ഷാര്‍ജ: ദുബായ് റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ടിഎ) ഷാര്‍ജയിലേക്കുള്ള ബോട്ട് സര്‍വീസ് വരുന്ന ഓഗസ്റ്റ് നാലിന് വെള്ളിയാഴ്ച പുനരാരംഭിക്കും. 2019ല്‍ കോവിഡിന് മുമ്പാണ് ആദ്യമായി സര്‍വീസ് തുടങ്ങിയത്. ഇനി മുതല്‍ ആഴ്ചയില്‍ ഏഴ് ദിവസവും സര്‍വീസുണ്ടാവും.
ദുബായിലെ അല്‍ ഗുബൈബ മറൈന്‍ സ്‌റ്റേഷനും ഷാര്‍ജയിലെ അക്വേറിയം മറൈന്‍ സ്‌റ്റേഷനും ഇടയിലാണ് ഫെറി ഷട്ടില്‍ സര്‍വീസ്. രണ്ട് സ്റ്റേഷനുകള്‍ക്കിടയിലുള്ള യാത്രയ്ക്ക് ഏകദേശം 35 മിനിറ്റ് എടുക്കും.
തിങ്കള്‍ മുതല്‍ വ്യാഴം വരെ ഷാര്‍ജയില്‍ നിന്ന് രാവിലെ 7നും 8.30നും രണ്ട് പ്രഭാത യാത്രകളും ദുബായില്‍ നിന്ന് 7.45ന് ഒരു പ്രഭാത യാത്രയും ഉണ്ടാകും. വൈകുന്നേരം 4.45 നും 6.15 നും ഷാര്‍ജയില്‍ നിന്ന് രണ്ട് സര്‍വീസുകളും 4, 5.30, 7ന് ദുബായില്‍ നിന്ന് മൂന്ന് സര്‍വീസുകളും ഉണ്ടാകും.
വെള്ളിയാഴ്ച മുതല്‍ ഞായര്‍ വരെ ഉച്ചയ്ക്ക് മുതല്‍ ഓരോ ഭാഗത്തുനിന്നും മൂന്ന് യാത്രകള്‍ വീതമുണ്ടാകും. ഷാര്‍ജയില്‍ നിന്നുള്ള അധിക പുറപ്പെടല്‍ സമയം ഉച്ചയ്ക്ക് 2, 4, 6 എന്നീ സമയങ്ങളില്‍ ആയിരിക്കും. ദുബായില്‍ നിന്നുള്ള യാത്രകള്‍ 3 മണിക്കും 5 മണിക്കും രാത്രി 8 മണിക്കും ആരംഭിക്കും.
ടിക്കറ്റ് നിരക്ക് സില്‍വര്‍ ക്ലാസിന് 15 ദിര്‍ഹവും ഗോള്‍ഡ് ക്ലാസിന് 25 ദിര്‍ഹവുമാണ്. അംഗപരിമിതര്‍ക്കും അഞ്ച് വയസ്സിന് താഴെയുള്ള കുട്ടികള്‍ക്കും സൗജന്യമായിരിക്കും.
അതേസമയം, ഓഗസ്റ്റ് ഒന്നു മുതല്‍ അജ്മാനിലെ ഇന്‍ഡസ്ട്രിയല്‍-റോള റൂട്ടില്‍ (എസ്എച്ച്‌ജെ-2) ബസ് സര്‍വീസ് ഉണ്ടായിരിക്കില്ലെന്ന് അജ്മാന്‍ ട്രാന്‍സ്‌പോര്‍ട്ട് അതോറിറ്റി അറിയിച്ചു. അജ്മാനില്‍ നിന്ന് ഈ മേഖലയിലേക്ക് യാത്ര ചെയ്യുന്നവര്‍ യാത്രയുടെ ഭാഗമായി രണ്ട് കണക്റ്റിംഗ് ബസ്സുകളില്‍ പോകേണ്ടിവരും.
ഷാര്‍ജയിലെ ഏറ്റവും തിരക്കേറിയതും ജനപ്രിയവുമായ സ്ഥലങ്ങളില്‍ ഒന്നാണ് റോള. ബസ് റൂട്ട് റദ്ദാക്കിയതിനാല്‍ യാത്രക്കാര്‍ക്ക് എമിറേറ്റിലെ ഇന്‍ഡസ്ട്രിയല്‍ ഏരിയയില്‍ നിന്ന് ഷാര്‍ജയിലെ റോളയിലേക്ക് എജെ2 ബസ്സില്‍ (ഇന്‍ഡസ്ട്രിയല്‍ ലൈന്‍) യാത്ര ചെയ്യാമെന്നും തുടര്‍ന്ന് അല്‍ മുസല്ല ബസ് സ്റ്റേഷനിലെ ഷാര്‍ജ ലൈനിലേക്ക് (എസ്എച്ച്‌ജെ-1) മാറാമെന്നും അജ്മാന്‍ ട്രാന്‍സ്‌പോര്‍ട്ട് അറിയിച്ചു.
