അബുദാബി: യുഎഇയില്‍ ആവിഷ്‌കരിച്ച നിര്‍ബന്ധ തൊഴില്‍നഷ്ട ഇന്‍ഷുറന്‍സ് പദ്ധതിയില്‍ ചേരാനുള്ള സമയപരിധി ഈ മാസം അവസാനിക്കും. സപ്തംബര്‍ 30 നകം രജിസ്റ്റര്‍ ചെയ്യാത്തവരില്‍ നിന്ന് ഒക്ടോബര്‍ ഒന്നുമുതല്‍ 400 ദിര്‍ഹം പിഴ ചുമത്തുമെന്ന് മാനവവിഭവശേഷി, സ്വദേശിവല്‍ക്കരണ മന്ത്രാലയം ഓര്‍മിപ്പിച്ചു.
പിഴ അടച്ചില്ലെങ്കില്‍ പുതിയ വര്‍ക്ക് പെര്‍മിറ്റ് ലഭിക്കില്ല എന്നതിനാല്‍ മറ്റൊരു ജോലിയില്‍ ചേരാന്‍ കഴിയാതെ വരികയും ചെയ്യും. രാജ്യത്ത എല്ലാ തൊഴിലാളികളും നിര്‍ബന്ധമായും തൊഴില്‍നഷ്ട ഇന്‍ഷുറന്‍സില്‍ ചേരേണ്ടതുണ്ട്. നിക്ഷേപകര്‍, വീട്ടുജോലിക്കാര്‍, താല്‍ക്കാലിക കരാര്‍ തൊഴിലാളികള്‍, 18 വയസ്സിന് താഴെയുള്ള താമസക്കാര്‍, റിട്ടയര്‍മെന്റ് പെന്‍ഷന്‍ നേടുന്നവര്‍, പുതിയ ജോലി ആരംഭിച്ചവര്‍, വിരമിച്ചവര്‍ എന്നിവരെ മാത്രമാണ് ഇതില്‍ നിന്ന് ഒഴിവാക്കിയിട്ടുള്ളത്.
രജിസ്റ്റര്‍ ചെയ്യുന്നതിനുള്ള സമയപരിധി സപ്തംബര്‍ 30 വരെ നീട്ടിനല്‍കുകയായിരുന്നു. 2023 ജൂണ്‍ 30 മുതലാണ് രജിസ്‌ട്രേഷന്‍ ആരംഭിച്ചത്. ഇതുവരെ 50 ലക്ഷത്തോളം ജീവനക്കാര്‍ പദ്ധതിയില്‍ ചേര്‍ന്നു. ജോലി നഷ്ടപ്പെട്ടാല്‍ അവസാന ആറ് മാസത്തെ ശരാശരി അടിസ്ഥാന ശമ്പളത്തിന്റെ 60 ശതമാനം മൂന്ന് മാസത്തേക്ക് ജീവനക്കാരന് നഷ്ടപരിഹാരം ലഭിക്കുന്നതാണ് തൊഴില്‍നഷ്ട ഇന്‍ഷുറന്‍സ് പദ്ധതി. ജോലി നഷ്ടമായാല്‍ പുതിയ ജോലി കണ്ടെത്തുന്നതിനായി രാജ്യത്ത് പിടിച്ചുനില്‍ക്കാന്‍ ഈ തുക ഉപകരിക്കും.
ഇന്‍വോലന്ററി ലോസ് ഓഫ് എംപ്ലോയ്‌മെന്റ് എന്നും തൊഴില്‍നഷ്ട ഇന്‍ഷുറന്‍സ് പദ്ധതി അറിയപ്പെടുന്നു. പ്രതിമാസം 5 ദിര്‍ഹവും വാറ്റുമാണ് ഇന്‍ഷുറന്‍സ് പ്രീമിയം ആയി അടയ്‌ക്കേണ്ടത്. പ്രതിമാസ, ത്രൈമാസ, അര്‍ധ വാര്‍ഷിക, വാര്‍ഷിക അടിസ്ഥാനത്തില്‍ ഇന്‍ഷുറന്‍സ് തുക അടയ്ക്കാന്‍ സൗകര്യമുണ്ട്. 16,000 ദിര്‍ഹത്തിന് മുകളില്‍ അടിസ്ഥാന ശമ്പളം നേടുന്ന ജീവനക്കാര്‍ പ്രതിമാസം 10 ദിര്‍ഹം നല്‍കേണ്ടതുണ്ട്. ഇവര്‍ക്കും നാല് ഓപ്ഷനുകളില്‍ പണമടയ്ക്കാവുന്നതാണ്. അധിക ഇന്‍ഷുറന്‍സ് ആനുകൂല്യങ്ങള്‍ സബ്‌സ്‌ക്രൈബ് ചെയ്യാന്‍ തൊഴിലാളികള്‍ക്ക് അവകാശമുണ്ട്. തൊഴില്‍നഷ്ട ഇന്‍ഷുറന്‍സ് സ്‌കീമില്‍ രജിസ്റ്റര്‍ ചെയ്യേണ്ടത് ജീവനക്കാരന്റെ ഉത്തരവാദിത്തമാണ്. തൊഴിലുടമയ്ക്ക് ഇക്കാര്യത്തില്‍ ബാധ്യതയില്ല. മൂന്ന് മാസത്തിലധികം പ്രീമിയം അടയ്ക്കാതിരുന്നാല്‍ 200 ദിര്‍ഹം പിഴ ഈടാക്കും.
നഷ്ടപരിഹാരം ക്ലെയിം ചെയ്യുന്നതിന്, ജീവനക്കാരന് തുടര്‍ച്ചയായി 12 മാസത്തില്‍ കുറയാത്ത കാലയളവില്‍ പ്രീമിയം അടച്ചിരിക്കണം. ജോലി നഷ്ടമായി 30 ദിവസത്തിനുള്ളില്‍ നഷ്ടപരിഹാരം ആവശ്യപ്പെട്ട് അപേക്ഷ സമര്‍പ്പിക്കണം. മറ്റൊരു ജോലിയില്‍ ചേരുന്നതുവരെയുള്ള ദിവസത്തിനാണ് നഷ്ടരിഹാരം ലഭിക്കുക. ജോലി നഷ്ടമായി രാജ്യംവിടുന്നത് വരെയുള്ള ദിവസവും തുക ലഭിക്കും. അതായത്, ജീവനക്കാരന് മറ്റൊരു ജോലിയില്‍ ചേരുന്ന തീയതി മുതലും രാജ്യംവിട്ട ദിവസം മുതലും നഷ്ടപരിഹാരം ലഭിക്കില്ല.
തൊഴിലാളികള്‍ക്ക് ഇന്‍വോലന്ററി ലോസ് ഓഫ് എംപ്ലോയ്‌മെന്റ് എന്ന ഇന്‍ഷുറന്‍സ് വെബ്‌സൈറ്റ് www.iloe.ae വഴിയും അതിന്റെ ആപ്പ്, എടിഎമ്മുകള്‍, ബിസിനസ് സര്‍വീസ് സെന്ററുകള്‍, അല്‍ അന്‍സാരി എക്‌സ്‌ചേഞ്ച്, ബാങ്കിങ് ആപ്ലിക്കേഷനുകള്‍, ടെലികോം കമ്പനികളുടെ ബില്ലുകള്‍, ടെക്സ്റ്റ് മെസേജുകള്‍ എന്നിവയിലൂടെയും പദ്ധതിയില്‍ ചേരാവുന്നതാണ്.
