ദോഹ: യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റ് അരിത ബാബുവിനെ വീഡിയോ കോളില്‍ വിളിച്ച് മോശമായി പെരുമാറുകയും അശ്ലീല വീഡിയോയും സന്ദേശവും അയക്കുകയും ചെയ്തയാളെ പൊക്കിയത് ഖത്തറിലെ പ്രവാസികള്‍. അരിത ബാബു ഇക്കാര്യം ഫെയ്സ്ബുക്കില്‍ പങ്കുവെച്ചതോടെ ഒരു മണിക്കൂറിനുള്ളില്‍ ഖത്തറില്‍ ജോലിചെയ്യുന്ന പ്രതിയെ ഇവിടെയുള്ള പ്രവാസി മലയാളികള്‍ കണ്ടെത്തുകയായിരുന്നു.

മലപ്പുറം അമരമ്പലം സ്വദേശി ഇ പി ഷമീര്‍ എന്ന വ്യക്തിയാണ് ഖത്തറില്‍ നിന്ന് അരിതയോട് മോശമായി പെരുമാറിയത്. ഖത്തറിലെ കോണ്‍ഗ്രസിന്റെ പ്രവാസിസംഘടനയായ ‘ഇന്‍കാസി’ന്റെ ഭാരവാഹികളാണ് ഇയാളെ അന്വേഷിച്ചുകണ്ടെത്തിയത്. ഇതോ തുടര്‍ന്ന് പ്രതി ക്ഷമചോദിച്ച് മറ്റൊരു നമ്പറില്‍ നിന്ന് സന്ദേശമയച്ചു. മാപ്പ്പറഞ്ഞുകൊണ്ടുള്ള വീഡിയോ സന്ദേശവും അയച്ചുനല്‍കി.

പ്രതിയെ മറ്റൊരു നമ്പറില്‍ നിന്ന് വീഡിയോ കോള്‍ ചെയ്താണ് പ്രവാസികള്‍ തിരിച്ചറിഞ്ഞത്. അരിത ബാബു പ്രവാസി സുഹൃത്തുക്കള്‍ക്ക് പ്രതിയുടെ നമ്പര്‍ അയച്ചുനല്‍കിയിരുന്നു. വീഡിയോ കോള്‍ ചെയ്തപ്പോള്‍ പ്രതി ഫോണ്‍ അറ്റെന്‍ഡ് ചെയ്തു. പ്രതിയുടെ മുഖം വ്യക്തമായതോടെ സ്‌ക്രീന്‍ ഷോട്ട് എടുത്തു. ഈ സ്‌ക്രീന്‍ ഷോട്ട് സഹിതം അരിത ഫേസ്ബുക്കില്‍ പോസ്റ്റിട്ട് ചുരുങ്ങിയ സമയത്തിനുള്ളില്‍ പ്രതിയെ കണ്ടെത്താനും സാധിച്ചു.

അരിത ബാബുവിന്റെ നമ്പര്‍ ആണെന്ന് അറിഞ്ഞിരുന്നില്ലെന്നും മറ്റൊരു പെണ്‍കുട്ടിയാണെന്ന് കരുതിയാണ് സന്ദേശമയച്ചതെന്നുമാണ് പ്രതി ഇന്‍കാസ് പ്രവര്‍ത്തകരോട് പറഞ്ഞത്. വാട്സാപ്പ് പ്രൊഫൈലില്‍ ഒരു പെണ്‍കുട്ടിയുടെ ഫോട്ടോ കണ്ടതുകൊണ്ടാണ് വീഡിയോകോള്‍ ചെയ്തതെന്നും അശ്ലീലസന്ദേശം അയച്ചതെന്നും പ്രതി വിശദീകരിച്ചു. മാപ്പ് ചോദിച്ചുള്ള വീഡിയോയിലും പ്രതി ഇക്കാര്യം ആവര്‍ത്തിച്ചു.

വാട്‌സ്ആപ് വഴിയാണ് പ്രതി തുടര്‍ച്ചയായി വീഡിയോ കോള്‍ ചെയ്തത്. ഉച്ച മുതല്‍ വിദേശ നമ്പരില്‍ നിന്നും കോള്‍ വന്നുകൊണ്ടേയിരുന്നു. ആരാണെന്ന് മെസേജില്‍ ചോദിച്ചിട്ട് മറുപടി ലഭിച്ചില്ല. എന്നിട്ടും വീഡിയോ കോള്‍ തുടര്‍ന്നു. ഇതോടെ ക്യാമറ ഓഫ് ചെയ്ത ശേഷം അറ്റന്‍ഡ് ചെയ്തുനോക്കിയെങ്കിലും പ്രതിയുടെ ക്യാമറ മറച്ചുപിടിച്ച നിലയിലായിരുന്നു. കുറേനേരം ഹലോ പറഞ്ഞിട്ടും പ്രതികരിക്കുകയോ മുഖം കാണിക്കുകയോ ചെയ്തില്ല. കോള്‍ കട്ട് ചെയ്ത ശേഷം ഒരുപരിചയുമില്ലാത്ത ആളെ ഇങ്ങനെ വിളിക്കുന്നതും ശല്യംചെയ്യുന്നതും മോശമാണെന്ന് പറഞ്ഞ് അയാള്‍ക്ക് സന്ദേശം അയച്ചെന്നും അരിത വ്യക്തമാക്കി.

തുടര്‍ന്ന് പ്രതി കുറേ അശ്ലീല ദൃശ്യങ്ങള്‍ അയക്കുകയും ഇതാണ് വേണ്ടതെന്ന് വാട്‌സ്ആപ് മെസ്സേജ് ചെയ്യുകയും ചെയ്തു. തുടര്‍ന്നാണ് അരിത കായംകുളം ഡിവൈഎസ്പി ഓഫീസില്‍ നേരിട്ടെത്തി പരാതി നല്‍കുകയും എസ്പിക്കും ഡിജിപിക്കും ഇ-മെയില്‍ അയക്കുകയും ചെയ്തത്.

പ്രതി മാപ്പ് പറഞ്ഞെങ്കിലും നിയമനടപടിയുമായി മുന്നോട്ടുപോകാനാണ് അരിതയുടെ തീരുമാനം. ഒരു പെണ്‍കുട്ടിക്കും ഇത്തരം അനുഭവം ഉണ്ടാകാതിരിക്കാനാണ് നിയമനടപടികളുമായി മുന്നോട്ടുപോകാന്‍ തീരുമാനിച്ചത്. മറ്റൊരു പെണ്‍കുട്ടിക്ക് അയച്ച വീഡിയോ ആണെന്ന് പ്രതി തന്നെ സമ്മതിക്കുമ്പോള്‍ മറ്റുള്ളവരോടും ഇയാള്‍ മോശമായി പെരുമാറിയതിന്റെ തെളിവാണിതെന്നും അരിത ചൂണ്ടിക്കാട്ടി. പ്രതി വിദേശത്തായതിനാല്‍ ഉടന്‍ നടപടി സ്വീകരിക്കുന്നതിലുള്ള പ്രയാസം പോലീസ് അറിയിച്ചെന്നും അരിത വ്യക്തമാക്കി.