ദുബായ്: രൂപയുടെ മൂല്യം ഇടിഞ്ഞതോടെ ദിർഹവും മറ്റു ഗൾഫ് കറൻസികളും നേട്ടമുണ്ടാക്കി. ഒരു ദിർഹത്തിന് 22.56 രൂപയായിരുന്നു ഇന്നലെ ലഭിച്ച വിനിമയ നിരക്ക്. നാട്ടിലേക്ക് പണം അയയ്ക്കുന്ന പ്രവാസികൾക്ക് ഈ സാഹചര്യം ഗുണം ചെയ്യും.
അടുത്തിടെ ഇത്രയും ഉയർന്ന നിരക്ക് ലഭിച്ചിട്ടില്ല. കഴിഞ്ഞ ഒരു വർഷമായി ദിർഹവുമായി 22.2 ആയിരുന്നു ലഭിച്ചിരുന്നു ശരാശരി നിരക്ക്. 36 പൈസയുടെ വർധനവാണ് ഉണ്ടായത്. 0.12% ആണ് ദിർഹത്തിന്റെ നേട്ടം ഇപ്പോൾ ഉണ്ടായിരിക്കുന്നത്. ഡോളറുമായുള്ള വിനിമയ നിരക്ക് 82.8 രൂപയാണ് ലഭിക്കുന്നത്. 82.9വരെ ഉയരുമെന്നാണ് ഈ രംഗത്തെ വിദഗ്തർ പറയുന്നത്.
യുഎഇയിലെ മാത്രമല്ല മറ്റു ഗൾഫ് കറൻസികളുടെ നിരക്കിലും വലിയ മാറ്റമാണ് ഉണ്ടായിരിക്കുന്നത്. ഖത്തർ റിയാലാണ് ഏറ്റവും ഉയർന്ന നേട്ടം സ്വന്തമാക്കിയത്. 0.9% വർധന ആണ് മൂല്യത്തിൽ ഉണ്ടായിരിക്കുന്നത്. ഒമാൻ റിയാലും ഇന്ത്യൻ രൂപയുമായുള്ള വിനിമയ നിരക്കിൽ 0.13% വർധനയുണ്ടായി. ഒരു റിയാലിന് 215.18 രൂപ ലഭിക്കും. ബഹ്റൈൻ ദിനാർ: 219.76, സൗദി റിയാൽ: 22.08, ഖത്തർ റിയാൽ: 22.73, കുവെെറ്റ് ദിനാർ: 269.16
