ദോഹ: മാസങ്ങളായി തുടരുന്ന പലസ്തീന്‍- ഇസ്രായേല്‍ സംഘര്‍ഷത്തിന് അറുതി വരുത്താന്‍ അമേരിക്കന്‍ പ്രസിഡന്റ് ജോ ബൈഡന്‍ മുന്നോട്ടുവച്ച വെടിനിര്‍ത്തല്‍ കരാര്‍ അംഗീകരിച്ചില്ലെങ്കില്‍ ഖത്തറില്‍ കഴിയുന്ന ഹമാസിന്റെ മുതിര്‍ന്ന നേതാക്കളെ അറസ്റ്റ് ചെയ്യുമെന്ന് ഈജിപ്തും ഖത്തറും ഹമാസിനെ ഭീഷണിപ്പെടുത്തിയെന്ന് റിപ്പോര്‍ട്ട്. ഗാസയില്‍ വെടിനിര്‍ത്തലിനും ഇസ്രായേലി ബന്ദികളെ മോചിപ്പിക്കുന്നതിനുമായി വൈറ്റ് ഹൗസ് അവതരിപ്പിച്ച കരാറില്‍ ഒപ്പുവെക്കാന്‍ ദോഹയിലെ ഹമാസിന്റെ നേതൃത്വത്തിന്മേല്‍ രണ്ട് മധ്യസ്ഥ രാജ്യങ്ങളും സമ്മര്‍ദ്ദം ചെലുത്തിയതായി വാള്‍സ്ട്രീറ്റ് ജേണലാണ് കഴിഞ്ഞ ദിവസം റിപ്പോര്‍ട്ട് ചെയ്തത്.
ഹമാസിനെ കൊണ്ട് കരാര്‍ അംഗീകരിപ്പിക്കാന്‍ അവര്‍ക്കു മേല്‍ സമ്മര്‍ദ്ദം ചെലുത്തുന്നതിന്റെ ഭാഗമായിട്ടാണ് അറസ്റ്റ് ഭീഷണി മുഴക്കിയതെന്നും റിപ്പോര്‍ട്ടില്‍ പറയുന്നു. ഇതുമായി ബന്ധപ്പെട്ട് കഴിഞ്ഞ തിങ്കളാഴ്ച ഖത്തര്‍ അമീര്‍ ശെയ്ഖ് തമീം ബിന്‍ ഹമദ് അല്‍ താനിയുമായി യുഎസ് പ്രസിഡന്റ് ഫോണില്‍ സംസാരിക്കുകയും കരാറിന് ഹമാസിന്റെ അംഗീകാരം ഉറപ്പാക്കാന്‍ ഉചിതമായ എല്ലാ നടപടികളും സ്വീകരിക്കണമെന്ന് ഖത്തറിനോട് അഭ്യര്‍ത്ഥിക്കുകയും ചെയ്തിരുന്നു.
ഇതിന്റെ പശ്ചാത്തലത്തിലാണ് കരാര്‍ അംഗീകരിച്ചില്ലെങ്കില്‍ ഹമാസ് നേതാക്കള്‍ക്കെതിരേ നടപടിയെക്കുമെന്ന രീതിയില്‍ ഖത്തറും ഈജിപ്തും ഹമാസിനെ ഭീഷണിപ്പെടുത്തിയതായി വാള്‍സ്ട്രീറ്റ് ജേണല്‍ വാര്‍ത്ത നല്‍കിയത്. ഈ വിഷയത്തിലെ മേഖലയിലെ മധ്യസ്ഥരെ ഉദ്ധരിച്ചായിരുന്നു റിപ്പോര്‍ട്ട്. ഹമാസ് നേതാക്കളുടെ സ്വത്തുക്കള്‍ മരവിപ്പിക്കുമെന്നും ഖത്തര്‍ തലസ്ഥാനത്ത് നിന്ന് പുറത്താക്കുമെന്നും വേണ്ടിവന്നാല്‍ അറസ്റ്റ് ചെയ്യുമെന്നുമാണ് രണ്ട് രാജ്യങ്ങളും ഹമാസിനെ ഭീഷണിപ്പെടുത്തിയതെന്നും റിപ്പോര്‍ട്ടില്‍ പറയുന്നു.
എന്നാല്‍ ഖത്തറും ഈജിപ്തും തങ്ങളുടെ നേതാക്കളെ ഭീഷണിപ്പെടുത്തിയതായുള്ള വാള്‍സ്ട്രീറ്റ് ജേണല്‍ വാര്‍ത്ത ഹമാസ് വൃത്തങ്ങള്‍ തള്ളി. സൗദി അറേബ്യ കേന്ദ്രമായി പ്രവര്‍ത്തിക്കുന്ന അല്‍ അറബിയ്യ ചാനലിന് നടത്തിയ പ്രസ്താവനയിലാണ് ഹമാസ് നേതാക്കള്‍ ഇക്കാര്യം നിഷേധിച്ചത്.
മെയ് 31ന് വൈറ്റ് ഹൗസില്‍ നടത്തിയ പ്രസംഗത്തിലാണ് യുഎസ് പ്രസിഡന്റ് ബൈഡന്‍ പുതിയ വെടിനിര്‍ത്തല്‍ നിര്‍ദ്ദേശം മുന്നോട്ടുവച്ചത്. ഇസ്രായേല്‍ ആറാഴ്ചത്തെ വെടിനിര്‍ത്തല്‍ പ്രഖ്യാപിക്കുകയും ഹമാസ് ബന്ദികളാക്കിയവരില്‍ സ്ത്രീകളെയും പ്രായമായവരെയും രോഗികളെയും മോചിപ്പിക്കുകയും ചെയ്യുന്നതാണ് നിര്‍ദ്ദേശത്തിന്റെ ആദ്യ ഘട്ടം. തുടര്‍ന്നുള്ള രണ്ട് ഘട്ടങ്ങളിലായി ചര്‍ച്ചകളിലൂടെ മുഴുവന്‍ ബന്ദികളുടെയും മോചനവും ശാശ്വത വെടിനിര്‍ത്തലും സാധ്യമാക്കാമെന്നും നിര്‍ദ്ദേശത്തില്‍ പറഞ്ഞിരുന്നു.
തുടക്കത്തില്‍ യുഎസ് നിര്‍ദ്ദേശത്തോട് അനുകൂലമായി പ്രതികരിച്ചിരുന്ന ഹമാസ്, പിന്നീട് അക് അംഗീകരിക്കില്ലെന്ന നിലപാടിലാണെന്നാണ് റിപ്പോര്‍ട്ട്. ഇസ്രായേലാവട്ടെ, ഹമാസിനെ പൂര്‍ണമായി ഇല്ലായ്മ ചെയ്ത ശേഷമേ വെടിനിര്‍ത്തലിന് ഉള്ളൂ എന്ന നിലപാടിലാണ്. ഈ സാഹചര്യത്തിലാണ് ഹമാസിനു മേല്‍ സമ്മര്‍ദ്ദം ചെലുത്തണമെന്ന് അഭ്യര്‍ഥന യുഎസ് പ്രസിഡന്റ് ഖത്തര്‍ അമീറിനോട് നടത്തിയതെന്നാണ് റിപ്പോര്‍ട്ട്.
