റിയാദ്: മധ്യവേനല്‍ അവധിക്കാലമായ ജൂലൈ, ഓഗസ്റ്റ് മാസങ്ങളില്‍ കേരളത്തിലേക്ക് 65,000 രൂപ വരെ ഈടാക്കിയിരുന്ന വിമാന ടിക്കറ്റുകള്‍ ഇപ്പോള്‍ 6,000 രൂപയ്ക്ക് ലഭ്യം. അവധിക്കാലം കഴിഞ്ഞതോടെ നാട്ടിലേക്ക് പോകാനുള്ളവരുടെ എണ്ണം കുറഞ്ഞതിനാല്‍ യാത്രക്കാരെ ആകര്‍ഷിക്കാന്‍ ഏറ്റവും കുറഞ്ഞ നിരക്കിലുള്ള ടിക്കറ്റുകളും കൂടുതല്‍ ലഗേജ് അനുവദിച്ചും വമ്പന്‍ ഓഫറുകളുമായി വിമാന കമ്പനികള്‍ മല്‍സരിക്കുകയാണ്.
റിയാദില്‍ നിന്ന് 349 റിയാലിന് ജസീറ എയര്‍വേയ്‌സില്‍ കേരളത്തിലെത്താം. സെപ്റ്റംബര്‍ 06 വരെ നടക്കുന്ന വന്‍ ഓഫര്‍ കാലയളവില്‍ ടിക്കറ്റെടുക്കുന്നവര്‍ക്കാണ് ആനുകൂല്യം. ഈ ടിക്കറ്റുമായി ഡിസംബര്‍ 15 നുള്ളില്‍ യാത്ര ചെയ്യാം. ജസീറ എയര്‍വേയ്‌സിന്റെ ഇന്ത്യയിലേക്കുള്ള സര്‍വീസുകള്‍ കൂടാതെ നേപ്പാള്‍, പാകിസ്ഥാന്‍, ശ്രീലങ്ക, ബംഗ്ലാദേശ്, തുര്‍ക്കി, ഈജിപ്ത്, യു എ ഇ, ഇറാന്‍, ഇറാഖ്, കിര്‍ഗിസ്ഥാന്‍, ഉസ്‌ബെകിസ്താന്‍ എന്നിവിടങ്ങളിലേക്കുമാണ് ഓഫര്‍ പ്രഖ്യാപിച്ചത്.
ദമാമില്‍നിന്ന് കൊച്ചിയിലേക്കും ചെന്നൈയിലേക്കും ഹൈദരാബാദിലേക്കും 299 റിയാല്‍ ആണ് ടിക്കറ്റ് നിരക്ക്. കൊച്ചിയെ കൂടാതെ, മുംബൈ, ഡല്‍ഹി, ബംഗളൂരു, ചെന്നൈ, ഹൈദരാബാദ് എന്നിവടങ്ങളിലേക്കും സഊദിയില്‍ നിന്ന് ഓഫറുകള്‍ ലഭ്യമാണ്. ജിദ്ദയില്‍നിന്ന് മുംബൈയിലേക്ക് 199 റിയാലിനും കൊച്ചിയിലേക്ക് 349 റിയാലിനും ബംഗളൂരുവിലേക്ക് 299 റിയാലിനും ടിക്കറ്റുകള്‍ കിട്ടാനുണ്ട്. റിയാദില്‍ നിന്ന് കൊച്ചിയിലേക്ക് 349 റിയാല്‍, ചെന്നൈയിലേക്ക് 299 റിയാല്‍, മുംബൈ 169 റിയാല്‍, ഡല്‍ഹി 169 റിയാല്‍, ബംഗളൂരു 299 റിയാല്‍, എന്നിങ്ങനെയാണ് നിരക്ക്.
മദീനയില്‍ നിന്ന് ഇപ്പോള്‍ 299 റിയാലിന് കൊച്ചിയിലെത്താം. ഇവിടെ നിന്ന് ബംഗളൂരു, ചെന്നൈ, ഹൈദരാബാദ് എന്നിവിടങ്ങളിലേക്കും 299 റിയാലിന്റെ ഓഫറുണ്ട്. ഖസീമില്‍ നിന്ന് കൊച്ചിയിലേക്കും 299 റിയാല്‍ മതിയാവും. ഹായിലില്‍ നിന്ന് കൊച്ചിയിലേക്ക് 349 റിയാലിനും ഓഫര്‍ ടിക്കറ്റ് ലഭ്യമാണ്.
ഓഫ് സീസണ്‍ തുടങ്ങിയതിനാല്‍ കേരളത്തിലേക്ക് നിരക്ക് കുറഞ്ഞെങ്കിലും മടക്കയാത്രയ്ക്ക് ഭീമമായ തുക തന്നെ നല്‍കേണ്ടിവരും. അവധിക്കാലം കഴിഞ്ഞ് വരുന്ന ഈന്‍ബൗണ്ട് യാത്രക്കാര്‍ ധാരാളമുള്ളതിനാല്‍ കമ്പനികള്‍ നേരത്തേ തന്നെ നിരക്ക് ഉയര്‍ത്തിയിരുന്നു. നാട്ടിലേക്ക് പോകാന്‍ നല്‍കുന്നതിന്റെ അഞ്ചിരട്ടി നല്‍കിയാലാണ് തിരിച്ചെത്താനാവുക. ഉയര്‍ന്ന തുക നല്‍കിയാലും നേരിട്ടുള്ള വിമാനങ്ങളില്‍ സീറ്റില്ല. കണക്ഷന്‍ വിമാനത്തില്‍ മണിക്കൂറുകളോളം യാത്ര ചെയ്യേണ്ടിവരും.
സൗദിക്ക് പുറമേ യുഎഇയില്‍ നിന്നും നാട്ടിലേക്ക് കുറഞ്ഞ നിരക്കില്‍ ടിക്കറ്റുകള്‍ കിട്ടാനുണ്ടെങ്കിലും മടക്കയാത്രയ്ക്കുള്ള ടിക്കറ്റ് കൂടി ചേര്‍ത്ത് എടുക്കുമ്പോള്‍ വന്‍തുക നല്‍കേണ്ടിവരുന്നു. യാത്രക്കാര്‍ ഏറെയുള്ള, പൊതുവെ ടിക്കറ്റ് നിരക്ക് കൂടുതലുള്ള ഷാര്‍ജ-കണ്ണൂര്‍ സെക്ടറില്‍ 285 ദിര്‍ഹമിന് വണ്‍വേ ടിക്കറ്റുകള്‍ കിട്ടാനുണ്ട്. നവംബര്‍ അവസാനം വരെ ഈ നിരക്കില്‍ തന്നെ ടിക്കറ്റുകള്‍ ലഭിച്ചേക്കും.
മധ്യവേനല്‍ അവധിക്ക് നാട്ടിലേക്കു പോയ കുടുംബങ്ങളും ഓണക്കാലം ആഘോഷിക്കാന്‍ പോയവരും തിരിച്ചെത്തിക്കൊണ്ടിരിക്കുന്നതിനാല്‍ കേരളത്തില്‍ നിന്ന് ഗള്‍ഫിലേക്കുള്ള ഭീമമായ നിരക്കുകള്‍ ഉടനെ കുറയില്ല. ഇപ്പോള്‍ കൊച്ചിയില്‍നിന്ന് ദുബായിലേക്കും അബുദാബിയിലേക്കും 30,000 രൂപ മുതല്‍ 70,000 രൂപ വരെ നല്‍കണം. ക്രിസ്മസ്, പുതുവര്‍ഷ അവധികളും ചേര്‍ത്ത് നാട്ടിലേക്കു പോകുന്നവരുടെ എണ്ണം കൂടുമെന്നതിനാല്‍ ഇനി ഡിസംബറിലാണ് നാട്ടിലേക്കുള്ള നിരക്കുകള്‍ വര്‍ധിക്കുക.
