അബുദാബി: രാജ്യത്തെ തൊഴിലാളികള്‍ക്ക് വിശുദ്ധ റമദാന്‍ മാസത്തില്‍ ജോലി സമയത്തില്‍ രണ്ടു മണിക്കൂര്‍ ഇളവ് ലഭിച്ചേക്കും. യുഎഇ തൊഴില്‍ നിയമമനുസരിച്ച് സ്വകാര്യ മേഖലയിലെ തൊഴിലാളികള്‍ ദിവസത്തില്‍ ഒരു മണിക്കൂര്‍ ഇടവേളയോടെ എട്ട് മണിക്കൂര്‍ ജോലി ചെയ്യേണ്ടതുണ്ട്. കഴിഞ്ഞ വര്‍ഷം റദമാനില്‍ ഇത് ആറ് മണിക്കൂറായി ഹ്യൂമന്‍ റിസോഴ്‌സസ് ആന്‍ഡ് എമിറേറ്റൈസേഷന്‍ മന്ത്രാലയം ചുരുക്കിയിരുന്നു.
കഴിഞ്ഞ വര്‍ഷത്തെ അതേ രീതിയില്‍ ഈ റമദാനിലും സ്വകാര്യ മേഖലയില്‍ ജോലി സമയം ആറു മണിക്കൂറാക്കുമെന്ന് പ്രതീക്ഷിക്കുന്നതായി ടൈം ഔട്ട് ദുബായ് റിപ്പോര്‍ട്ട് ചെയ്തു. നോമ്പ് അനുഷ്ടിക്കാത്തവര്‍ക്കും ഇതര മതവിശ്വാസികള്‍ക്കുമെല്ലാം ജോലി സമയത്തിലെ രണ്ട് മണിക്കൂര്‍ ഇളവ് ബാധകമായിരിക്കും. ഫെഡറല്‍ നിയമം ആയതിനാല്‍ യുഎഇയിലെ എല്ലാ എമിറേറ്റുകളും നിയമത്തിന്റെ പരിധിയില്‍ വരും.
നോമ്പ് കാലത്ത് പതിവ് ജോലി സമയക്രമത്തില്‍ മാറ്റംവരുത്തി സൗകര്യപ്രദമായ തൊഴില്‍ ഷെഡ്യൂളുകള്‍ ക്രമീകരിക്കണമെന്ന് യുഎഇ മാനവ വിഭവശേഷി വികസന മന്ത്രാലയം കമ്പനികളോട് അഭ്യര്‍ത്ഥിച്ചിട്ടുണ്ട്. റമദാനില്‍ ഫ്‌ലെക്‌സിബിള്‍ അല്ലെങ്കില്‍ റിമോട്ട് വര്‍ക്ക് പാറ്റേണുകള്‍ പ്രയോഗിക്കാനാണ് ആവശ്യപ്പെട്ടിരിക്കുന്നത്. ജോലിയുടെ ആവശ്യകതകള്‍ക്കും ജോലിയുടെ സ്വഭാവത്തിനും അനുസൃതമായി ദൈനംദിന പ്രവൃത്തി സമയത്തില്‍ ക്രമീകരണങ്ങള്‍ വരുത്താം.
ദുബായ് ഇസ്ലാമിക് അഫയേഴ്സ് ആന്‍ഡ് ചാരിറ്റബിള്‍ ആക്റ്റിവിറ്റീസ് ഡിപാര്‍ട്ട്മെന്റ് (ഐഎസിഎഡി) പ്രസിദ്ധീകരിച്ച ഹിജ്റി കലണ്ടര്‍ പ്രകാരം റമസാന്‍ മാര്‍ച്ച് 12ന് ആണ്. മാസപ്പിറവി ദൃശ്യമാവുന്നതിന് അനുസരിച്ച് മാര്‍ച്ച് 11 അല്ലെങ്കില്‍ 12ന് ആയിരിക്കും റമദാന്‍ വ്രതാരംഭം. ഇതിനനുസരിച്ച് ജോലിസമയവും മറ്റ് ദിനചര്യകളും മാറ്റുന്നതിനുള്ള ഒരുക്കത്തിലാണ് യുഎഇ നിവാസികള്‍.
ഏപ്രില്‍ എട്ട് അല്ലെങ്കില്‍ ഒമ്പതിനാണ് റമദാന്‍ അവസാനിക്കുക. തൊട്ടടുത്ത ദിവസം മുതല്‍ ചെറിയ പെരുന്നാല്‍ അവധിയും അനുബന്ധ അവധികളും ലഭിക്കും. ജോലി സമയം പോലെ തന്നെ സ്‌കൂള്‍ സമയത്തിലും റമദാനില്‍ മാറ്റമുണ്ടാവും. സ്‌കൂളുകളിലെ അധ്യയന ദിനങ്ങള്‍ ദിവസേന അഞ്ച് മണിക്കൂറായി കുറയ്ക്കാറുണ്ട്. ഇത്തവണ റമദാന്‍ പകുതി മുതല്‍ മൂന്നാഴ്ച ശൈത്യകാല അവധിയാണ്.
റദമാനില്‍ പണമടച്ചുള്ള പാര്‍ക്കിങ് സമയത്തിലും വ്യത്യാസമുണ്ടാവും. കഴിഞ്ഞ വര്‍ഷം ദുബായില്‍ രാവിലെ 8 മുതല്‍ വൈകിട്ട് 6 വരെ ഫീസ് ഈടാക്കിയിരുന്നു. തിങ്കള്‍ മുതല്‍ ശനി വരെ രാത്രി 8 മുതല്‍ അര്‍ധരാത്രി 12 വരെ. പ്രവൃത്തിദിവസങ്ങളില്‍ താമസക്കാര്‍ക്ക് രണ്ട് മണിക്കൂര്‍ സൗജന്യ പാര്‍ക്കിങ് നല്‍കുന്നു. ശനിയാഴ്ച മുതല്‍ വ്യാഴം വരെ രാവിലെ 8 മുതല്‍ അര്‍ധരാത്രി വരെയാണ് ഷാര്‍ജ ഫീസ് ഈടാക്കിയത്. റെസ്റ്റോറന്റുകള്‍, കഫേകള്‍ തുടങ്ങി മിക്ക ഭക്ഷണശാലകളിലും ഇത് സാധാരണ പോലെയാണ്. റമസാനില്‍ പല ഹോട്ടലുകളും പ്രത്യേക ഇഫ്താര്‍ മെനു പുറത്തിറക്കാറുണ്ട്. ഓഫറുകളും കിഴിവുകളും നല്‍കിവരുന്നു.
