ക്രിക്കറ്റ് മാമാങ്കത്തിന് ഇനി 30 നാള്‍; ടീം ഇന്ത്യയെ ഇന്ന് പ്രഖ്യാപിക്കും

ന്യൂഡല്‍ഹി: ഇന്ത്യ ആതിഥേയത്വം വഹിക്കുന്ന 2023ലെ ഏകദിന ക്രിക്കറ്റ് ലോകകപ്പിന് തിരിതെളിയാന്‍ ഇനി 30 നാള്‍ മാത്രം ബാക്കി. ഒക്ടോബര്‍ അഞ്ചിന് അഹമ്മദാബാദ് നരേന്ദ്ര മോദി സ്‌റ്റേഡിയത്തില്‍ ഇംഗ്ലണ്ട്‌-ന്യൂസിലന്‍ഡ് മത്സരത്തോടെ ക്രിക്കറ്റ് മാമാങ്കത്തിന് തുടക്കമാവും. നവംബര്‍ 19ന് നടക്കുന്ന ഫൈനല്‍ മത്സരവും അഹമ്മദാബാദില്‍ തന്നെയാണ് നടക്കുക. ഒന്നര മാസം നീളുന്ന ക്രിക്കറ്റ് മാമാങ്കത്തില്‍ പത്ത് രാജ്യങ്ങളാണ് പങ്കെടുക്കുന്നത്. ഇന്ത്യക്ക് പുറമേ പാകിസ്താന്‍, ശ്രീലങ്ക, ബംഗ്ലാദേശ്, അഫ്ഗാനിസ്ഥാന്‍, ഇംഗ്ലണ്ട്, ന്യൂസിലന്‍ഡ്, ഓസ്‌ട്രേലിയ, നെതര്‍ലന്‍ഡ്‌സ്, ദക്ഷിണാഫ്രിക്ക എന്നീ രാജ്യങ്ങളാണ് ലോകകിരീടത്തിനായുള്ള പോരാട്ടത്തില്‍ പങ്കെടുക്കുന്നത്.

അഹമ്മദാബാദ് നരേന്ദ്ര മോദി സ്‌റ്റേഡിയം, മുംബൈ വാംഖെഡെ സ്റ്റേഡിയം, കൊല്‍ക്കത്ത ഈഡന്‍ ഗാര്‍ഡന്‍സ്, ഡല്‍ഹി ഫിറോസ് ഷാ കോട്‌ല സ്‌റ്റേഡിയം, ബംഗളൂരു എം ചിന്നസ്വാമി സ്‌റ്റേഡിയം, ചെന്നൈ എംഎ ചിദംബരം സ്‌റ്റേഡിയം, പൂനെ എംസിഎ സ്റ്റേഡിയം, ഹൈദരാബാദ് രാജീവ് ഗാന്ധി സ്റ്റേഡിയം, ലഖ്‌നൗ ഏക്‌ന സ്റ്റേഡിയം, ധര്‍മശാല എച്ച്പിസിഎ സ്റ്റേഡിയം എന്നിങ്ങനെ പത്ത് സ്റ്റേഡിയങ്ങളിലായാണ് ഏകദിന മത്സരങ്ങള്‍ അരങ്ങേറുന്നത്. തിരുവനന്തപുരം കാര്യവട്ടം ഗ്രീന്‍ ഫീല്‍ഡ് സ്റ്റേഡിയത്തിലും ഗുവാഹത്തി അസം ക്രിക്കറ്റ് അസോസിയേഷന്‍ സ്‌റ്റേഡിയത്തിലുമായി സന്നാഹമത്സരങ്ങള്‍ നടക്കും.

പ്രാഥമിക റൗണ്ടില്‍ ഓരോ ടീമുകളും പരസ്പരം ഏറ്റുമുട്ടും. രാവിലെ പത്തിനും ഉച്ചയ്ക്ക് രണ്ടിനുമാണ് മത്സരങ്ങള്‍ ആരംഭിക്കുക. ഇന്ത്യയുടെ മത്സരങ്ങളെല്ലാം ഉച്ചയ്ക്കാണ് നിശ്ചയിച്ചിരിക്കുന്നത്. പ്രാഥമിക റൗണ്ടില്‍ റിസര്‍വ് ദിനം ഇല്ല. ഏതെങ്കിലും കാരണവശാല്‍ മത്സരം ഉപേക്ഷിക്കേണ്ടി വന്നാല്‍ ഇരുടീമുകള്‍ക്കും പോയിന്റ് പങ്കുവെക്കും. സെമി ഫൈനല്‍ മത്സരങ്ങള്‍ റിസര്‍വ് ദിനമുണ്ട്. അന്നും മത്സരങ്ങള്‍ നടന്നില്ലെങ്കില്‍ ഗ്രൂപ്പ് റൗണ്ടുകളില്‍ കൂടുതല്‍ പോയിന്റ് നേടിയവര്‍ക്ക് ഫൈനലിലേക്ക് പ്രവേശിക്കാം. എന്നാല്‍ ഫൈനലിലും ഇതേരീതിയില്‍ മത്സരം നടക്കാതിരുന്നാല്‍ ഇരു ടീമുകളെയും ജേതാക്കളായി പ്രഖ്യാപിക്കും.

അതേസമയം ഏകദിന ലോകകപ്പിനുള്ള ഇന്ത്യന്‍ ടീമിനെ ഇന്ന് പ്രഖ്യാപിക്കും. ഉച്ചയ്ക്ക് 1.30നാണ് 15 അംഗ ടീമിനെയാണ് പ്രഖ്യാപിക്കുക. അജിത് അഗാര്‍ക്കറുടെ നേതൃത്വത്തിലുള്ള സെലക്ഷന്‍ കമ്മിറ്റി ശ്രീലങ്കയില്‍ വെച്ചാണ് ടീം പ്രഖ്യാപനം.