ദോഹ: സ്‌കൂളുകൾക്ക് മധ്യവേനൽ അവധി കഴിയാറായതോടെ നാട്ടിൽ നിന്നും മടങ്ങുന്നവരുടെ എണ്ണത്തിൽ വർധനവ് എന്നാൽ വിമാന ടിക്കറ്റ് രണ്ടിരട്ടിയായി. ദോഹ സെക്ടറിലേക്കാണ് വലിയ നിരക്ക് ഇപ്പോൾ വരുന്നത്. ഇത്തവണ നാട്ടിലെത്തിയവർ ഓണം കൂടി ആഘോഷിച്ച ശേഷം ആയിരിക്കും മടങ്ങുക. 29 ന് തിരുവോണം കൂടി ആഘോഷിച്ച ശേഷമാണ് പലരും യാത്ര പ്ലാൻ ചെയ്യുന്നത്. അതുകൊണ്ട് തന്നെ ഇത്തവണ നാട്ടിലേക്ക് ഓണം ആഘോഷിക്കാൻ വരുന്നവരുടെ എണ്ണം കുറവായിരിക്കും.
ദോഹയിൽ നിന്നും നാട്ടിലേക്ക് പോകാൻ ചെറിയ തുക മതി ടിക്കറ്റിന് എങ്കിൽ തിരിച്ച് ദോഹയിൽ എത്താൻ വലിയ തുക നൽകേണ്ടി വരും. ടിക്കറ്റ് നിരക്ക് കൂടിയതോടെ പലരും കണക്ഷൻ ഫ്ലെെറ്റിൽ ആണ് യാത്ര പ്ലാൻ ചെയ്യുന്നത്. ദുബായ്, ശ്രീലങ്ക, മുംബൈ, ഡൽഹി, ബെംഗളൂരു എന്നീ നഗരങ്ങൾ വഴിയാണ് പലരും നാട്ടിലേക്കുള്ള യാത്രക്കായി തെരഞ്ഞെടുക്കുന്നത്.
ഖത്തർ എയർവേയ്‌സിന് പുറമേ ബജറ്റ് എയർലൈനുകളായ എയർ ഇന്ത്യ എക്‌സ്പ്രസ്, ഇൻഡിഗോ എന്നിവയും കേരത്തിലേക്ക് സർവീസ് നടത്തുണ്ട്. എന്നാൽ അവധിക്കാലമായതിനാൽ എല്ലാവർക്കും ടിക്കറ്റ് നിരക്ക് കൂടുതൽ തന്നെയാണ്. ഈ മാസം 27, 29 തീയതികളിൽ ദോഹയിൽ നിന്ന് കോഴിക്കോട്, കൊച്ചി എന്നിവിടങ്ങളിലേക്ക് എയർ ഇന്ത്യ എക്‌സ്പ്രസ് 2 അധിക സർവീസുകൾ പ്രഖ്യാപിച്ചിട്ടുണ്ട്. തിരക്ക് കുറക്കാൻ വേണ്ടിയാണ് അവർ യാത്രക്കാർക്ക് ഈ സൗകര്യങ്ങൾ ചെയ്തു നൽകിയിരിക്കുന്നത്.
ഇൻഡിഗോ, എയർ ഇന്ത്യ എക്‌സ്പ്രസ് എന്നീ വിമാനക്കമ്പനികളുടെ വെബ്‌സൈറ്റിലെ വിവരങ്ങൾ അനുസരിച്ച് 25നും 31 നും ഇടയിൽ കൊച്ചിയിൽ നിന്ന് ദോഹയിലേക്ക് നേരിട്ടുള്ള വിമാനത്തിൽ യാത്ര ചെയ്യണമെങ്കിൽ 26,220 രൂപയ്ക്കും 52,480 രൂപയ്ക്കും ഇടയിൽ പണം നൽകേണ്ടി വരും. കോഴിക്കോട് നിന്നാണെങ്കിൽ 30,863 രൂപയോ അല്ലെങ്കിൽ -44,200 രൂപയോ നൽകേണ്ടി വരും. കണ്ണൂരിൽ നിന്നാണ് യാത്രയെങ്കിൽ 18,899 രൂപയോ അല്ലെങ്കിൽ -44,348 രൂപയോ നൽകേണ്ടി വരും. ദോഹയിൽ നിന്ന് കേരളത്തിലേക്ക് 12,155 രൂപയ്ക്കും 15,000 രൂപയ്ക്കും ഇടയിലാണ് നിരക്ക് വരുന്നത്.
സീസണിൽ വിമാന ടിക്കറ്റ് നിരക്ക് വർധന നിയന്ത്രിക്കണം എന്ന് ആവശ്യപ്പെട്ട് പ്രവാസി സംഘടനകൾ പരാതി നൽകിയിരുന്നു. സംസ്ഥാന, കേന്ദ്ര സർക്കാരുകൾക്ക് ഇതുമായി ബന്ധപ്പെട്ട് പരാതി നൽകിയിരുന്നു. നിവേദനങ്ങളും പരാതികളും നിരവധി നൽകിയെങ്കിലും ഒരു ഫലവും കണ്ടില്ല. ഗൾഫ് സെക്ടറുകളിലേക്കുള്ള എയർലൈനുകളുടെ ടിക്കറ്റ് നിരക്കിന്റെ കാര്യത്തിൽ ഇപ്പോഴും ഒര തീരുമാനം ആയിട്ടില്ല.
