ദുബായ്: ചൈനീസ് ദേശീയ ദിനാഘോഷങ്ങളുടെ ഭാഗമായി, ദുബായ് അന്താരാഷ്ട്ര വിമാനത്താവളത്തിൽ (ടെർമിനൽ 3) എത്തിച്ചേർന്ന ചൈനീസ് യാത്രികർക്ക്
ഹൃദയംഗമമായ സ്വീകരണം ഒരുക്കി. ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സാണ് (GDRFA) വരവേൽപ്പിന് നേതൃത്വം നൽകിയത്.
വിമാനത്താവളത്തിലെ എമിഗ്രേഷൻ കൗണ്ടറുകൾ ചൈനീസ് പതാകകളാൽ അലങ്കരിക്കുകയും സ്മാർട്ട് ഗേറ്റുകൾ ചുവന്ന നിറത്തിൽ പ്രകാശിക്കുകയുമുണ്ടായി. ദേശീയ ദിനാശംസകൾ അച്ചടിച്ച ബ്രോഷറുകൾ യാത്രികർക്കായി വിതരണം ചെയ്തു. പ്രത്യേകതയാർന്നൊരു ഓർമ്മയായി, സന്ദർശകർക്ക് വേണ്ടി പ്രത്യേക പാസ്പോർട്ട് സ്റ്റാമ്പും പുറത്തിറക്കി.
ജി.ഡി.ആർ.എഫ്.എയുടെ കാർട്ടൂൺ കഥാപാത്രങ്ങളായ സാലമും സലാമയും, കൂടാതെ ചൈനീസ് ഭാഷ സംസാരിക്കുന്ന ജീവനക്കാരും ചേർന്നാണ് യാത്രികരെ ദുബായിലേക്ക് സ്വാഗതം ചെയ്തത്.
“ദുബായ് മനുഷ്യ സ്പർശമുള്ള നഗരമാണ്. ഇവിടെ എത്തുന്ന ഏത് രാജ്യക്കാരനും സ്വന്തം നാട്ടിലെ സ്നേഹവും ആത്മാർത്ഥതയും അനുഭവിക്കാനാകും,” എന്ന് അധികൃതർ വ്യക്തമാക്കി.
ചൈനീസ് യാത്രികർക്കായി ഒരുക്കിയ ഈ സ്വീകരണം, ദുബായുടെ ഉൾക്കൊള്ളലിനെയും വൈവിധ്യത്തോടുള്ള ആദരവിനെയും തെളിയിക്കുന്നതിനൊപ്പം അന്താരാഷ്ട്ര ദിനങ്ങൾക്കും ആഘോഷങ്ങൾക്കും നഗരം നൽകുന്ന പ്രാധാന്യത്തിന്റെ തെളിവായിത്തീർന്നു. പ്രത്യേക വരവേൽപ്പ് അവരുടെ യാത്രയെ കൂടുതൽ മനോഹരമാക്കിയതായി സന്ദർശകർ പങ്കുവച്ചു.
