ദുബായ്: നിങ്ങള്‍ യുഎഇയിലെ ഏതെങ്കിലും വിമാനത്താവളം വഴി മറ്റൊരു രാജ്യത്തേക്ക് യാത്ര പോകുന്ന ആളാണെങ്കില്‍ നിങ്ങള്‍ക്ക് രണ്ടോ നാലോ ദിവസം ഇവിടെ ചെലവഴിക്കുകയും ബന്ധുക്കളോ സുഹൃത്തുക്കളോ ഉണ്ടെങ്കില്‍ അവരെ കാണുകയും പ്രധാനപ്പെട്ട പ്രദേശങ്ങള്‍ സന്ദര്‍ശിക്കുകയും കാഴ്ചകള്‍ കാണുകള്‍ ചെയ്യാന്‍ അവസരമുണ്ട്. ഇതിന് യുഎഇയില്‍ എത്തുന്നതിന് മുമ്പ് തന്നെ ഒരു ട്രാന്‍സിറ്റ് വിസ തരപ്പെടുത്തിയാല്‍ മതിയാവും.

ട്രാന്‍സിറ്റ് വിസ ലഭിക്കാന്‍

നിങ്ങള്‍ക്ക് ഒരു ട്രാന്‍സിറ്റ് വിസ ലഭിക്കുന്നതിന് മൂന്ന് നിബന്ധനകളാണ് യുഎഇ അധികൃതര്‍ മുന്നോട്ടുവയ്ക്കുന്നത്. കുറഞ്ഞത് മൂന്ന് മാസത്തെ കാലാവധിയുള്ള പാസ്‌പോര്‍ട്ടാണ് നിബന്ധനകളിലൊന്ന്. വെളുത്ത പശ്ചാത്തലത്തിലുള്ള ഒരു ഫോട്ടോയും ആവശ്യമാണ്. നിങ്ങള്‍ വരുന്ന സ്ഥലം അല്ലാത്ത മൂന്നാമതൊരു ലക്ഷ്യസ്ഥാനത്തേക്കുള്ള വിമാന ടിക്കറ്റും നിങ്ങളുടെ കൈവശം ഉണ്ടെങ്കില്‍ നിങ്ങള്‍ യുഎഇയില്‍ ട്രാന്‍സിറ്റ് വിസയ്ക്ക് അര്‍ഹനാണ്.

വിസ ലഭിക്കുക എയര്‍ലൈന്‍ വഴി

ട്രാന്‍സിറ്റ് വിസയ്ക്ക് അപേക്ഷിക്കുന്നവര്‍ ശ്രദ്ധിക്കേണ്ടത് എയര്‍ലൈനുകള്‍ വഴിയാണ് ഇത് അനുവദിക്കപ്പെടുക എന്നതാണ്. അഥവാ നിങ്ങള്‍ യാത്ര ചെയ്യുന്ന യുഎഇ അധിഷ്ഠിത എയര്‍ലൈനുകള്‍ക്ക് മാത്രമേ യാത്രയ്ക്ക് മുമ്പ് നിങ്ങളുടെ ട്രാന്‍സിറ്റ് വിസ ക്രമീകരിക്കാന്‍ കഴിയൂ. യുഎഇയിലേക്ക് ഒരു ട്രാന്‍സിറ്റ് വിസ ലഭിക്കാന്‍ ആദ്യം ചെയ്യേണ്ടത് യുഎഇയിലേക്ക് നിങ്ങള്‍ വരുന്ന എയര്‍ലൈന്‍ അധികൃതരെ ബന്ധപ്പെടുകയാണ്. ട്രാവല്‍ ഏജന്‍സി വഴിയാണ് നിങ്ങള്‍ യാത്ര ബുക്ക് ചെയ്തതെങ്കില്‍, ട്രാന്‍സിറ്റ് വിസ ലഭിക്കാന്‍ ഏജന്‍സി നിങ്ങളെ സഹായിക്കും. എന്നാല്‍ വിസ റെഡിയാണെന്ന കാര്യം യാത്ര പുറപ്പെടുന്നതിന് മുമ്പ് തന്നെ സ്വന്തം നിലയ്ക്ക് ഉറപ്പുവരുത്തണം.

ടിക്കറ്റ് വാങ്ങുമ്പോള്‍ ശ്രദ്ധിക്കുക

യുഎഇ ആസ്ഥാനമായുള്ള എയര്‍ലൈനുകള്‍ക്ക് മാത്രമേ നിങ്ങള്‍ക്കു വേണ്ടി ട്രാന്‍സിറ്റ് വിസയ്ക്ക് അപേക്ഷിക്കാന്‍ കഴിയൂ എന്നതിനാല്‍, ആ എയര്‍ലൈനുകളില്‍ നിന്നുള്ള ടിക്കറ്റ് തന്നെയായിരിക്കും യാത്രയ്ക്കായി വാങ്ങേണ്ടത്. ഉദാഹരണത്തിന്, നിങ്ങള്‍ ദുബായ് സന്ദര്‍ശിക്കാന്‍ ആഗ്രഹിക്കുന്നുവെങ്കില്‍, എമിറേറ്റ്‌സ് എയര്‍ലൈനില്‍ നിന്നോ ഫ്‌ളൈ ദുബായില്‍ നിന്നോ ടിക്കറ്റുകള്‍ വാങ്ങണം. അതേസമയം, അബുദാബി സന്ദര്‍ശിക്കാനാണ് ആഗ്രഹമെങ്കില്‍, ഇത്തിഹാദ് എയര്‍വേസില്‍ നിന്നോ എയര്‍ അറേബ്യയില്‍ നിന്നോ ആണ് ടിക്കറ്റ് എടുക്കേണ്ടത്.

ട്രാന്‍സിറ്റ് വിസയുടെ കാലാവധി

നിങ്ങളുടെ ട്രാന്‍സിറ്റ് വിസയ്ക്ക് 48 മണിക്കൂര്‍ അല്ലെങ്കില്‍ 96 മണിക്കൂര്‍ സമയമായിരിക്കും കാലാവധി. ട്രാന്‍സിറ്റ് വിസ തെരഞ്ഞെടുക്കുമ്പോള്‍ ശ്രദ്ധിക്കേണ്ടത് 48 മണിക്കൂര്‍ ട്രാന്‍സിറ്റ് വിസയാണ് എടുത്തതെങ്കില്‍ പിന്നീട് അതിന്റെ കാലാവധി വര്‍ധിപ്പിക്കാന്‍ കഴിയില്ല എന്നതാണ്. അതുകൊണ്ടു തന്നെ ഏത് വിസ വേണമെന്ന കാര്യം മുന്‍കൂട്ടി തീരുമാനിക്കണം. 48 മണിക്കൂറിനുള്ള ട്രാന്‍സിറ്റ് വിസകള്‍ സൗജന്യമാണ്. യുഎഇയില്‍ പ്രവേശിച്ചത് മുതല്‍ 48 മണിക്കൂര്‍ വരെയാണ് അതിന്റെ കാലാവധി. വിസ നീട്ടാനോ പുതുക്കാനോ സാധിക്കാത്തതിനാല്‍, 48 മണിക്കൂറിനുള്ളില്‍ തന്നെ രാജ്യം വിടണം.

എക്‌സിറ്റ് ഫീസ് 300 ദിര്‍ഹം

അതേസമയം, 96 മണിക്കൂര്‍ ട്രാന്‍സിറ്റ് വിസയ്ക്ക് 50 ദിര്‍ഹം ഫീസ് നല്‍കണം. രാജ്യത്ത് പ്രവേശിച്ചത് മുതല്‍ 96 മണിക്കൂര്‍ വരെയാണ് ഇതിന്റെ കാലാവധി. ഈ വിസയും പുതുക്കാനോ നീട്ടാനോ കഴിയില്ല എന്നതിനാല്‍ സമയം അവസാനിക്കുന്ന മുറയ്ക്ക് രാജ്യം വിടേണ്ടതുണ്ട്. രാജ്യം വിടുന്നതിന് മുമ്പ്, 300 ദിര്‍ഹം എക്‌സിറ്റ് ഫീസ് നല്‍കണം. ഇതല്ലാതെ മറ്റു ഫീസുകളൊന്നും ട്രാന്‍സിക്ക് വിസയ്ക്ക് നല്‍കേണ്ടതില്ല എന്ന കാര്യം പ്രത്യേകം ഓര്‍ക്കണം. എയര്‍ലൈനോ ട്രാവല്‍ ഏജന്‍സിയോ കൂടുതല്‍ ഫീസ് ആവശ്യപ്പെടുന്നുണ്ടെങ്കില്‍ അക്കാര്യം എയര്‍പോര്‍ട്ട് അധികാരികളെ അറിയിക്കാം.

ട്രാന്‍സിറ്റ് വിസ ആര്‍ക്കെല്ലാം

യുഎഇ ട്രാന്‍സിറ്റ് വിസ എല്ലാ രാജ്യക്കാര്‍ക്കും ആവശ്യമില്ല. ഇതില്ലാതെ തന്നെ ഓണ്‍ അറൈവല്‍ വിസയില്‍ രാജ്യത്തേക്ക് വരാന്‍ അനുവാദമുള്ള 20 രാജ്യങ്ങളില്‍ നിന്നുള്ളവര്‍ക്ക് വിമാനത്താവളത്തില്‍ ഇറങ്ങി നേരെ ഇമിഗ്രേഷനിലേക്ക് പോയാല്‍ മതി. ചൈന, ജപ്പാന്‍, യുഎസ് ഉള്‍പ്പെടെയുള്ള 20 രാജ്യങ്ങളില്‍ നിന്നുള്ളവരാണെങ്കില്‍ 30 ദിവസത്തേക്ക് യുഎഇയില്‍ തുടരാന്‍ നിങ്ങള്‍ക്ക് അനുവാദമുണ്ടായിരിക്കും. അതേപോലെ മള്‍ട്ടിപ്പിള്‍ എന്‍ട്രി വിസ ലഭിക്കുന്ന 65ലേറെ രാജ്യങ്ങളില്‍ നിന്നുള്ള പാസ്‌പോര്‍ട്ട് കൈവശമുള്ളവര്‍ക്കും ട്രാന്‍സിറ്റ് വിസയുടെ ആവശ്യമില്ല. ഇഷ്യൂ ചെയ്ത തീയതി മുതല്‍ ആറു മാസം വരെ ഉപയോഗിക്കാവുന്നവയാണ് 90 ദിവസ മള്‍ട്ടിപ്പിള്‍ എന്‍ട്രി വിസ. ഈ രാജ്യക്കാര്‍ക്കും വിമാനത്താവളത്തിലെത്തിയ ശേഷം ഓണ്‍അറൈവലായി 90 ദിവസം വരെ യുഎഇയില്‍ തങ്ങാവുന്ന വിസ സ്വന്തമാക്കാം.