ദുബായ്: ഗുജറാത്തിലെ കാണ്ട്‌ലയില്‍ മെഗാ കണ്ടെയ്‌നര്‍ ടെര്‍മിനല്‍ വികസിപ്പിക്കാന്‍ ദുബായ് ഡിപി വേള്‍ഡ് രംഗത്ത്. ഇതിനായി 510 മില്യണ്‍ ഡോളറിന്റെ നിക്ഷേപം ഡിപി വേള്‍ഡ് പ്രഖ്യാപിച്ചു. ദീന്‍ദയാല്‍ തുറമുഖ അതോറിറ്റിയും ദുബായ് ഡിപി വേള്‍ഡ് അധികൃതരും ഇത് സംബന്ധിച്ച ധാരണാപത്രത്തില്‍ ഒപ്പുവച്ചു.
ഇന്ത്യയുടെ പടിഞ്ഞാറന്‍ തീരത്ത് പ്രതിവര്‍ഷം 2.19 ദശലക്ഷം ടിഇയു (20 ഫൂട്ട് യൂണിറ്റ്) കണ്ടെയ്‌നര്‍ കൈകാര്യം ചെയ്യുന്നതിനുള്ള സൗകര്യം വികസിപ്പിക്കുന്നതിനും ടെര്‍മിനല്‍ പ്രവര്‍ത്തിപ്പിക്കുന്നതിനും പരിപാലിക്കുന്നതിനുമാണ് ഡിപി വേള്‍ഡ് ദീന്‍ദയാല്‍ തുറമുഖ അതോറിറ്റിയുമായി കരാറിലെത്തിയത്.
ജനുവരിയില്‍ മെഗാ കണ്ടെയ്‌നര്‍ ടെര്‍മിനല്‍ വികസിപ്പിക്കുന്നതിന് ഹിന്ദുസ്ഥാന്‍ ഇന്‍ഫ്രാലോഗ് പ്രൈവറ്റ് ലിമിറ്റഡിന് ദീന്‍ദയാല്‍ തുറമുഖ അതോറിറ്റി അനുമതി നല്‍കിയിരുന്നു. കേന്ദ്ര സര്‍ക്കാരിന്റെ വന്‍കിട നിക്ഷേപ സംഭരംഭമായ നാഷനല്‍ ഇന്‍വെസ്റ്റ്‌മെന്റ് ആന്റ് ഇന്‍ഫ്രാസ്ട്രക്ചര്‍ ഫണ്ടും ഡിപി വേള്‍ഡും തമ്മിലുള്ള സംയുക്ത സംരംഭമാണ് ഹിന്ദുസ്ഥാന്‍ ഇന്‍ഫ്രാലോഗ് പ്രൈവറ്റ് ലിമിറ്റഡ്.
ഡിപി വേള്‍ഡ് 30 വര്‍ഷത്തേക്ക് ബിഒടി (ബില്‍ഡ്-ഓപറേറ്റ്-ട്രാന്‍സ്ഫര്‍) അടിസ്ഥാനത്തിലാണ് കാണ്ട്‌ലയിലെ മെഗാ കണ്ടെയ്‌നര്‍ ടെര്‍മിനല്‍ ഏറ്റെടുത്ത് വികസിപ്പിക്കുന്നത്. ആവശ്യമെങ്കില്‍ 20 വര്‍ഷത്തേക്ക് കൂടി കരാര്‍ നീട്ടാനുള്ള വ്യവസ്ഥകളും കരാറില്‍ ഉള്‍പ്പെടുത്തിയിട്ടുണ്ട്. പൊതു-സ്വകാര്യ പങ്കാളിത്തത്തിലൂടെ (പിപിപി) ഏകദേശം 510 മില്യണ്‍ ഡോളര്‍ ചെലവില്‍ നിലവിലുള്ള ദീന്‍ദയാല്‍ തുറമുഖത്തിന് സമീപം ട്യൂണ-ടെക്രയില്‍ ഒരു മെഗാ കണ്ടെയ്‌നര്‍ ടെര്‍മിനല്‍ നിര്‍മിക്കുന്നതാണ് പദ്ധതി. നിര്‍മാണം പൂര്‍ത്തിയാക്കി ടെര്‍മിനല്‍ പ്രവര്‍ത്തിപ്പിച്ച് നിശ്ചിത വര്‍ഷത്തിനു ശേഷം ഇന്ത്യക്ക് കൈമാറും.
2027ല്‍ ടെര്‍മിനലിന്റെ വികസനം പൂര്‍ത്തിയാവും. ഇതോടെ വന്‍തോതില്‍ കണ്ടെയ്‌നറുകള്‍ വഹിക്കാന്‍ ശേഷിയുള്ള അത്യന്താധുനിക ചരക്ക് കപ്പലുകള്‍ തുറമുഖത്തേക്ക് അടുപ്പിക്കാന്‍ കഴിയും. കണ്ടെയ്‌നറുകള്‍ കൈകാര്യം ചെയ്യാനുള്ള സൗകര്യങ്ങളും ഇതോടനുബന്ധിച്ച് സജ്ജമാക്കുന്നുണ്ട്.
ടെര്‍മിനലിനെ റോഡുകള്‍, ഹൈവേകള്‍, റെയില്‍വേകള്‍, കണ്ടെയ്‌നര്‍ നീക്കത്തിന് മാത്രമായുള്ള പാതകള്‍ എന്നിവയുടെ ശൃംഖലയിലൂടെ ഉള്‍നാടുകളിലേക്ക് ബന്ധിപ്പിക്കും. വടക്കന്‍, പടിഞ്ഞാറന്‍, മധ്യ ഇന്ത്യ എന്നിവിടങ്ങളില്‍ നിന്നുള്ള ചരക്ക് നീക്കം സുഗമമാക്കുന്നതിന് ഇത് സഹായിക്കും. വര്‍ധിച്ചുവരുന്ന ഈ ആവശ്യം പൂര്‍ത്തീകരിക്കുന്നതിനൊപ്പം മേഖലകളിലെ ബിസിനസുകളെ ആഗോള വിപണികളുമായി ബന്ധിപ്പിക്കാനും ടെര്‍മിനല്‍ ഉപകരിക്കും.
ഡിപി വേള്‍ഡ് നിലവില്‍ ഇന്ത്യയില്‍ അഞ്ച് കണ്ടെയ്‌നര്‍ ടെര്‍മിനലുകള്‍ പ്രവര്‍ത്തിപ്പിക്കുന്നുണ്ട്. ഇതില്‍ രണ്ടെണ്ണം മുംബൈയിലാണ്. കൊച്ചി, ചെന്നൈ, മുന്ദ്ര എന്നിവിടങ്ങളില്‍ ഒന്ന് വീതം കണ്ടെയ്‌നര്‍ ടെര്‍മിനലുകളും ഡിപി വേള്‍ഡ് ആണ് കൈകാര്യം ചെയ്യുന്നത്.
