അദാനി ഗ്രൂപ്പും മഹാരാഷ്ട്ര സർക്കാരും സംയുക്തമായി നടപ്പാക്കുന്ന ധാരാവി പുനർവികസന പദ്ധതിയിൽ (DRPPL) നിർണായക ചുവടുവെപ്പ്. ഏഷ്യയിലെ ഏറ്റവും വലിയ ചേരിയെന്ന് അറിയപ്പെടുന്ന ധാരാവി മേഖലയുടെ മുഖച്ഛായ അപ്പാടെ മാറ്റുന്ന വികസന പ്രവർത്തനങ്ങൾ നടപ്പാക്കുന്നതിനായി ഒരു ആഗോള സംഘവുമായി ധാരണയിലെത്തിയെന്ന് അധികൃതർ അറിയിച്ചു.
നിരവധി സാമൂഹിക ഭവന പദ്ധതികൾക്ക് രൂപം നൽകിയ ആ‌ർക്കിടെക്റ്റ് ആയ ഹഫീസ് കോൺട്രാക്ടർ, അമേരിക്കയിൽ നിന്നുള്ള ഡിസൈൻ സ്ഥാപനമായ സസാക്കി, ബ്രിട്ടണിൽ നിന്നുള്ള കൺസൾട്ടൻസി സ്ഥാപനമായ ബറോ ഹപ്പോൾഡ് എന്നിവർ ഉൾപ്പെടുന്ന ആഗോള സംഘത്തെയാണ് ധാരാവി പുനർവികസനവുമായി ബന്ധപ്പെട്ട പ്രവർത്തനങ്ങൾക്കായി നിയോഗിച്ചിരിക്കുന്നത്. അദാനി ഗ്രൂപ്പിന്റെയും മുംബൈ ചേരി പുനരധിവാസ അതോറിറ്റിയുടെയും സംയുക്ത സംരംഭമായ ധാരാവി റീഡെവലപ്മെന്റ് പ്രോജക്ട് പ്രൈവറ്റ് ലിമിറ്റഡ് (ഡിആർപിപിഎൽ) ആണ് ഇക്കാര്യം അറിയിച്ചത്.
ധാരാവിയിൽ നിലവിലുള്ള ചേരികൾ പൊളിച്ചുമാറ്റി പകരം നിർമിക്കുന്ന ഫ്ലാറ്റുകളിലെ ഒരു യൂണിറ്റിന് (വീട്) ചുരുങ്ങിയത് 350 ചതുരശ്രയടി വിസ്തൃതി ഉണ്ടായിരിക്കുമെന്ന് ഡിആർപിപിഎൽ അധികൃതർ വ്യക്തമാക്കി. പ്രത്യേകം ശുചിമുറികളും അടുക്കളയും ഉൾപ്പെടെയാണിത്. മുംബൈ നഗരത്തിൽ ചേരി നിർമാർജന പദ്ധതികളുടെ ഭാഗമായി ഇതിനകം നിർമിച്ചിട്ടുള്ള വീടുകളേക്കാൾ 17 ശതമാനം അധിക വിസ്തൃതി ധാരാവിയിൽ നിർമിക്കുന്ന പുതിയ ഫ്ലാറ്റുകളിൽ ഉണ്ടാകുമെന്നും ഡിആർപിപിഎൽ അറിയിച്ചു.
നേരത്തെയുള്ള ചേരി നിർമാർജന പദ്ധതികളുടെ ഭാഗമായി നിർമിച്ച വീടുകൾക്ക് 269 ചതുരശ്ര അടിയായിരുന്നു വിസ്തൃതി ഉണ്ടായിരുന്നത്. എന്നാൽ 2018ൽ പ്രധാനമന്ത്രി ആവാസ് യോജനയുമായി സഹകരിച്ച് ചേരി നിർമാജന പദ്ധതികൾ തയ്യാറാക്കാൻ ആരംഭിച്ചതോടെ ഇത്തരത്തിൽ നിർമിക്കുന്ന വീടുകളുടെ വിസ്തൃതി 315 മുതൽ 322 ചതുരശ്ര അടിയിലേക്ക് ഉയർന്നു.
അദാനി പ്രോപ്പർട്ടീസ്
അദാനി ഗ്രൂപ്പിന്റെ റിയൽ എസ്റ്റേറ്റ് ഡെവലപ്മെന്റ് കമ്പനിയാണ് അദാനി പ്രോപ്പർട്ടീസ്. 2022 നവംബറിലായിരുന്നു ധാരാവിയിലെ 600 ഏക്കർ വിസ്തൃതിയിലുള്ള ചേരി പ്രദേശം വികസിപ്പിക്കാനുള്ള കരാർ അദാനി പ്രോപ്പർട്ടീസ് കരസ്ഥമാക്കിയത്. ധാരാവിയുടെ വികസനത്തിനായി അദാനി ഗ്രൂപ്പ് സമർപ്പിച്ച 5,100 കോടിയോളം രൂപയുടെ പദ്ധതി 2023 ജൂലൈയിൽ മഹാരാഷ്ട്ര സർക്കാ‌ർ അംഗീകരിച്ചു.
ഡിആർപിപിഎൽ
ധാരാവിയുടെ വികസന പ്രവർത്തനങ്ങൾക്കായി മഹാരാഷ്ട്ര സംസ്ഥാന സർക്കാരും അദാനി പ്രോപ്പർട്ടീസും സംയുക്തമായാണ് ധാരാവി റീഡെവലപ്മെന്റ് പ്രോജക്ട് പ്രൈവറ്റ് ലിമിറ്റഡ് എന്ന കമ്പനി രൂപീകരിച്ചത്. ഇതിന്റെ 80 ശതമാനം ഓഹരി വിഹിതം അദാനി ഗ്രൂപ്പിനും 20 ശതമാനം ഓഹരി വിഹിതം മഹാരാഷ്ട്ര സർക്കാരിന്റേയും കൈവശമാണുള്ളത്. അതേസമയം 2000 ജനുവരി 1ന് മുൻപ്, ധാരാവിയിൽ പാർപ്പിടം ഉള്ളവാരാണെന്ന് തെളിയിക്കുന്ന രേഖകൾ സമർപ്പിക്കുന്നവർക്കാണ് ഡിആർപിപിഎൽ നടപ്പാക്കുന്ന പദ്ധതിയുടെ ഭാഗമായി പുതിയ വീട് ലഭിക്കുക.
