ജിസാന്‍: തെക്ക്പടിഞ്ഞാറന്‍ സൗദി അറേബ്യയിലെ ജിസാനില്‍ ബസ് മറിഞ്ഞ് ഒമ്പത് സ്‌കൂള്‍ അധ്യാപികമാര്‍ ഉള്‍പ്പെടെ 12 പേര്‍ക്ക് പരിക്കേറ്റു. അപകടത്തില്‍ രണ്ട് വിദ്യാര്‍ഥികള്‍ക്കും ബസ് ഡ്രൈവര്‍ക്കും പരിക്കേറ്റു. ഒരാഴ്ചയ്ക്കിടെ രാജ്യത്ത് റിപ്പോര്‍ട്ട് ചെയ്ത സമാനമായ രണ്ടാമത്തെ അപകടമാണിത്.
സ്‌കൂള്‍ പഠനം കഴിഞ്ഞ് വീട്ടിലേക്ക് മടങ്ങുന്നതിനിടെ കഴിഞ്ഞ ദിവസം വൈകുന്നേരമാണ് ബസ് അപകടത്തില്‍പെട്ടത്. നിയന്ത്രണംവിട്ട ബസ് മറിഞ്ഞ ശേഷം സിമന്റ് തടയണയില്‍ ഇടിച്ചുനില്‍ക്കുകയായിരുന്നു. അപകടകാരണം വ്യക്തമല്ല. സമീപത്തെ തോട്ടിലേക്ക് വീഴാതെ നിന്നതിനാലാണ് വന്‍ ദുരന്തം ഒഴിവായതെന്ന് അധ്യാപികമാരുടെ ബന്ധുക്കള്‍ സൗദി വാര്‍ത്താ വെബ്‌സൈറ്റായ അഖ്ബര്‍ 24നോട് പറഞ്ഞു.
തലയിലും കാലിലും മുതുകിലും ഉള്‍പ്പെടെ വിവിധ പരിക്കുകളോടെ ഇവരെ തൊട്ടടുത്ത പ്രദേശിക ആശുപത്രിയില്‍ പ്രവേശിപ്പിച്ചു. പരിക്കേറ്റ ഒരാളുടെ കൈക്ക് ശസ്ത്രക്രിയ നടത്തി. ചിലരെ പിന്നീട് ആശുപത്രിയില്‍ നിന്ന് ഡിസ്ചാര്‍ജ് ചെയ്തു.
കഴിഞ്ഞയാഴ്ച പടിഞ്ഞാറന്‍ സൗദിയിലെ യാമ്പുവില്‍ സ്‌കൂളിലേക്ക് പോകുന്നതിനിടെ റോഡപകടത്തില്‍ സ്‌കൂള്‍ അധ്യാപിക മരിക്കുകയും അഞ്ച് പേര്‍ക്ക് പരിക്കേല്‍ക്കുകയും ചെയ്തിരുന്നു. അധ്യാപികമാര്‍ സഞ്ചരിച്ചിരുന്ന വാഹനമാണ് അപകടത്തില്‍ പെട്ടിരുന്നത്. പരിക്കേറ്റവരില്‍ രണ്ട് പേര്‍ക്ക് ഗുരുതരമായ മുറിവുകളുണ്ടായി.
കഴിഞ്ഞയാഴ്ച മറ്റൊരു അപകടത്തില്‍, തെക്ക്പടിഞ്ഞാറന്‍ സൗദി അറേബ്യയിലെ തനോമ ഗവര്‍ണറേറ്റില്‍ മിനിബസ് മറിഞ്ഞ് ഒമ്പത് വനിതാ യൂണിവേഴ്‌സിറ്റി വിദ്യാര്‍ത്ഥികള്‍ക്കും ഒരു ഡ്രൈവര്‍ക്കും പരിക്കേറ്റിരുന്നു. വിദ്യാര്‍ഥികള്‍ ടീച്ചേഴ്‌സ് ട്രെയിനിങ് കോളേജില്‍ നിന്ന് മടങ്ങുന്നതിനിടെയായിരുന്നു അപകടം. ഒരു വിദ്യാര്‍ഥിക്കും ബസ് ഡ്രൈവര്‍ക്കും ഗുരുതരമായി പരിക്കേല്‍ക്കുകയുമുണ്ടായി.
