Gulf
2023ൽ അനധികൃതമായി റോഡ് മുറിച്ചു കടന്ന 44,000 ത്തോളം പേർക്ക് പിഴ
ഗതാഗതനിയമങ്ങളില്‍ യുഎഇയില്‍ അടിമുടി മാറ്റം വന്നെങ്കിലും നിയമലംഘനങ്ങള്‍ക്ക് കുറവില്ല. കാൽനടയാത്രക്കാർ നിയമവിരുദ്ധമായി റോഡ് മുറിച്ചുകടക്കുന്നത് യുഎഇയില്‍ വ്യാപകമാകുന്നു. കർശനമായ പിഴകളും ജാഗ്രതയോടെയുള്ള നിയമനിർവഹണ സംവിധാനവും ഉണ്ടായിരുന്നിട്ടും താമസക്കാർ തങ്ങളുടെ ജീവന്‍തന്നെ അപകടത്തിലാക്കുന്നു. ഇതിന്‍റെ അനന്തരഫലങ്ങളെക്കുറിച്ച് ചിന്തിക്കാതെ നിയമം ലംഘിക്കുന്നത് തുടരുകയാണ്. റോഡ് മുറിച്ചുകടക്കുന്നത് വാഹനമോടിക്കുന്നവർക്കും അധികാരികൾക്കും ഒരുപോലെ ആശങ്കയായി മാറിയിരിക്കുന്നു. അമിതവേഗതയിൽ വരുന്ന കാർ ഇടിക്കാനുള്ള സാധ്യത കൂടുതലാണ്.
കഴിഞ്ഞ വർഷം ദുബായിൽ അനധികൃതമായി റോഡ് മുറിച്ചുകടന്നതിനെത്തുടർന്നുണ്ടായ അപകടങ്ങളിൽ എട്ട് പേർ മരിച്ചതായി അധികൃതർ അറിയിച്ചു. നിയമലംഘനം നടത്തിയ 43,800ലധികം കാൽനടക്കാർക്ക് പിഴ ചുമത്തി. നിർദിഷ്ട സ്ഥലങ്ങൾ ഒഴികെയുള്ള ഇടങ്ങളിൽ റോഡ് മുറിച്ചു കടക്കുന്നവർ അപകടത്തിലുൾപ്പെട്ടാൽ തടവും 5,000 മുതൽ 10,000 ദിർഹം വരെ പിഴയും ശിക്ഷ ലഭിക്കും.
