കുവൈറ്റ് സിറ്റി: വീട്ടില്‍ കഞ്ചാവ് ചെടികള്‍ കൃഷി ചെയ്ത് വളര്‍ത്തിയ കേസില്‍ കുവൈറ്റിലെ രാജകുടുംബാംഗം ഉള്‍പ്പെടെ നാലു പേരെ രാജ്യത്തെ മയക്കുമരുന്ന് വിരുദ്ധ ജനറല്‍ അഡ്മിനിസ്ട്രേഷന്‍ നടത്തിയ പരിശോധനയില്‍ പിടിയിലായി. മറ്റു മൂന്നു പേര്‍ ഏഷ്യന്‍ പൗരത്വമുള്ള യുവാക്കളാണ്. ഇവരുടെ കൈയില്‍ നിന്ന് മയക്കുമരുന്ന് ശേഖരം കണ്ടെത്തിയതായും പോലീസ് അറിയിച്ചു.
വിവിധ വലുപ്പത്തിലുള്ള 270 കഞ്ചാവ് തൈകള്‍, 5,130 കിലോഗ്രാം സംസ്‌കരിച്ച കഞ്ചാവ്, 4,150 ക്യാപ്റ്റഗണ്‍ ഗുളികകള്‍, 620 കഞ്ചാവ് സിഗരറ്റുകള്‍, 50 ഗ്രാം ഹാഷിഷ്, 21 ഗ്രാം കൊക്കൈന്‍, ആറ് കാന്‍ കഞ്ചാവ് ഓയില്‍, 10 കുപ്പി മദ്യം തുടങ്ങിയ സാധനങ്ങളും ഇവരില്‍ നിന്ന് പിടിച്ചെടുത്തതായി സെക്യൂരിറ്റി റിലേഷന്‍സ് ആന്റ് മീഡിയ ഡിപ്പാര്ട്ട്മെന്റ് പുറത്തിറക്കിയ പ്രസ്താവനയില്‍ അറിയിച്ചു. കുറ്റാരോപിതരായ വ്യക്തികളെ കണ്ടുകെട്ടിയ വസ്തുക്കള്‍ സഹിതംം തുടര്‍നടപടികള്‍ക്കായി നാര്‍ക്കോട്ടിക് പ്രോസിക്യൂഷനിലേക്ക് റഫര്‍ ചെയ്തതായും അധികൃതര്‍ അറിയിച്ചു. മയക്കുമരുന്നുകളുടെ ഉല്‍പ്പാദനവും വിതരണവും കണ്ടെത്തി തടയുന്നതിന് ശക്തമായ നടപടികളാണ് സര്‍ക്കാര്‍ സ്വീകരിച്ചുവരുന്നതെന്നും ഇവയുമായി ബന്ധപ്പെട്ട് പിടിക്കപ്പെടുന്നവര്‍ എത്ര ഉന്നതരായാലും നിയമത്തിന്റെ മുന്നില്‍ നിന്ന് അവര്‍ക്ക് രക്ഷപ്പെടാനാവില്ലെന്നും പ്രസ്താവനയില്‍ വ്യക്തമാക്കി.
അതിനിടെ, മറ്റ് വ്യത്യസ്ത സംഭവങ്ങളിലായി നാല് പേര്‍ ലഹരിമരുന്നുമായി കുവൈറ്റില്‍ പിടിയിലായതായും ആഭ്യന്തര മന്ത്രാലയത്തിലെ സെക്യൂരിറ്റി റിലേഷന്‍സ് ആന്‍ഡ് മീഡിയ ഡിപ്പാര്ട്ട്മെന്റ് അറിയിച്ചു. അഹമ്മദി സെക്യൂരിറ്റി ഡയറക്ടറേറ്റിന് കീഴിലുള്ള പൊതു സുരക്ഷാ വിഭാഗമാണ് വിവിധ സംഭവങ്ങളിലായി പ്രതികളെ പിടികൂടിയത്. മൂന്ന് വ്യത്യസ്ത സംഭവങ്ങളിലായി പിടിയിലായവരില്‍ നിന്ന് 2,811 സൈക്കോട്രോപിക് ഗുളികകള്‍, മയക്കുമരുന്ന് അടങ്ങിയ ആറ് ബാഗുകള്‍, മയക്കുമരുന്ന് വില്‍പ്പനയില്‍ നിന്നുള്ള വരുമാനമെന്ന് കരുതുന്ന പണം എന്നിവ കണ്ടെത്തിയതായും അധികൃതര്‍ അറിയിച്ചു. ഇവരെ അറസ്റ്റ് ചെയ്യുകയും സാധനങ്ങള്‍ കണ്ടുകെട്ടുകയും ചെയ്തു. കുറ്റാരോപിതരായ വ്യക്തികളെയും കണ്ടുകെട്ടിയ വസ്തുക്കളും തുടര്‍ നിയമ നടപടികള്‍ക്കായി ബന്ധപ്പെട്ട അധികാരികള്‍ക്ക് കൈമാറിയതായും അധികൃതര്‍ അറിയിച്ചു.
