അബുദാബി: പ്രശസ്തമായ ദുബായ് മഹ്‌സൂസ് നറുക്കെടുപ്പില്‍ വീണ്ടും ഇന്ത്യക്കാരന് സമ്മാനം. യുഎഇയില്‍ പ്രവാസ ജീവിതം നയിക്കുന്ന വിജയ് ആണ് 151ാമത് മഹ്‌സൂസ് സാറ്റര്‍ഡേ മില്യണ്‍സില്‍ ഒരു ലക്ഷം ദിര്‍ഹം (22,64,390 രൂപ) നേടിയത്. 150ാമത് നറുക്കെടുപ്പിലും ഇന്ത്യക്കാരന് ഇതേ സമ്മാനം ലഭിച്ചിരുന്നു. സൗദിയില്‍ പ്രവാസ ജീവിതം നയിക്കുന്ന മലയാളിയായ ഷഫീഖ് ആയിരുന്നു കഴിഞ്ഞ തവണത്തെ വിജയികളിലൊരാള്‍.
ഇലക്ട്രോണിക് നറുക്കെടുപ്പില്‍ തെളിഞ്ഞ ആറ് നമ്പറുകളില്‍ അഞ്ചെണ്ണം ഒത്തുവന്നതോടെ വിജയ് ഒരു ലക്ഷം ദിര്‍ഹത്തിന് അര്‍ഹനാവുകയായിരുന്നു. ആറ്് അക്കങ്ങളും ഒത്തുവന്നാല്‍ രണ്ട് കോടി ദിര്‍ഹം (45,33,41,464 രൂപ) ആണ് സമ്മാനം. എല്ലാ ശനിയാഴ്ചയും മൂന്ന് പേരെയാണ് ഒരു ലക്ഷം ദിര്‍ഹം സമ്മാനത്തിന് തിരഞ്ഞെടുക്കുന്നത്. യുഎഇയില്‍ താമസിക്കുന്ന ഫിലിപ്പീന്‍സുകാരനായ അഗസ്റ്റിന്‍, പാകിസ്ഥാനില്‍ നിന്നുള്ള അന്‍വര്‍ എന്നിവരാണ് ഈയാഴ്ചയിലെ മറ്റു വിജയികള്‍.
കഴിഞ്ഞ 18 വര്‍ഷമായി യുഎഇയിലാണ് വിജയ് താമസിക്കുന്നത്. ഒരു സ്വകാര്യ മാര്‍ബിള്‍ കമ്പനിയില്‍ പ്രോജക്ട് കോര്‍ഡിനേറ്ററായി ജോലി ചെയ്യുകയാണ്. നറുക്കെടുപ്പിന്റെ തുടക്കകാലം മുതല്‍ അതില്‍ പങ്കെടുത്തുവരുന്ന ഇദ്ദേഹം ഒടുവില്‍ വിജയം തന്നം തേടിയെത്തിയതില്‍ ഏറെ ആഹ്ലാദവാനാണ്.
സമ്മാനത്തുക യുഎഇയില്‍ ഒരു ചെറുകിട ബിസിനസ് സംരംഭത്തില്‍ നിക്ഷേപിക്കാനാണ് വിജയ് ഉദ്ദേശിക്കുന്നത്. കഴിഞ്ഞ നറുക്കെടുപ്പില്‍ ഒരു ലക്ഷം ദിര്‍ഹം ലഭിച്ച ഷഫീഖ് 26 വര്‍ഷമായി സൗദിയില്‍ പ്രവാസിയാണ്. സൗദിയില്‍ സീഫുഡ് ബിസിനസ് നടത്തുകയാണിദ്ദേഹം. 149ാമത് മഹ്‌സൂസ് ഡ്രോയില്‍ സര്‍ക്കാര്‍ ഉദ്യോഗസ്ഥനായ യുഎഇ പൗരനു പുറമേ ഈജിപ്തുകാരനും ഫിലിപ്പിനോ പ്രവാസിയുമാണ് ഒരു ലക്ഷം ദിര്‍ഹത്തിന്റെ സമ്മാനം നേടിയിരുന്നത്.
മഹ്‌സൂസില്‍ ലക്ഷക്കണക്കിന് ദിര്‍ഹമിന്റെ പ്രതിവാര സമ്മാനങ്ങളാണ് വിജയികളെ കാത്തിരിക്കുന്നത്. മഹ്‌സൂസിന്റെ ഒരു കുപ്പിവെള്ളം വാങ്ങിയാല്‍ നറുക്കെടുപ്പില്‍ ആര്‍ക്കും പങ്കെടുക്കാം. 35 ദിര്‍ഹം നല്‍കി (792 രൂപ) കുപ്പിവെള്ളം വാങ്ങുമ്പോഴാണ് ടിക്കറ്റ് ലഭിക്കുക. മഹ്‌സൂസിന്റെ ഔദ്യോഗിക വെബ്‌സൈറ്റില്‍ രജിസ്റ്റര്‍ ചെയ്ത് നറുക്കെടുപ്പില്‍ പങ്കെടുക്കാം.
ആഴ്ചതോറും 90,000 പേര്‍ക്ക് സമ്മാനം ലഭിക്കും. പ്രതിവാര വിജയികളുടെ എണ്ണം മൂന്നാഴ്ച മുമ്പാണ് 3,000 ത്തില്‍ നിന്ന് 90,000 ആയി വര്‍ധിപ്പിച്ചത്. കൂടുതല്‍ ആളുകള്‍ക്ക് സമ്മാനം ലഭിക്കുന്നതിനാണിത്. 20,000,000 ദിര്‍ഹം ആണ് മെഗാ സമ്മാനത്തിന് പുറമേ മറ്റു നിരവധി ക്യാഷ് പ്രൈസുകളുമുണ്ട്. അഞ്ചില്‍ രണ്ട് നമ്പറുകള്‍ പൊരുത്തപ്പെട്ടാല്‍ ടിക്കറ്റ് തുകയായ 35 ദിര്‍ഹം സമ്മാനമായി തിരികെകിട്ടും. ഒരു നമ്പര്‍ യോജിച്ചാല്‍ അഞ്ച് ദിര്‍ഹം പ്രോല്‍സാഹന സമ്മാനമുണ്ട്.
