Gulf
യുഎഇ; പുതിയ നികുതി ഇളവുകൾ പ്രഖ്യാപിച്ചു
യുഎഇയിൽ മൂല്യവർധിത നികുതി നിയമത്തിലെ ചില വ്യവസ്ഥകൾ ഭേദഗതി വരുത്തി ധനമന്ത്രാലയം. ശനിയാഴ്ചയാണ് യുഎഇ ക്യാബിനറ്റ് വാറ്റ് നിയമത്തിൽ മാറ്റങ്ങൾ കൊണ്ട് വന്ന വിവരം മന്ത്രാലയം അറിയിച്ചത്. പുതിയ ഭേദഗതി പ്രകാരം മൂന്ന് സേവനങ്ങളെ ഒഴിവാക്കിയിട്ടുണ്ട്. നിക്ഷേപ ഫണ്ട് മാനേജ്‌മെൻറ് സേവനങ്ങൾ, വെർച്വൽ ആസ്തികളുമായി ബന്ധപ്പെട്ട ചില സേവനങ്ങൾ കൂടാതെ ചാരിറ്റബിൾ, ഗവൺമെൻറ് സ്ഥാപനങ്ങളും ജീവകാരുണ്യ സ്ഥാപനങ്ങളും തമ്മിലുള്ള ഇൻ-കൈൻഡ് സംഭാവനകൾ എന്നീ മൂന്ന് സേവനങ്ങൾക്കാണ് ഇളവുകൾ പ്രഖ്യാപിച്ചത്.
നികുതി വരുമാനം ശേഖരിക്കുന്നതിനും നിക്ഷേപ അന്തരീക്ഷം വർധിപ്പിക്കുന്നതിനും കൂടുതൽ ബിസിനസുകാരെയും നിക്ഷേപകരെയും രാജ്യത്തേക്ക് ആകർഷിക്കുന്നതിനും ഇടയിൽ സന്തുലിതാവസ്ഥ കൈവരിക്കാൻ ലക്ഷ്യമിട്ട് യുഎഇയിലെ നികുതി അന്തരീക്ഷം പരിഷ്കരിക്കുന്നതിനുള്ള തുടർച്ചയായ ശ്രമങ്ങളുടെ ഭാഗമാണ് ഈ മാറ്റങ്ങളെന്ന് അതോറിറ്റി അറിയിച്ചു.ജിസിസി ഏകീകൃത വാറ്റ് ഉടമ്പടി, മുൻകാല അനുഭവങ്ങൾ, ബിസിനസ് സമൂഹം നേരിടുന്ന വെല്ലുവിളികൾ, ഓഹരി ഉടമകളുടെ ശുപാർശകൾ എന്നിവ കണക്കിലെടുത്ത് അന്താരാഷ്ട്ര മികച്ച സമ്പ്രദായങ്ങൾക്കനുസൃതമായാണ് ഭേദഗതികൾ രൂപകൽപ്പന ചെയ്തിരിക്കുന്നത്.