മുംബൈ: തൊഴില്‍ വിസ ലഭിക്കാന്‍ ഇന്ത്യയില്‍ വച്ച് തന്നെ വിരലടയാളം നല്‍കണമെന്ന തീരുമാനം നടപ്പാക്കുന്നത് സൗദി അറേബ്യ വീണ്ടും നീട്ടി. സൗദി അറേബ്യയിലേക്കുള്ള തൊഴില്‍ വിസ സ്റ്റാമ്പിങിന് ബയോമെട്രിക് നിര്‍ബന്ധമാക്കിയ ഉത്തരവ് ഇന്നലെ ജനുവരി 15 മുതല്‍ പ്രാബല്യത്തില്‍ വന്നെങ്കിലും 10 ദിവസത്തേക്ക് കൂടി നീട്ടുകയായിരുന്നു. മുംബൈയിലെ സൗദി കോണ്‍സുലേറ്റ് എല്ലാ ട്രാവല്‍ ഏജന്റുമാരെയും ഇക്കാര്യം അറിയിച്ചു.
2022 മെയ് 29 മുതല്‍ പുതിയ വ്യവസ്ഥ നടപ്പാക്കാനായിരുന്നു ആദ്യം കോണ്‍സുലേറ്റിന്റെ സര്‍ക്കുലര്‍. വിഎഫ്എസ് ഓഫീസുകള്‍ ആവശ്യത്തിന് രാജ്യത്ത് ഇല്ലാത്തതിനാല്‍ നിയമം നടപ്പാക്കുന്നത് വിസ നടപടികള്‍ക്ക് കാലതാമസമുണ്ടാക്കുമെന്ന് ട്രാവല്‍ ഏജന്‍സികള്‍ ചൂണ്ടിക്കാട്ടിയതിനെ തുടര്‍ന്ന് ഉത്തരവ് മരവിപ്പിക്കുകയായിരുന്നു. തീരുമാനം നടപ്പിലാവാന്‍ മണിക്കൂറുകള്‍ ശേഷിക്കെ ആയിരുന്നു ഇത്.
ജനുവരി 15 മുതല്‍ നടപ്പാക്കുമെന്ന് അറിയിച്ച് കഴിഞ്ഞയാഴ്ചയാണ് പുതിയ സര്‍ക്കുലര്‍ ട്രാവല്‍സുകള്‍ക്ക് ലഭിച്ചത്. ഈ സര്‍ക്കുലറാണ് 10 ദിവസത്തേക്ക് കൂടി മരവിപ്പിച്ചത്. നാളെ മുതല്‍ ഈ മാസം 26 വരെ വിസ സ്റ്റാമ്പ് ചെയ്യുന്നതിന് കോണ്‍സുലേറ്റില്‍ പാസ്പോര്‍ട്ടുകള്‍ സ്വീകരിക്കും. എന്നാല്‍ 26ന് ശേഷം വിരലടയാളം നിര്‍ബന്ധമാണെന്നും കോണ്‍സുലേറ്റ് അറിയിച്ചു. വിഎഫ്എസ് ഓഫീസില്‍ നേരിട്ടെത്തി ബയോമെട്രിക് വിവരങ്ങള്‍ നല്‍കേണ്ടിവരും.
ബയോമെട്രിക് നിര്‍ബന്ധമായതിനാല്‍ എല്ലാ വിസ ഏജന്റുമാരും വിഎഫ്എസ് വെബ്സൈറ്റില്‍ രജിസ്റ്റര്‍ ചെയ്യണമെന്ന് സൗദി കോണ്‍സുലേറ്റ് ആവശ്യപ്പെട്ടിരുന്നു. നിലവില്‍ വിസിറ്റ്, ടൂറിസ്റ്റ് വിസകള്‍ക്ക് മാത്രമാണ് വിരലടയാളം നല്‍കേണ്ടത്. ഏതാനും മാസങ്ങള്‍ക്ക് മുമ്പാണ് ഇത് നിര്‍ബന്ധമാക്കിയത്. ജനുവരി 26നു ശേഷം എല്ലാ തൊഴില്‍ വിസകള്‍ക്കും ബാധകമാവും. ഉംറ തീര്‍ത്ഥാടനത്തിന് ഇലക്‌ട്രോണിക് വിസ ആയതിനാല്‍ ഓഫിസുകളിലൊന്നും പോകാതെ ലഭ്യമാണ്.
വിസ അനുവദിക്കുന്നതിന് മുമ്പ് തന്നെ ഇന്ത്യയില്‍ വച്ച് വിരലടയാളം ശേഖരിക്കുന്നരീതി നടപ്പാക്കുന്നതോടെ സൗദിയിലെത്തുമ്പോള്‍ വിമാനത്താവളങ്ങളിലെ നടപടികള്‍ എളുപ്പമാവും. മാത്രമല്ല, കേസുകളിലോ നിയമപ്രശ്‌നങ്ങളിലോ പെട്ടതു കാരണമോ പ്രവേശന വിലക്ക് കാരണമോ വിമാനത്താവളങ്ങളില്‍ നിന്ന് പുറത്തിറങ്ങാന്‍ കഴിയാതെ വരുന്ന സാഹചര്യവും ഏതാണ്ട് പൂര്‍ണമായി ഇല്ലാതാവും. ബയോമെട്രിക് വിവരങ്ങള്‍ ശേഖരിക്കുമ്പോള്‍ ഇത്തരം വിലക്കുണ്ടെന്ന് കണ്ടാല്‍ വിസ സ്റ്റാമ്പ് ചെയ്യില്ല.
എന്നാല്‍, വിരലടയാളം ശേഖരിക്കാന്‍ രാജ്യത്തിന്റെ വിവിധ ഭാഗങ്ങളില്‍ ആവശ്യാനുസരണം വിഎഫ്എസ് ഓഫിസുകള്‍ ഇല്ലാത്തത് പ്രതിസന്ധി സൃഷ്ടിക്കും. കോഴിക്കോട്, കൊച്ചി, ചെന്നൈ, ബംഗളൂരു, മുംബൈ, ഹൈദരാബാദ്, അഹമ്മദാബാദ്, ലക്‌നോ, കൊല്‍ക്കത്ത, ന്യൂഡല്‍ഹി എന്നിവിടങ്ങളിലാണ് നിലവില്‍ വിഎഫ്എസ് കേന്ദ്രങ്ങളുള്ളത്.
