കൊച്ചി: രാജ്യത്ത് പെൺകുട്ടികളുടെ ജനനം കുറയുന്ന പശ്ചാത്തലത്തിൽ കേന്ദ്രം പ്രഖ്യാപിച്ച പദ്ധതി കേരളത്തിലും നടപ്പാക്കാനൊരുങ്ങുന്നു. രണ്ടാം പ്രസവത്തിൽ പെൺകുട്ടിയാണെങ്കിൽ പ്രധാനമന്ത്രി മാതൃവന്ദന പദ്ധതി പ്രകാര ആറായിരം രൂപ അമ്മയ്ക്ക് ലഭിക്കും. പദ്ധതി നടപ്പാക്കണമെന്ന് കേന്ദ്രം നിർദ്ദേശിച്ചതിന്റെ അടിസ്ഥാനത്തിൽ സംസ്ഥാന വനിതാ ശിശുവികസന ഡയറക്ടറുടെ കാര്യാലയം ഉത്തരവിറക്കി. കേന്ദ്ര-സംസ്ഥാന ജീവനക്കാർ, പൊതുമേഖലാ ജീവനക്കാർ, സമാനമായ മറ്റ് ആനുകൂല്യങ്ങൾ ലഭിക്കുന്നവർ എന്നിവർ ഒഴികെയുള്ള എല്ലാവർക്കും പദ്ധതിയുടെ ആനുകൂല്യം ലഭിക്കും.
2019-21ലെ ദേശീയ കുടുംബാരോഗ്യ സർവേ പ്രകാരം ഇന്ത്യയിൽ 1000 ആൺകുട്ടികൾക്ക് 929 പെൺകുട്ടികൾ എന്നതാണ് നിരക്ക്. 2015-16 വർഷം ആയിരം ആൺകുട്ടികൾക്ക് 919 പെൺകുട്ടികൾ എന്നായിരുന്നു. ഇതിൽ കാര്യമായ പുരോഗതിയുണ്ടാകാത്ത പശ്ചാത്തലത്തിലാണ് പെൺകുഞ്ഞുങ്ങളുടെ ജനനത്തെ പ്രോത്സാഹിപ്പിക്കുന്ന പദ്ധതി കേന്ദ്രം നടപ്പാക്കിയത്.
ഏറ്റവും പുതിയ സർവേ പ്രകാരം കേരളത്തിൽ ആയിരം ആൺകുട്ടികൾക്ക് 951 പെൺകുട്ടികളാണുള്ളത്. 2015-16 വർഷത്തെ സർവേ അനുസരിച്ച് 1000 ആൺകുട്ടികൾക്ക് 1047 പെൺകുട്ടികൾ എന്നായിരുന്നു. കേരളം ഉൾപ്പെടെ 11 സംസ്ഥാനങ്ങളിൽ പെൺകുട്ടികളുടെ ജനന നിരക്ക് കുറഞ്ഞിട്ടുണ്ട്. പ്രധാനമന്ത്രി മാതൃവന്ദന യോജന പദ്ധതി മുൻകാല പ്രാബല്യത്തോടെയാണ് കേരളത്തിൽ അവതരിപ്പിക്കുന്നത്. 2022 ഏപ്രിൽ ഒന്നിനു ശേഷം പെൺകുഞ്ഞുങ്ങൾക്ക് ജന്മം നൽകിയ അമ്മയ്ക്ക് 2023 ജൂൺ 30 വരെ അപേക്ഷ സമർപ്പിക്കാം.
അതേസമയം 2023 ജുലൈ ഒന്നു മുതൽ ധനസഹായം ലഭിക്കണമെങ്കിൽ രണ്ടാം പ്രസവത്തിലെ പെൺകുഞ്ഞിന് ഒമ്പത് മാസം തികയുന്നതിനു മുമ്പ് പേര് അങ്കണവാടിയിൽ രജിസ്റ്റർ ചെയ്തിരിക്കണം. അങ്കണവാടിക്കു പുറമേ http://pmmvy.nic.in എന്ന പോർട്ടലിലും രജിസ്റ്റർ ചെയ്യാം. ഇതേ പോർട്ടൽ വഴിയാണ് അങ്കണവാടി ജീവനക്കാരും രജിസ്റ്റർ ചെയ്യുന്നത്. അതിനാൽ പോർട്ടൽ സജ്ജമായതിനു ശേഷമേ അങ്കണവാടിവഴിയുള്ള രജിസ്ട്രേഷനും ആരംഭിക്കൂ.
നിലവിൽ ആദ്യ പ്രസവത്തിൽ ആൺകുഞ്ഞാണെങ്കിലും പെൺകുഞ്ഞാണെങ്കിലും 5000 രൂപ നൽകി വരുന്നുണ്ട്. ഇതിനു പുറമേയാണ് രണ്ടാമത്തെ പ്രസവത്തിൽ പെൺകുഞ്ഞാണെങ്കിൽ 6000 രൂപ നൽകുന്ന പദ്ധതി അവതരിപ്പിക്കുന്നത്. ആനുകൂല്യം ആവശ്യമുള്ളവർക്ക് അടുത്തുള്ള അങ്കണവാടിയിൽ രജിസ്റ്റർ ചെയ്യാം.
