real Madrid) ബാഴ്സലോണയും (Barcelona) തമ്മിൽ എൽ ക്ലാസികോ (El Clasico) പോരാട്ടം. ഇത് തുടർച്ചയായി രണ്ടാം തവണയാണ് സ്പാനിഷ് സൂപ്പർ കപ്പിൻെറ ഫൈനലിൽ ഏറ്റുമുട്ടാൻ പോവുന്നത്. കഴിഞ്ഞ തവണ റയലിനെ വീഴ്ത്തി ബാഴ്സലോണയാണ് കിരീടം നേടിയത്.
സെമിഫൈനലിൽ അത്ലറ്റികോ മാഡ്രിഡിനെ പരാജയപ്പെടുത്തി ആദ്യം ഫൈനൽ ഉറപ്പിച്ചത് റയൽ മാഡ്രിഡാണ്. 8 ഗോളുകൾ പിറന്ന ത്രില്ലറിൽ 5-3നാണ് റയൽ വിജയം സ്വന്തമാക്കിയത്. അധികസമയത്ത് നേടിയ രണ്ട് ഗോളുകളുടെ ബലത്തിലായിരുന്നു ജയം. മറുഭാഗത്ത് ഒസാസുനയെ എതിരില്ലാത്ത രണ്ട് ഗോളുകൾക്ക് തോൽപ്പിച്ചാണ് ഫൈനലിലേക്ക് ബാഴ്സലോണയുടെ വരവ്.
ഈ സീസണിൽ ഇത് രണ്ടാം തവണയാണ് എൽ ക്ലാസികോ പോരാട്ടം നടക്കാൻ പോവുന്നത്. ലീഗ് ഘട്ടത്തിലെ മത്സരത്തിൽ റയൽ മാഡ്രിഡിനായിരുന്നു വിജയം. ബാഴ്സയുടെ തട്ടകത്തിൽ നടന്ന മത്സരമായിട്ടും അവർ 2-1ൻെറ തോൽവി വഴങ്ങി. ലാലിഗയിലും ഇത്തവണ റയൽ തന്നെയാണ് പോയൻറ് പട്ടികയിൽ തലപ്പത്തുള്ളത്. ബാഴ്സലോണ മൂന്നാം സ്ഥാനത്താണ്.
എൽ ക്ലാസികോയുടെ ചരിത്രത്തിൽ ഇതുവരെ ഇരുടീമുകളും തമ്മിൽ 255 മത്സരങ്ങളാണ് നടന്നിട്ടുള്ളത്. സ്പാനിഷ് സൂപ്പർ കോപ്പയിലെ പോരാട്ടം 256ാം എൽ ക്ലാസികോ മത്സരമാണ്. ഇരുടീമുകളും ഒപ്പത്തിനൊപ്പം തന്നെയാണ് വിജയം നേടിയിട്ടുള്ളത്. റയൽ മാഡ്രിഡ് 103 എൽ ക്ലാസികോ മത്സരങ്ങളും ബാഴ്സലോണ 100 മത്സരങ്ങളും വിജയിച്ചിട്ടുണ്ട്. 52 മത്സരങ്ങൾ സമനിലയിലായി.
എൽ ക്ലാസികോ മത്സരങ്ങളുടെ തുടക്കത്തിൽ റയൽ മാഡ്രിഡിന് വലിയ മേൽക്കൈ ഉണ്ടായിരുന്നു. എന്നാൽ ലയണൽ മെസി ക്ലബ്ബിലെത്തിയതിന് ശേഷം ബാഴ്സ കൂടുതൽ വിജയങ്ങൾ സ്വന്തമാക്കിയിട്ടുണ്ട്. 2000 മുതൽ 2015 വരെയുള്ള കാലഘട്ടത്തിൽ ആധിപത്യം പുലർത്തിയത് ബാഴ്സലോണയാണ്.
ഫൈനലിൽ ആര് വിജയിക്കുമെന്ന് പ്രവചിക്കുക അസാധ്യമായ കാര്യമാണ്. ടീമെന്ന നിലയിൽ ഇരുടീമുകളും ഒരുപോലെ കരുത്തുറ്റവരാണ്. ബാഴ്സ പരിശീലകൻ സാവി ഹെർണാണ്ടസിന് ഇത് അഭിമാനപ്പോരാട്ടമാണ്. റയൽ പരിശീലകൻ കാർലോ ആൻസലോട്ടിയും പുത്തൻ തന്ത്രങ്ങളുമായിട്ടായിരിക്കും കലാശപ്പോരാട്ടത്തിന് ഇറങ്ങുക.
സൗദി അറേബ്യയിലെ അൽ അവ്വൽ സ്റ്റേഡിയത്തിലാണ് ബാഴ്സയും റയലും തമ്മിലുള്ള സ്പാനിഷ് സൂപ്പർ കപ്പ് ഫൈനൽ നടക്കുക. ഇന്ത്യൻ സമയം തിങ്കളാഴ്ച പുലർച്ചെ 12.30നാണ് മത്സരം. ഫാൻ കോഡ് ആപ്പിലൂടെയും വെബ്സൈറ്റിലൂടെയും ഇന്ത്യയിൽ മത്സരം ലൈവായി കാണാൻ സാധിക്കും. ഇരുടീമുകളും ഫൈനലിൽ തകർപ്പൻ പ്രകടനം പുറത്തെടുക്കുമെന്ന കാര്യത്തിൽ സംശയമില്ല.
സൂപ്പർ കപ്പിലെ നിലവിലെ ജേതാക്കൾ ബാഴ്സലോണയാണ്. റയലിനെ പരാജയപ്പെടുത്തിയാണ് അവർ കിരീടം നേടിയിരുന്നത്. എന്നാൽ 2021-22 സീസണിൽ റയൽ മാഡ്രിഡാണ് കിരീടം നേടിയിരുന്നത്. സ്പാനിഷ് സൂപ്പർ കപ്പിൽ റയലും ബാഴ്സയും തമ്മിൽ 16 തവണ ഏറ്റുമുട്ടിയപ്പോൾ 9 തവണ റയൽ മാഡ്രിഡും 5 തവണ ബാഴ്സലോണയുമാണ് വിജയിച്ചിട്ടുള്ളത്.
