യൂറോ കപ്പ് യോഗ്യത മത്സരങ്ങളിലെ (Eurocup Qualifiers) മിന്നും ഫോം തുടർന്ന് പോർച്ചുഗൽ (Portugal Football). യോഗ്യത റൗണ്ടിൽ ഗ്രൂപ്പ് ജെയിൽ കളിക്കുന്ന ക്രിസ്റ്റ്യാനോ റൊണാൾഡോയുടെ (Cristiano Ronaldo) പറങ്കിപ്പട സ്ലൊവാക്യയെയാണ് വീഴ്ത്തിയത്. ഏകപക്ഷീയമായ ഒരു ഗോളിനായിരുന്നു ടീമിന്റെ ജയം. മധ്യനിര താരം ബ്രൂണോ ഫെർണാണ്ടസാണ് പോർച്ചുഗലിന്റെ വിജയഗോൾ നേടിയത്. യോഗ്യത റൗണ്ടിൽ ഇത് പോർച്ചുഗലിന്റെ അഞ്ചാം ജയമാണിത്. കളിച്ച അഞ്ച് മത്സരങ്ങളും വിജയിച്ച ടീം 15 പോയിന്റോടെ ലീഗിലെ ഒന്നാമന്മാരാണ്.
അതേ സമയം സൂപ്പർ താരം ക്രിസ്റ്റ്യാനോ റൊണാൾഡോ മഞ്ഞക്കാർഡ് കണ്ടത് ജയത്തിനിടയിലും പോർച്ചുഗൽ ടീമിനെയും ആരാധകരെയും നിരാശരാക്കി. സ്ലൊവാക്യൻ ഗോൾകീപ്പർ ഡുബ്രവ്കയ്ക്കെതിരെ നടത്തിയ ഫൗളിനാണ് റോണോയ്ക്ക് മഞ്ഞക്കാർഡ് ലഭിച്ചത്‌. കളിയുടെ അറുപത്തിരണ്ടാം മിനിറ്റിലായിരുന്നു ഇത്. ഇതോടെ അടുത്ത മത്സരം താരത്തിന് നഷ്ടമാകുമെന്ന് ഉറപ്പായി.
ഒരു മഞ്ഞക്കാർഡ് കൂടി ലഭിച്ചാൽ ഒരു മത്സരത്തിൽ നിന്ന് സസ്പെൻഷൻ ലഭിക്കുമെന്ന അവസ്ഥയിലാണ് റോണോ സ്ലൊവാക്യയ്ക്കെതിരായ മത്സരത്തിന് ഇറങ്ങിയത്‌. തീർത്തും അപ്രതീക്ഷിതമായി മഞ്ഞക്കാർഡ് വാങ്ങിയതോടെ പോർച്ചുഗലിന്റെ അടുത്ത മത്സരത്തിൽ നിന്ന് ക്രിസ്റ്റ്യാനോയ്ക്ക്‌ സസ്പെൻഷനും ലഭിച്ചു. ഇതോടെ ഈ മാസം 12 ന് ലക്സംബർഗിനെതിരെ നടക്കാനിരിക്കുന്ന മത്സരത്തിൽ ക്രിസ്റ്റ്യാനോ റൊണാൾഡോയ്ക്ക് കളിക്കാനാവില്ലെന്ന് ഉറപ്പായി. ലക്സംബർഗിനെതിരെ മികച്ച റെക്കോഡുള്ള റൊണാൾഡോ അവർക്കെതിരെ ഗോൾമഴ പെയ്യിക്കുമെന്ന പ്രതീക്ഷയിലായിരുന്നു പോർച്ചുഗലിന്റെയും താരത്തിന്റെയും ആരാധകർ. ആ പ്രതീക്ഷകൾക്കാണ് ഇപ്പോൾ തിരിച്ചടിയേറ്റിരിക്കുന്നത്.
നേരത്തെ മത്സരത്തിന്റെ നാൽപ്പത്തിമൂന്നാം മിനിറ്റിലായിരുന്നു ബ്രൂണോ ഫെർണാണ്ടസ് പോർച്ചുഗലിന്റെ വിജയഗോൾ സ്കോർ ചെയ്തത്‌. ഇടത് വശത്ത് നിന്ന് പാസ് സ്വീകരിച്ച് ഓടിക്കയറിയ ബ്രൂണോ, തന്നെ മാർക് ചെയ്തവരെയെല്ലാം നിഷ്പ്രഭമാക്കി ബോക്സിന് വശത്ത് നിന്ന് ഷോട്ട് ഉതിർക്കുകയായിരുന്നു. ഗോൾകീപ്പർക്ക് ഒരവസരം പോലും നൽകാതെ പന്ത് വലയിൽ. ഈ ഗോളിൽ പോർച്ചുഗൽ ജയവും മൂന്ന് പോയിന്റും ഉറപ്പാക്കുകയായിരുന്നു.
സൗദി അറേബ്യൻ ക്ലബ്ബായ അൽ നസർ എഫ്സിക്ക് വേണ്ടി കളിക്കുന്ന ക്രിസ്റ്റ്യാനോ റൊണാൾഡോ 2023-24 സീസണിൽ മിന്നും ഫോമിലാണ്. ഈ സീസണിനിടയിലെ ആദ്യ അന്താരാഷ്ട്ര ഇടവേളയിൽ താരത്തിൽ നിന്ന് ഇതേ മിന്നും പ്രകടനം ആരാധകർ പ്രതീക്ഷിച്ചെങ്കിലും അതുണ്ടായില്ല. ആദ്യ കളിയിൽ സ്ലൊവാക്യക്കെതിരെ ഗോൾ നേടാൻ കഴിയാതിരുന്ന താരത്തിന് മഞ്ഞക്കാർഡുകളുടെ എണ്ണം അമിതമായതിനെത്തുടർന്ന് രണ്ടാം മത്സരത്തിൽ കളിക്കാനുമാകില്ല. പോർച്ചുഗൽ ജേഴ്സിയിൽ ക്രിസ്റ്റ്യാനോ റൊണാൾഡോയുടെ കളി കാണാൻ ഇനി ഒരുമാസം കൂടി ആരാധകർക്ക് കാത്തിരിക്കേണ്ടി വരുമെന്ന് ചുരുക്കം. ഒക്ടോബർ പകുതിയോടെ നടക്കുന്ന യൂറോ കപ്പ് യോഗ്യത മത്സരത്തിലാകും ഇനി റോണോ ദേശീയ ജേഴ്സി അണിയുക.
നിലവിൽ 2023-24 സീസൺ സൗദി പ്രോ ലീഗിലെ ഉയർന്ന ഗോൾവേട്ടക്കാരനാണ് മുപ്പത്തിയെട്ടുകാരനായ ക്രിസ്റ്റ്യാനോ റൊണാൾഡോ. നാല് മത്സരങ്ങളിൽ നിന്ന് ആറ് ഗോളുകളും നാല് അസിസ്റ്റുകളുമാണ് ലീഗിൽ താരത്തിന്റെ സമ്പാദ്യം. ലീഗിലെ അസിസ്റ്റ് നേട്ടത്തിലും അദ്ദേഹം തന്നെയാണ് ഒന്നാം സ്ഥാനത്ത്.
അതേ സമയം യൂറോ യോഗ്യത റൗണ്ടിൽ നടന്ന മറ്റു മത്സരങ്ങളിൽ നെതർലൻഡ്സ്, ഫ്രാൻസ്, ഡെന്മാർക്ക്, ക്രൊയേഷ്യ എന്നീ വമ്പൻ ടീമുകൾ വിജയം നേടി. അൽവാരോ മൊറാത്ത ഇരട്ടഗോളുകളുമായി മിന്നിയ കളിയിൽ ഒന്നിനെതിരെ ഏഴ് ഗോളുകൾക്ക് ജോർജിയയെയാണ് സ്പെയിൻ പരാജയപ്പെടുത്തിയത്. നെതർലൻഡ്സ് 3-0 ന് ഗ്രീസിനെതിരെയും, ഫ്രാൻസ് രണ്ട് ഗോളുകൾക്ക് അയർലൻഡിനെയും വീഴ്ത്തി. ഡെന്മാർക്ക് 4-0 ന് സാന്മരീനോയെ ചേർത്തപ്പോൾ ക്രൊയേഷ്യ 5-0 ന് ലാറ്റ്വിയയെ പരാജയപ്പെടുത്തി.
