ജിദ്ദ: സൗദി സ്റ്റേറ്റ് ഓയില്‍ ഭീമനായ അറാംകോ കഴിഞ്ഞ 12 മാസത്തിനിടെ ലോകത്ത് ഏറ്റവും കൂടുതല്‍ ലാഭം നേടിയ കമ്പനിയായി. എണ്ണ ശുദ്ധീകരണ രംഗത്തെ അതികായരായ സൗദി അറാംകോ ഇക്കാലയളവില്‍ നേടിയ ലാഭം രണ്ടാം സ്ഥാനത്തുള്ള ടെക് ഭീമന്‍ ആപ്പിള്‍ കമ്പനിയും മൂന്നാം സ്ഥാനത്തുള്ള ബെര്‍ക്‌ഷെയര്‍ ഹാഥവേയും ആകെ നേടിയ ലാഭത്തെക്കാള്‍ കൂടുതലാണ്.
അതേസമയം, സൗദി എണ്ണ ഉത്പാദനം കുറച്ചത് കാരണം അരാംകോയുടെ സെപ്തംബര്‍ 30 വരെയുള്ള മൂന്നാംപാദ അറ്റാദായത്തില്‍ 23% ഇടിവ് രേഖപ്പെടുത്തി. 32.6 ബില്യണ്‍ ഡോളറായാണ് കുറഞ്ഞത്. കഴിഞ്ഞ വര്‍ഷം ഇതേ സമയത്ത് 42.4 ബില്യണ്‍ ഡോളറായിരുന്നു അറ്റാദായം.
വിപണി മൂല്യത്തിന്റെയും ഉത്പാദനത്തിന്റെയും അടിസ്ഥാനത്തില്‍ ലോകത്തെ ഏറ്റവും വലിയ എണ്ണ കമ്പനിയായ അറാംകോ സൗദിയുടെ ഏറ്റവും വലിയ വരുമാന സ്രോതസാണ്. എണ്ണ, പ്രകൃതിവാതക മേഖലയുമായി ബന്ധപ്പെട്ട് പര്യവേക്ഷണം, ഉല്‍പാദനം, സംസ്‌കരണം, വിപണനം തുടങ്ങിയ മേഖലകളില്‍ കമ്പനി പ്രവര്‍ത്തിക്കുന്നു. അറാംകൊ ഓഹരികള്‍ നാലു വര്‍ഷം മുമ്പ് ആദ്യമായി സൗദി ഷെയര്‍ മാര്‍ക്കറ്റില്‍ ലിസ്റ്റ് ചെയ്തപ്പോള്‍ ചരിത്രത്തിലെ ഏറ്റവും വലിയ ഐപിഒ ആയിരുന്നു കമ്പനിയുടേത്.
കമ്പനീസ് മാര്‍ക്കറ്റ് പുറത്തുവിട്ട കണക്കനുസരിച്ച് 12 മാസത്തിനിടെ 264 ബില്യണ്‍ ഡോളറാണ് സൗദി അറാംകോയുടെ ലാഭം. നാലു പാദവര്‍ഷങ്ങളിലായി ആപ്പിള്‍ കമ്പനി 114 ബില്യണ്‍ ഡോളറും ബെര്‍ക്‌ഷെയര്‍ ഹാഥവേ 113 ബില്യണ്‍ ഡോളറുമാണ് ലാഭം നേടിയത്. നാലാം സ്ഥാനത്തുള്ള ബ്രസീലിയന്‍ ബഹുരാഷ്ട്ര എണ്ണ കമ്പനിയായ പെട്രോബ്രസ് 98.6 ബില്യണ്‍ ഡോളര്‍ ലാഭവും കൈവരിച്ചു.
ഏറ്റവുമധികം ലാഭം നേടിയ കമ്പനികളുടെ പട്ടികയില്‍ മൈക്രോസോഫ്റ്റ് ആണ് അഞ്ചാം സ്ഥാനത്ത്. നാലു പാദങ്ങളില്‍ മൈക്രോസോഫ്റ്റ് 95 ബില്യണ്‍ ഡോളറാണ് ലാഭമുണ്ടാക്കിയത്. വിപണി മൂല്യത്തില്‍ ലോകത്ത് രണ്ടാം സ്ഥാനത്താണ് മൈക്രോസോഫ്റ്റ്.
ലാഭക്കണക്കില്‍ ഗൂഗിള്‍ ആറാം സ്ഥാനത്തും (78.8 ബില്യണ്‍ ഡോളര്‍) റഷ്യന്‍ കമ്പനിയായ ഗ്യാസ്‌പ്രോം ഏഴാം സ്ഥാനത്തും (76.8 ബില്യണ്‍ ഡോളര്‍) എത്തി. എട്ടാം സ്ഥനത്തുള്ള ജെപി മോര്‍ഗന്‍ ലോകത്ത് ഏറ്റവുമധികം ലാഭം കൈവരിച്ച ധനകാര്യ സ്ഥാപനം കൂടിയാണ്. അമേരിക്കന്‍ എണ്ണ കമ്പനിയായ എക്‌സണ്‍ മൊബീല്‍ ആണ് ഒമ്പതാം സ്ഥാനത്തും ആസ്തികളുടെ അടിസ്ഥാനത്തില്‍ ലോകത്തെ ഏറ്റവും വലിയ ബാങ്ക് ആയ ഇന്‍ഡസ്ട്രിയല്‍ ആന്റ് കൊമേഴ്‌സ്യല്‍ ബാങ്ക് ഓഫ് ചൈന 10ാം സ്ഥാനത്തുമാണ്.
അതിനിടെ, അരാംകോ ഫിഫയുമായി സ്‌പോണ്‍സര്‍ഷിപ്പ് കരാര്‍ പൂര്‍ത്തിയാക്കാന്‍ ഒരുങ്ങുന്നതായി ടൈംസ് പത്രം റിപ്പോര്‍ട്ട് ചെയ്തു. 2034 വരെയുള്ള സ്‌പോണ്‍സര്‍ഷിപ്പ് കരാര്‍ ഉണ്ടാക്കാനാണ് ചര്‍ച്ചകള്‍ നടക്കുന്നതെന്നും ഇടപാടിന് പ്രതിവര്‍ഷം 100 മില്യണ്‍ ഡോളറിന്റെ മൂല്യമുണ്ടെന്നും ബന്ധപ്പെട്ട വൃത്തങ്ങളെ ഉദ്ധരിച്ച് തയ്യാറാക്കിയ റിപ്പോര്‍ട്ടില്‍ പറയുന്നു.
കരാറിലെത്തിയാല്‍ ഫിഫയുടെ ചരിത്രത്തില്‍ ഏറ്റവുമധികം പ്രതിഫലം നല്‍കുന്ന സ്‌പോണ്‍സറായി അരാംകോ മാറും. 2034 ലെ ഫിഫ ലോകകപ്പ് നടത്തിപ്പ് അവകാശം സൗദി അറേബ്യക്ക് ആയിരിക്കുമെന്ന് ഉറപ്പാക്കിയതു മുതലാണ് ചര്‍ച്ച തുടങ്ങിയത്. ഫോര്‍മുല വണ്‍, വനിതാ ഗോള്‍ഫ് സര്‍ക്യൂട്ട്, ക്രിക്കറ്റ് ലോകകപ്പ്, ഇന്ത്യന്‍ പ്രീമിയര്‍ ലീഗ് എന്നിവയുമായി നിലവില്‍ അറാംകോയ്ക്ക് മുഖ്യ സ്‌പോണ്‍സര്‍ഷിപ്പ് ഡീലുകളുണ്ട്.
