ദുബായ്: എമിറേറ്റിന്റെ സാമ്പത്തിക സ്ഥിരത വര്‍ധിപ്പിക്കാനും വരുമാനം നേടാനും ലക്ഷ്യമിട്ട് ദുബായ് ഇന്‍വെസ്റ്റ്മെന്റ് ഫണ്ട് രൂപീകരിച്ചു. ദുബായ് ഇലക്ട്രിസിറ്റി ആന്‍ഡ് വാട്ടര്‍ അതോറിറ്റി, ടോള്‍-റോഡ് ഓപറേറ്റര്‍ സാലിക്ക്, ദുബായ് ടാക്‌സി കമ്പനി എന്നിവയിലെ തങ്ങളുടെ ഉടമസ്ഥതയിലുള്ള ഓഹരികള്‍ പുതിയ നിക്ഷേപ ഫണ്ടിലേക്ക് കൈമാറുമെന്ന് ദുബായ് മീഡിയ ഓഫീസ് അറിയിച്ചു.

സര്‍ക്കാര്‍ നിക്ഷേപങ്ങളുടെ മേല്‍നോട്ടം വഹിക്കുകയാണ് ദുബായ് ഇന്‍വെസ്റ്റ്മെന്റ് ഫണ്ടിന്റെ പ്രധാന ചുമതല. ദുബായ് ഗവണ്‍മെന്റ് ഫണ്ടുകള്‍, മിച്ചം, പൊതു കരുതല്‍ ധനം എന്നിവ പ്രാദേശികമായും അന്തര്‍ദ്ദേശീയമായും നിക്ഷേപിക്കുന്നത് ഇനു മുതല്‍ ദുബായ് ഇന്‍വെസ്റ്റ്മെന്റ് ഫണ്ടിന്റെ ഉത്തരവാദിത്തമായിരിക്കും.

യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍-മക്തൂം ദുബായ് നിക്ഷേപ ഫണ്ട് രൂപീകരിക്കാന്‍ നിയമം പുറപ്പെടുവിച്ചു. അദ്ദേഹത്തിന്റെ മകന്‍ ദുബായ് ഡെപ്യൂട്ടി ഭരണാധികാരിയും യുഎഇ ധനമന്ത്രിയുമായ ഷെയ്ഖ് മക്തൂം ബിന്‍ മുഹമ്മദ് ബിന്‍ റാഷിദ് അല്‍ മക്തൂം ആണ് ഇന്‍വെസ്റ്റ്മെന്റ് ഫണ്ടിന്റെ അധ്യക്ഷന്‍.

ദുബായ് ഇന്‍വെസ്റ്റ്മെന്റ് ഫണ്ടിനെ വാണിജ്യാടിസ്ഥാനത്തില്‍ പ്രവര്‍ത്തിക്കുന്ന ഒരു സ്വതന്ത്ര പൊതുസ്ഥാപനമായി മാറ്റുന്ന പുതിയ നിയമം പുറപ്പെടുവിച്ചു. ലക്ഷ്യപൂര്‍ത്തീകരണത്തിന് സാമ്പത്തികവും ഭരണപരവുമായ സ്വാതന്ത്ര്യവും നിയമപരമായ അധികാരവും നിയമം അനുശാസിക്കുന്നു. അബ്ദുല്‍ റഹ്‌മാന്‍ സാലിഹ് അല്‍ സാലിഹ് ബോര്‍ഡിന്റെ വൈസ് ചെയര്‍മാനായി പ്രവര്‍ത്തിക്കും. അബ്ദുല്‍ അസീസ് മുഹമ്മദ് അല്‍ മുല്ല, റാഷിദ് അലി ബിന്‍ ഒബൂദ്, അഹമ്മദ് അലി മെഫ്ത എന്നിവര്‍ അംഗങ്ങളായിരിക്കും. അബ്ദുല്‍ അസീസ് മുഹമ്മദ് അല്‍ മുല്ലയെ ഫണ്ടിന്റെ മാനേജിങ് ഡയറക്ടറും സിഇഒയുമായി നിയമിക്കുന്നതിനും അംഗീകാരം നല്‍കി.

സര്‍ക്കാര്‍ ഫണ്ടുകള്‍ വരുമാനമുള്ള നിക്ഷേപമാക്കി മാറ്റുന്നതിനുള്ള ഉത്തരവാദിത്തം ദുബായ് ഇന്‍വെസ്റ്റ്മെന്റ് ഫണ്ടിനായിരിക്കും. ഡയറക്ടര്‍ ബോര്‍ഡ് അംഗീകരിച്ച നിക്ഷേപ നയത്തിലൂടെ നിലവിലുള്ളതും ഭാവി തലമുറയ്ക്കും പ്രയോജനപ്പെടുന്ന വരുമാനം ഉണ്ടാക്കാന്‍ ശ്രമിക്കും. ഗവണ്‍മെന്റിന്റെ കമ്മി നികത്തുകയും ശക്തമായ സാമ്പത്തിക കരുതല്‍ ശേഖരം സ്ഥാപിക്കുകയും ചെയ്യും. അതുവഴി ദീര്‍ഘകാല സാമ്പത്തിക സുസ്ഥിരത പ്രോത്സാഹിപ്പിച്ച് ദുബായ് ഗവണ്‍മെന്റിന്റെ സാമ്പത്തിക ഭദ്രത വര്‍ധിപ്പിക്കാനും ഉദ്ദേശിക്കുന്നു.

വരുമാന സ്രോതസ്സുകള്‍ വൈവിധ്യവത്കരിക്കുന്നതോടൊപ്പം സാമ്പത്തികവും സാമൂഹികവുമായ മേഖലകളുള്‍പ്പെടെ സുപ്രധാന രംഗങ്ങളില്‍ ദുബായിയുടെ സുസ്ഥിര വികസനം പ്രോത്സാഹിപ്പിക്കുന്ന സംരംഭങ്ങള്‍ക്ക് ഇന്‍വെസ്റ്റ്‌മെന്റ് ഫണ്ട് മുന്‍ഗണന നല്‍കും.

ഇന്‍വെസ്റ്റ്മെന്റ് കോര്‍പറേഷന്‍ ഓഫ് ദുബായിക്ക് നല്‍കിയിട്ടുള്ള അധികാരപരിധി ലംഘിക്കാതെ, നിയമഭേദഗതികള്‍ക്കും എമിറേറ്റിലെ ചട്ടങ്ങള്‍ക്കുമനുസൃതമായാണ് ദുബായ് ഇന്‍വെസ്റ്റ്മെന്റ് ഫണ്ടിന്റെ പ്രവര്‍ത്തനം. അതുപോലെ ഫണ്ടിന്റെ ലക്ഷ്യങ്ങളും ഉത്തരവാദിത്തങ്ങളും വൈവിധ്യമാണ്. സര്‍ക്കാര്‍ മിച്ചം നിക്ഷേപിക്കുക, കമ്പനികളും നിക്ഷേപ ഫണ്ടുകളും സ്വതന്ത്രമായി അല്ലെങ്കില്‍ മൂന്നാം കക്ഷികളുമായി സഹകരിച്ച് സ്ഥാപിക്കുക, കമ്പനികള്‍, പ്രോജക്ടുകള്‍, ഫണ്ടുകള്‍ എന്നിവ ഏറ്റെടുക്കുകയോ ലയിപ്പിക്കുകയോ ചെയ്യുക, അവയില്‍ ഓഹരികള്‍ കൈവശം വയ്ക്കുക എന്നിവ ഇതില്‍ ഉള്‍പ്പെടുന്നു.

സുസ്ഥിരമായ വരുമാനം നേടുന്നതിന് സ്റ്റോക്കുകള്‍, ബോണ്ടുകള്‍, സെക്യൂരിറ്റികള്‍ എന്നിവയിലെ നിക്ഷേപങ്ങളില്‍ ഫണ്ട് ശ്രദ്ധ കേന്ദ്രീകരിക്കും. വിവരങ്ങള്‍ പൊതുജനങ്ങള്‍ക്ക് ലഭ്യമാക്കാന്‍ ഫണ്ട് ബാധ്യസ്ഥമാണ്.

2021 നവംബറില്‍ ദുബായ് തങ്ങളുടെ സാമ്പത്തിക വിപണിയുടെ വലുപ്പം മൂന്ന് ട്രില്യണ്‍ ദിര്‍ഹമായി വര്‍ധിപ്പിക്കുന്നതിന് 10 സര്‍ക്കാര്‍ ഉടമസ്ഥതയിലുള്ള കമ്പനികളെ ലിസ്റ്റ് ചെയ്യാനുള്ള പദ്ധതികള്‍ പ്രഖ്യാപിച്ചിരുന്നു. സര്‍ക്കാര്‍ ഉടമസ്ഥതയിലുള്ള സംരംഭങ്ങളില്‍ നാലെണ്ണം കഴിഞ്ഞ വര്‍ഷം ദുബായ് ഫിനാന്‍ഷ്യല്‍ മാര്‍ക്കറ്റില്‍ ലിസ്റ്റുചെയ്യുകയുണ്ടായി.