മനാമ: കൊവിഡ്-19നും അതിന്റെ വകഭേദങ്ങള്‍ക്കുമെതിരേ ബഹ്റൈന്‍ രാജ്യവ്യാപകമായി ബൂസ്റ്റര്‍ ഡോസുകള്‍ നല്‍കുന്നു. ഫൈസര്‍ എക്സ്ബിബി 1.5 ബൂസ്റ്റര്‍ ഷോട്ടുകള്‍ രാജ്യത്തെ മുഴുവന്‍ പേര്‍ക്കും നല്‍കാനാണ് തീരുമാനം. ആഗോളതലത്തില്‍ കൊവിഡിന്റെ പുതിയ വകഭേദങ്ങള്‍ക്കെതിരായ പോരാട്ടത്തില്‍ ആദ്യമായി ബൂസ്റ്റര്‍ ഡോസുകള്‍ നല്‍കുന്ന രാജ്യമാണ് ബഹ്റൈന്‍.
ഫൈസര്‍-ബയോഎന്‍ടെക് വികസിപ്പിച്ചെടുത്ത ഈ ബൈവാലന്റ് ബൂസ്റ്റര്‍ ഷോട്ടുകള്‍ യഥാര്‍ത്ഥ വൈറസുകളെ മാത്രമല്ല അതിന്റെ പുതിയ വേരിയന്റുകളേയും ചെറുക്കാനാണ് രൂപകല്‍പ്പന ചെയ്തിരിക്കുന്നത്.
ബഹ്റൈനിലെ ആരോഗ്യ മന്ത്രാലയം രാജ്യത്തുടനീളമുള്ള പ്രാഥമിക ആരോഗ്യ കേന്ദ്രങ്ങളില്‍ ഫൈസര്‍ എക്സ്ബിബി 1.5 വാക്‌സിനുകളുടെ ലഭ്യത ഔദ്യോഗികമായി പ്രഖ്യാപിച്ചു. വാക്‌സിനേഷന്‍ പ്രക്രിയ കാര്യക്ഷമമാക്കുന്നതിനും പൊതുജനങ്ങള്‍ക്ക് കൂടുതല്‍ പ്രാപ്യമാക്കുന്നതിനുമായി മന്ത്രാലയം നടപടികള്‍ സ്വീകരിച്ചിട്ടുണ്ട്.
ഫൈസര്‍ എക്സ്ബിബി 1.5 ബൂസ്റ്റര്‍ ഷോട്ട് സ്വീകരിക്കാന്‍ താല്‍പര്യമുള്ള വ്യക്തികള്‍ക്ക് നേരിട്ട് അനുബന്ധ ആരോഗ്യ കേന്ദ്രങ്ങളിലേക്ക് പോകാം. മുന്‍കൂര്‍ ഓണ്‍ലൈന്‍ രജിസ്‌ട്രേഷനോ അപ്പോയിന്റ്‌മെന്റ് ബുക്കിങോ ആവശ്യമില്ല.
12 വയസും അതിനുമുകളിലും പ്രായമുള്ള വ്യക്തികള്‍ക്ക് ബാങ്ക് ഓഫ് ബഹ്റൈന്‍, ഹിദ്ദിലെ കുവൈറ്റ് ഹെല്‍ത്ത് സെന്റര്‍, ജിദാഫ്‌സ് ഹെല്‍ത്ത് സെന്റര്‍, സിദ്‌റ ഹെല്‍ത്ത് സെന്റര്‍, യൂസഫ് എഞ്ചിനീയര്‍ ഹെല്‍ത്ത് സെന്റര്‍, മുഹമ്മദ് ജാസിം കാനൂ എന്നിവയുള്‍പ്പെടെ വിവിധ ആരോഗ്യ കേന്ദ്രങ്ങളില്‍ ഫൈസര്‍ എക്സ്ബിബി 1.5 ബൂസ്റ്റര്‍ ഷോട്ടുകള്‍ നല്‍കും. ഈ കേന്ദ്രങ്ങള്‍ രാവിലെ 07:30 മുതല്‍ വൈകിട്ട് 07:00 വരെ പ്രവര്‍ത്തിക്കും. ബൂസ്റ്റര്‍ ഷോട്ടുകള്‍ സ്വീകരിക്കുന്നതിന് ജനങ്ങള്‍ക്ക് സൗകര്യമുള്ള സമയം തെരഞ്ഞെടുക്കാവുന്നതാണ്.
അഞ്ചിനും 11 നും ഇടയില്‍ പ്രായമുള്ള ചെറുപ്പക്കാരെ ഉള്‍പ്പെടുത്തുന്നതിനായി ആരോഗ്യ മന്ത്രാലയം വാക്‌സിനേഷന്‍ കാമ്പെയ്ന്‍ വിപുലീകരിച്ചിട്ടുണ്ട്. ഡിസംബര്‍ 27 മുതല്‍, ഈ പ്രായക്കാര്‍ക്ക് തിരഞ്ഞെടുത്ത ആരോഗ്യ കേന്ദ്രങ്ങളില്‍ നിന്ന് ഫൈസര്‍ എക്സ്ബിബി 1.5 ബൂസ്റ്റര്‍ ഷോട്ടുകള്‍ ലഭിക്കും. ഹലാത് ബു മഹര്‍ ഹെല്‍ത്ത് സെന്റര്‍, ഹമദ് കാനൂ ഹെല്‍ത്ത് സെന്റര്‍, ഷെയ്ഖ് ജാബര്‍ അല്‍ അഹമ്മദ് അല്‍ സബാഹ് ഹെല്‍ത്ത് സെന്റര്‍ എന്നിവിടങ്ങളിലാണ് ഇതിന് സൗകര്യമുള്ളത്.
കൊവിഡ്-19 വേരിയന്റ് ജെഎന്‍.1 നേരത്തേ സൗദി അറേബ്യയില്‍ സ്ഥിരീകരിച്ചിരുന്നു. ഇംഗ്ലണ്ടിലും സ്‌കോട്ട്ലന്‍ഡിലും 24 പേരില്‍ ഒരാള്‍ക്ക് കോവിഡിന്റെ ഈ പുതിയ വകഭേദം ബാധിക്കുന്നുണ്ട്. കേരളത്തില്‍ കൊവിഡ് മരണങ്ങളും പുതിയ കോവിഡ് കേസുകളും വര്‍ധിക്കുകയാണ്. പുതിയ വകഭേദത്തിന് അപകട സാധ്യത കുറവാണെന്ന് ലോകാരോഗ്യ സംഘടന അറിയിച്ചിരുന്നു.
