റിയാദ്: സൗദി അറേബ്യയിലെ തലസ്ഥാന നഗരിയില്‍ ലോകത്തിലെ ഏറ്റവും മികച്ച സ്‌റ്റേഡിയങ്ങളിലൊന്ന് നിര്‍മിക്കുന്നു. റിയാദിനോട് ചേര്‍ന്ന് ഒരുങ്ങുന്ന ആസൂത്രിത നഗമായ ഖിദ്ദിയ നഗരത്തിലാണ് പുതിയ സ്റ്റേഡിയം പണിതുയര്‍ത്തുക.
സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ ബിന്‍ അബ്ദുല്‍ അസീസ് അല്‍ സൗദ് രാജകുമാരന്റെ പേരിലാണ് അത്യാധുനിക സാങ്കേതികവിദ്യകളുള്ള രാജ്യത്തെ ഒന്നാംകിട സ്റ്റേഡിയം നിര്‍മിക്കുന്നതെന്ന് ഖിദ്ദിയ ഇന്‍വെസ്റ്റ്മെന്റ് കമ്പനി (ക്യുഐസി) പ്രഖ്യാപിച്ചു. ലോകത്തിലെ ഏറ്റവും ശ്രദ്ധേയവും നൂതനവുമായ സ്റ്റേഡിയങ്ങളിലൊന്നായി ഇത് മാറും. പ്രിന്‍സ് മുഹമ്മദ് ബിന്‍ സല്‍മാന്‍ സ്റ്റേഡിയം എന്നാണ് നാമകരണം.
റിയാദില്‍ നിന്ന് റോഡ് മാര്‍ഗം 40 മിനിറ്റ് അകലെ ഖിദ്ദിയയില്‍ 200 മീറ്റര്‍ ഉയരമുള്ള മൗണ്ട് തുവൈഖ് കൊടുമുടിയിലാണ് പ്രിന്‍സ് മുഹമ്മദ് ബിന്‍ സല്‍മാന്‍ സ്റ്റേഡിയം നിര്‍മിക്കുക. ഇതിന്റെ ഭാവനാ ചിത്രം സൗദി പ്രസ് ഏജന്‍സി പങ്കുവച്ചപ്പോള്‍ മനോഹരമായ പ്രൊമോ വീഡിയോ ഖിദ്ദിയ സിറ്റി അധികൃതര്‍ എക്‌സ് പ്ലാറ്റ്‌ഫോമിലൂടെ പുറത്തുവിട്ടു.
നിര്‍മാണം പൂര്‍ത്തിയാവുന്നതോടെ രാജ്യത്ത് നടക്കുന്ന ഏറ്റവും വലിയ കായിക, വിനോദ, സാംസ്‌കാരിക പരിപാടികള്‍ ഇവിടെ അരങ്ങേറും. 45,000 കാണികള്‍ക്ക് ഇരിക്കാവുന്ന മള്‍ട്ടി-ഫങ്ഷണല്‍ സ്റ്റേഡിയമായിരിക്കും ഇത്. അല്‍ നാസ്ര്‍, അല്‍ ഹിലാല്‍ ക്ലബ്ബുകളുടെ ഹോം ഗ്രൗണ്ട് കൂടിയായി ഇത് മാറും. നിരവധി പ്രാദേശിക, അന്തര്‍ദേശീയ ഫുട്‌ബോള്‍ മത്സരങ്ങള്‍ ഇവിടെ അരങ്ങേറുമെന്ന് സൗദി പ്രസ് ഏജന്‍സി (എസ്പിഎ) റിപ്പോര്‍ട്ട് ചെയ്തു.
2034 ഫിഫ ലോകകപ്പ് സൗദിയിലാണ് നടക്കുന്നത്. പ്രധാന മല്‍സരങ്ങള്‍ അരങ്ങേറുന്ന വേദിയായി ഈ സ്റ്റേഡിയം മാറാനുള്ള സാധ്യതയുണ്ട്. സൗദി കിങ് കപ്പ്, ഏഷ്യന്‍ കപ്പ്, ഒരുപക്ഷേ 2034 ലെ ഏഷ്യന്‍ ഗെയിംസ് എന്നിവയുള്‍പ്പെടെ മേഖലയിലെ ഏറ്റവും വലിയ കായിക മത്സരങ്ങള്‍ക്കും സ്റ്റേഡിയം ആതിഥ്യമരുളും.
പിന്‍വലിക്കാവുന്ന മേല്‍ക്കൂരയും പിച്ചും സ്റ്റേഡിയത്തിന്റെ പ്രധാന പ്രത്യേകതകളിലൊന്നാണ്. അന്താരാഷ്ട്ര വാസ്തുവിദ്യാ സ്ഥാപനമായ പോപുലസ് ആണ് രൂപകല്‍പന ചെയ്തിരിക്കുന്നത്.
എല്‍ഇഡി മതിലും ഉള്‍ക്കൊള്ളുന്ന ലോകത്തിലെ ആദ്യത്തെ സമ്പൂര്‍ണ സംയോജിത സ്റ്റേഡിയമായിരിക്കും ഇത്. തത്സമയ ഇവന്റ് ബ്രോഡ്കാസ്റ്റുകള്‍, ഹൈ-ഡെഫനിഷന്‍ ഫിലിമുകള്‍, ലേസര്‍ ഷോകള്‍ എന്നിവയ്ക്കുള്ള ഒരു പോര്‍ട്ടലായി എല്‍ഇഡി മതില്‍ വര്‍ത്തിക്കും. ഇത് കാഴ്ചക്കാര്‍ക്ക് പുതിയ അനുഭവം തന്നെയായിരിക്കും. മല്‍സരങ്ങള്‍ ഇല്ലാത്ത സമയങ്ങളില്‍ ഖിദ്ദിയ സിറ്റി കാഴ്ചകള്‍ ചുവരുകളില്‍ വിരിയും.
ഖിദ്ദിയ എന്ന പേരിലുള്ള അത്യാധുനിക നഗരത്തിന്റെ മാസ്റ്റര്‍ പ്ലാന്‍ നേരത്തേ സൗദി കിരീടാവകാശി രാജ്യത്തെ ജനങ്ങള്‍ക്കായി അവതരിപ്പിച്ചിരുന്നു. അതുല്യമായ സാങ്കേതിക സവിശേഷതകള്‍ ഉപയോഗപ്പെടുത്തുക വഴി പരമ്പരാഗത സ്റ്റേഡിയം അനുഭവങ്ങളില്‍ നിന്നുള്ള വിപ്ലവകരമായ മാറ്റമാണ് കിദ്ദിയ ഇന്‍വെസ്റ്റ്മെന്റ് കമ്പനി അധികൃതര്‍ വാഗ്ദാനം ചെയ്യുന്നത്. മടക്കാവുന്ന തറ, മേല്‍ക്കൂര, മുകളിലെ ചുമര്‍ എന്നിവയ്ക്കു പുറമേ മലയുടെ മുകളിലായതിനാല്‍ സിക്‌സ് ഫ്‌ലാഗ്‌സ് ഖിദ്ദിയ സിറ്റി, വാട്ടര്‍ പാര്‍ക്ക് എന്നിവ ഉള്‍പ്പെടെ നഗരത്തിന്റെ മനോഹരമായ കാഴ്ചകളും ഇവിടെ നിന്ന് ലഭിക്കും.
ലോകോത്തര പരിപാടികള്‍ക്കും മത്സരങ്ങള്‍ക്കുമുള്ള നൂതന സാങ്കേതികവിദ്യ ഉള്‍ക്കൊള്ളുന്ന ആഗോള കായിക, വിനോദ, സാംസ്‌കാരിക കേന്ദ്രമായിരിക്കും പ്രിന്‍സ് മുഹമ്മദ് ബിന്‍ സല്‍മാന്‍ സ്റ്റേഡിയമെന്ന് ക്യുഐസി മാനേജിങ് ഡയറക്ടര്‍ അബ്ദുല്ല ബിന്‍ നാസര്‍ അല്‍ ദാവൂദ് പറഞ്ഞു. തുവൈഖ് പര്‍വതത്തിലെ മനോഹരമായ കാഴ്ചയും ആസ്വദിക്കാനാവും.
സ്റ്റേഡിയത്തിന് താഴെയായി പരിസ്ഥിതി സൗഹൃദ തടാകം നിര്‍മിച്ച് വര്‍ഷം മുഴുവന്‍ ചൂട് നിയന്ത്രിക്കാനും ഉദ്ദേശിക്കുന്നു. എയര്‍ കണ്ടീഷനിങ് സ്റ്റേഡിയമാണെങ്കിലും ഇതിലൂടെ ഊര്‍ജ ഉപയോഗം കുറയ്ക്കാനാവും. എസി സിസ്റ്റം പ്രീ-കൂള്‍ ചെയ്യാന്‍ സ്റ്റേഡിയത്തില്‍ നിന്നും പരിസര പ്രദേശങ്ങളില്‍ നിന്നും ശേഖരിക്കുന്ന തടാകത്തിലെ മഴവെള്ളം ഉപയോഗപ്പെടുത്തും. സ്റ്റേഡിയത്തില്‍ 76 ലക്ഷം വാര്‍ഷിക സന്ദര്‍ശകരെയാണ് പ്രതീക്ഷിക്കുന്നത്. സൗദി വിഷന്‍ 2030ന്റെ ലക്ഷ്യങ്ങള്‍ക്ക് അനുസൃതമായാണ് പദ്ധതി വിഭാവനം ചെയ്തിരിക്കുന്നത്.
